‘ষ্টেটাছ অফ পলিচিং ইন ইণ্ডিয়া ৰিপোৰ্ট ২০২৫’ত দাবী কৰা হৈছে যে ভাৰতৰ আৰক্ষী বাহিনীৰ এক উল্লেখযোগ্য অংশই কৰ্তব্যৰত সময়ত নিৰ্যাতন আৰু হিংসাক সমৰ্থন কৰে। কমন ক’জ আৰু লোকনীতি-চিএছডিএছ (চেণ্টাৰ ফৰ দ্য ষ্টাডি অৱ ডেভেলপিং ছ’চাইটিজ)ৰ গৱেষণা প্ৰতিবেদনত আৰক্ষীৰ জিম্মাত নিৰ্যাতন আৰু ন্যায় বহিৰ্ভূত হত্যাকাণ্ডৰ উদ্বেগজনক ইংগিতো পোৱা গৈছে।
যোৱা বুধবাৰে প্ৰকাশিত এই প্ৰতিবেদনত আইনৰ শাসনক অসন্মান কৰা আৰু আৰক্ষী বিষয়াৰ এটা শ্ৰেণীৰ মাজত গ্ৰেপ্তাৰৰ প্ৰক্ৰিয়া মানি নচলাৰ অভিযোগ উত্থাপন কৰা হৈছে। অধ্যয়নটোত দেখা গৈছে যে ২৬ শতাংশ আৰক্ষী সদস্যই দৃঢ়ভাৱে বিশ্বাস কৰে যে তেওঁলোকে নিৰ্ভয়ে বল প্ৰয়োগ কৰিব পাৰে আৰু ৪৫ শতাংশই এই মতামতৰ সৈতে আংশিকভাৱে একমত।
কমন ক’জ আৰু লোকনীতি-চিএছডিএছে কয় যে এই অধ্যয়নৰ বাবে ১৭খন ৰাজ্য আৰু কেন্দ্ৰীয় শাসিত অঞ্চলৰ বিভিন্ন আৰক্ষী থানাৰ ৮,২৭৬ জন আৰক্ষী জোৱানৰ সাক্ষাৎকাৰ লোৱা হৈছিল। ইয়াৰ ভিতৰত আছিল কনিষ্টবলৰ পৰা আৰম্ভ কৰি আই পি এছ বিষয়ালৈকে সকলো ৰেংকৰ সদস্য।
প্ৰতিবেদনত লগতে কোৱা হৈছে যে নিৰ্যাতনৰ বলি হোৱা অধিকাংশই দৰিদ্ৰ আৰু অনগ্ৰসৰ সম্প্ৰদায়ৰ। বিশেষকৈ মুছলমান, দলিত, জনজাতীয়, নিৰক্ষৰ, বস্তিবাসীৰ বিৰুদ্ধে আৰক্ষীৰ হাৰাশাস্তিৰ প্ৰৱণতা দেখা গৈছে। ১৮ শতাংশ আৰক্ষী বিষয়াই বিশ্বাস কৰে যে মুছলমানসকল “স্বাভাৱিকভাৱে অপৰাধপ্ৰৱণ”।
পেনেল আলোচনাত অংশগ্ৰহণ কৰি প্ৰাক্তন আই পি এছ বিষয়া প্ৰকাশ সিঙে কয় যে আৰক্ষীৰ বৰ্বৰতাক লৈ উদ্বেগ থাকিলেও নিৰ্দিষ্ট পৰিস্থিতিত ইয়াক বুজি পোৱাটো প্ৰয়োজন। আনহাতে, বিশিষ্ট অধিবক্তা বৃন্দা গ্ৰ’ভাৰে কয় যে নিৰ্যাতনৰ অপৰাধৰ বাবে ৰাষ্ট্ৰক প্ৰশ্ন কৰা উচিত আৰু আৰক্ষীক জবাবদিহি কৰিব লাগে।
প্ৰতিবেদনত দাবী কৰা হৈছে যে ৩০ শতাংশ আৰক্ষী বিষয়াই গুৰুতৰ অপৰাধৰ অভিযোগত অভিযুক্ত কোনো ব্যক্তিৰ বিৰুদ্ধে ‘থাৰ্ড ডিগ্ৰী’ পদ্ধতি ব্যৱহাৰ কৰাটো ন্যায্য বুলি বিশ্বাস কৰে। ইয়াৰ উপৰিও আৰক্ষীৰ জিম্মাত হোৱা মৃত্যুৰ সন্দৰ্ভত তথ্যতো অসামঞ্জস্যতা উত্থাপন কৰা হৈছে, যিটো প্ৰশাসনিক দুৰ্বলতাৰ প্ৰমাণ হিচাপে উল্লেখ কৰা হৈছে।
