‘এই আদালতখন জাবৰৰ দম নহয়।’ দিল্লী উচ্চ ন্যায়ালয়ৰ ন্যায়াধীশ যশৱন্ত ভাৰ্মাৰ ঘৰৰ পৰা কোটি কোটি টকা উদ্ধাৰ হোৱাৰ পিছতে তেওঁক এলাহাবাদ উচ্চ ন্যায়ালয়লৈ বদলি কৰাৰ নিৰ্দেশ দিয়া হয়। এইটো উচ্চতম ন্যায়ালয়ৰ কলেজিয়ামৰ নিৰ্দেশ আছিল।
কথাটো গম পোৱাৰ লগে লগে ক্ষুব্ধ হৈ পৰে তাৰ বাৰ এছ’চিয়েচন। ন্যায়াধীশ ভাৰ্মাক এলাহাবাদ উচ্চ ন্যায়ালয়লৈ প্ৰেৰণ কৰাৰ সিদ্ধান্তৰ বিৰোধিতা কৰি মুখ্য ন্যায়াধীশ আৰু অন্যান্য ন্যায়াধীশলৈ পত্ৰ লিখিছে। উচ্চতম ন্যায়ালয়ৰ কলেজিয়ামে গ্ৰহণ কৰা সিদ্ধান্তত তেওঁলোক স্তম্ভিত হোৱাৰ কথাও উল্লেখ কৰা হৈছে।
চিঠিখনত লিখা হৈছে, ‘’এই সিদ্ধান্তই ন্যায়িক ব্যৱস্থাক লৈ এটা গুৰুত্বপূৰ্ণ প্ৰশ্ন উত্থাপন কৰিছে – এলাহাবাদ উচ্চ ন্যায়ালয় আৱৰ্জনাৰ দম নেকি? য’ত দীৰ্ঘদিন ধৰি ন্যায়াধীশৰ নাটনি হৈ আহিছে, তাত এই পৰিস্থিতি বিশেষভাৱে চিন্তনীয়। ন্যায়াধীশ নিযুক্তিৰ ক্ষেত্ৰত বাৰ এছ’চিয়েশ্যনৰ পৰামৰ্শ লোৱা নহয়, যিটো অতিশয় চিন্তাৰ বিষয়। যোগ্যতাৰ মাপকাঠী সঠিকভাৱে পূৰণ কৰা হোৱা নাই, যাৰ ফলত ন্যায়িক ব্যৱস্থাত দুৰ্নীতিৰ অভিযোগ উত্থাপন হৈছে আৰু জনসাধাৰণৰ আস্থা ভংগ হৈছে।”
কপিল ছিবাল আৰু ইন্দিৰা জয়ছিঙৰ দৰে অধিবক্তাইও এই সিদ্ধান্তক লৈ প্ৰশ্ন উত্থাপন কৰে। ৰাজ্যসভাত এই বিষয়টো উত্থাপন কৰাৰ সময়ত সাংসদ তথা জ্যেষ্ঠ অধিবক্তা কপিল ছিবালে দেশৰ ন্যায়িক ব্যৱস্থাত দুৰ্নীতিৰ অভিযোগক এক গুৰুতৰ সমস্যা বুলি অভিহিত কৰে। তেওঁ দাবী কৰে, ‘’এয়া নতুন বিষয় নহয়, কিন্তু বছৰ বছৰ ধৰি চলি আহিছে। উচ্চতম ন্যায়ালয়ে ন্যায়াধীশৰ নিযুক্তি প্ৰক্ৰিয়াৰ স্বচ্ছতাক বিবেচনা কৰাটো প্ৰয়োজন। নিযুক্তি প্ৰক্ৰিয়া অধিক স্বচ্ছ আৰু সাৱধানতাৰে সম্পন্ন হোৱা উচিত।”
কংগ্ৰেছ সাংসদ জয়ৰাম ৰমেশে ন্যায়িক ব্যৱস্থাৰ জবাবদিহিতা আৰু স্বচ্ছতাক লৈ প্ৰশ্ন উত্থাপন কৰে। তেওঁ অধ্যক্ষক অনুৰোধ জনায়, ‘অনুগ্ৰহ কৰি এই বিষয়ত কিছু পৰ্যবেক্ষণ কৰক আৰু ন্যায়িক ব্যৱস্থাৰ জবাবদিহিতা বৃদ্ধিৰ বাবে চৰকাৰক প্ৰয়োজনীয় নিৰ্দেশনা দিয়ক।’
ইয়াৰ উত্তৰত ৰাজ্যসভাৰ অধ্যক্ষ জগদীপ ধনকৰে কয় যে তেওঁৱো এই বিষয়টোক লৈ চিন্তিত। তেওঁ এই কথাত চিন্তিত যে এই ঘটনা সংঘটিত হৈছে অথচ লগে লগে পোহৰলৈ অহা নাই। ধনকৰে কয় যে যদি কোনো ৰাজনীতিবিদ, আমোলা বা উদ্যোগপতিৰ ঘৰৰ পৰা এনে ধন উদ্ধাৰ কৰা হ’লহেঁতেন তেন্তে তৎক্ষণাত তেওঁক লক্ষ্য কৰি লোৱা হ’লহেঁতেন। সেয়েহে স্বচ্ছ, ফলপ্ৰসূ আৰু জবাবদিহি প্ৰক্ৰিয়াৰ জৰিয়তে উপযুক্ত ব্যৱস্থা গ্ৰহণ কৰা হ’ব বুলি মই নিশ্চিত।’
