আকৌ গুণ্ডাগিৰি অসম আৰক্ষীৰ। সদৌ অসম ছাত্ৰ সন্থাৰ এগৰাকী স্থানীয় কৰ্মীক গুৰুলাগুৰুলকৈ প্ৰহাৰ কৰিলে জোনাই মহকুমা আৰক্ষী বিষয়া সূৰ্যকান্ত মৰাণে। এই অভিযোগ উত্থাপন কৰিছে জোনাই আঞ্চলিক ছাত্ৰ সন্থা আৰু ভুক্তভোগী আছু কৰ্মীগৰাকীয়ে।
অভিযোগ অনুসৰি মহকুমা আৰক্ষী বিষয়া সূৰ্যকান্ত মৰাঙে কোনো কাৰণ নোহোৱাকৈ চন্দ্ৰকান্ত বৰুৱা নামৰ আছু কৰ্মীজনক গুৰুলাগুৰুলকৈ প্ৰহাৰ কৰে।
শুকুৰবাৰে নিশা বাহিৰ জোনাই আঞ্চলিক ছাত্ৰ সন্থাৰ উপদেষ্টা চন্দ্ৰকান্ত বৰুৱাই এজন বন্ধুৰ সৈতে জোনাই সদৰৰ হনুমান মন্দিৰত চলি থকা নাম-কীৰ্তন উপভোগ কৰি থকাৰ সময়তে জোনাই আৰক্ষী বিষয়া সূৰ্যকান্ত মৰাঙে তেওঁলোকক কোনো কাৰণ নোহোৱালৈ গালি-গালাজ আৰম্ভ কৰে। ইয়াৰ পিছত তেওঁলোকক দাগী অপৰাধীৰ দৰে ব্যৱহাৰ কৰি অজ্ঞাত স্থানলৈ নি লাঠিৰে প্ৰহাৰ কৰি গুৰুতৰভাৱে আহত কৰে৷
আছু কৰ্মী চন্দ্ৰকান্ত বৰুৱাই আৰক্ষী বিষয়া সূৰ্যকান্ত মৰাঙক বাৰে বাৰে অনুৰোধ কৰাৰ পিছতো বিষয়া গৰাকীয়ে কোনো ভ্ৰুক্ষেপ নকৰি প্ৰহাৰ কৰি যায়। তাৰপিছত মুমুৰ্ষ অৱস্থাত চন্দ্ৰকান্ত বৰুৱাক থানালৈ লৈ যোৱা হয়।
ঘটনাৰ বিষয়ে জানিব পাৰি জোনাই আৰক্ষী থানাত ছাত্ৰ সন্থাৰ কৰ্মীসকলে পুৱতি নিশাই প্ৰতিবাদ সাব্যস্ত কৰে।
ইফালে গুৰুতৰভাৱে আহত ছাত্ৰ সন্থাৰ কৰ্মীজনক উন্নত চিকিৎসাৰ বাবে পুৱাই ডিব্ৰুগড়লৈ প্ৰেৰণ কৰা হৈছে।
এই ঘটনাক তীব্ৰ গৰিহণা দি আছু নেতা উৎপল শৰ্মাই সামাজিক মাধ্যমত লিখিছে – “প্ৰতিটো কোবৰ হিচাপ লাগিব! যোৱা নিশা বাহিৰ জোনাই আঞ্চলিক ছাত্র সন্থাৰ উপদেষ্টা চন্দ্ৰকান্ত বৰুৱাক কোনোধৰণৰ কাৰণ নোহোৱাকৈ জোনাই মহকুমা আৰক্ষী বিষয়াই বৰ্বৰ অত্যাচাৰ কৰিছে। দাঁত ভাঙি গৈছে, ডিঙিত চিৰাল ফাট মেলিছে। সৰ্ব শৰীৰত আঘাতৰ চিন! এজন নিৰীহ যুৱকক এইদৰে প্ৰহাৰ কৰাৰ অধিকাৰ ক’ত পালে? আৰক্ষী বিষয়া গৰাকীক গৰিহণা দিছোঁ। তেওঁৰ বিৰুদ্ধে কঠোৰ শাস্তিমূলক ব্যৱস্থাৰ দাবী জনাইছোঁ। আৰক্ষীৰ নামত এনে গুণ্ডাগিৰী সহ্য কৰা নহ’ব। মুখ্যমন্ত্রী, ডিজিপিয়ে ব্যৱস্থা লওক; অন্যথা তীব্র আন্দোলন হ’ব। প্ৰতিটো কোবৰ হিচাপ লাগিব।”