এই সন্দৰ্ভত কংগ্ৰেছ নেতা পৱন খেৰাই এটা ডাঙৰ প্ৰশ্ন উত্থাপন কৰে। তেওঁ নেতৃত্ব দিয়া গোচৰবোৰৰ কথা তেওঁ স্মৰণ কৰে। ‘এইটো এটা ভয়ংকৰ ঘটনা। এই টকা কাৰ? উন্নাও ধৰ্ষণ গোচৰৰ দৰে গোচৰৰ বিচাৰ এই ন্যায়াধীশৰ আদালতত হৈছিল। তেওঁ কয় যে, তেওঁক কোনে কি কাৰণত এই ধন দিছিল, তদন্ত কৰা হওক।’
ইপিনে, এই ঘটনা সন্দৰ্ভত এতিয়া উচ্চতম ন্যায়ালয়ে দিল্লী উচ্চ ন্যায়ালয়ৰ পৰা প্ৰতিবেদন বিচাৰিছে। নিৰ্দেশ দিলে তদন্তৰ।
মঙলবাৰে পুৱা দিল্লীৰ ন্যায়াধীশগৰাকীৰ বাংলোত অগ্নিকাণ্ড সংঘটিত হয়। অগ্নিনিৰ্বাপক বাহিনীয়ে জুই নিয়ন্ত্ৰণলৈ অনাৰ পিছত ভিতৰলৈ গৈ কৰবাত আৰু পকেট ফায়াৰ আছে নেকি অনুসন্ধান কৰে। সেই সময়ত তেওঁলোক ঘৰত নাছিল। দেখা যায় ঘৰৰ ভিতৰৰ এটা কোঠা বন্ধ। তাতো জুই লাগিছে নেকি চাবলৈ ঘৰটো ভাঙি সোমাই যায়। কোঠাটোত মজিয়াৰ পৰা চিলিংলৈকে টকাৰ বাণ্ডিল থুপ খাই থকা দেখা গৈছে। যিটো দেখিলে তেওঁলোকৰ চকু কপালত উঠিল। আৰক্ষীক খবৰ দিয়া হয়।
এই বিষয়টো দিল্লী উচ্চ ন্যায়ালয়ৰ মুখ্য ন্যায়াধীশৰ দৃষ্টিগোচৰ কৰে। এই খবৰ দেশৰ মুখ্য ন্যায়াধীশ সঞ্জীব খান্নাৰ কাণতো পৰিল। তেওঁ সময় নষ্ট নকৰি উচ্চতম ন্যায়ালয়ৰ ন্যায়াধীশৰ কলেজিয়ামৰ এখন বৈঠক মাতিলে। এই কলেজিয়ামে উচ্চ ন্যায়ালয় আৰু উচ্চতম ন্যায়ালয়ৰ ন্যায়াধীশৰ নিযুক্তি, বদলি, আৰু সেৱা জীৱনৰ সৈতে জড়িত সকলো বিষয়ৰ সিদ্ধান্ত লয়। কলেজিয়ামে ন্যায়াধীশ ভাৰ্মাক এলাহাবাদ উচ্চ ন্যায়ালয়লৈ বদলি কৰাৰ সিদ্ধান্ত লয়।
কিন্তু ন্যায়পালিকাৰ লোকসকলে এই বদলিক শাস্তি হিচাপে মানি ল’বলৈ অনিচ্ছুক। তেওঁলোকে কয় যে ন্যায়াধীশ ভাৰ্মাক পদত্যাগ কৰিবলৈ ক’ব লাগে। যদি তেওঁ সন্মতি নিদিয়ে তেন্তে তেওঁৰ বিৰুদ্ধে অপৰাধমূলক গোচৰ ৰুজু কৰি নিলম্বন কৰিব লাগে। তাৰ পিছত সংসদত মহাভিযোগ আনি পদৰ পৰা অপসাৰণ কৰক। সংশ্লিষ্ট সকলো মহলে নিশ্চিত যে ন্যায়াধীশ ভাৰ্মাই উৎকোচৰ ধন ঘৰতে ৰাখিছিল। তেওঁৰ ৰায় পুনৰীক্ষণৰ বাবে উচ্চতম ন্যায়ালয়ে বিশেষ বিচাৰপীঠ গঠন কৰিবলৈ দাবী উত্থাপন হৈছে। চিবিআইৰ তদন্তৰো দাবী উত্থাপন হৈছে।
ইয়াৰ পিছতে শুকুৰবাৰে বিয়লি উচ্চতম ন্যায়ালয়ে তদন্তৰ নিৰ্দেশ দিয়ে। এই সন্দৰ্ভত উচ্চ ন্যায়ালয়ৰ পৰা প্ৰতিবেদন বিচাৰিছে।
