ডুমডুমা নামঘৰত সংঘটিত এক ঘটনাই অঞ্চলটোত তীব্ৰ চাঞ্চল্যৰ সৃষ্টি কৰিছে। চুৰিৰ উদ্দেশ্যে নামঘৰত প্ৰৱেশ কৰা দুজন চোৰৰ মন সলনি হৈ পৰিল, আৰু তেওঁলোকে চুৰিৰ পৰিৱৰ্তে শৰাই আগবঢ়াবলৈ নগদ ধন আৰু চিঠি থৈ যায়। এই ঘটনাই স্থানীয় লোকৰ মাজত ব্যাপক চৰ্চিত হৈ পৰিছে ।
জানিব পৰা মতে, দুজন চোৰে মধ্যৰাতি ডুমডুমা নামঘৰত চুৰিৰ পৰিকল্পনাৰে প্ৰৱেশ কৰিছিল। কিন্তু নামঘৰৰ পৱিত্ৰ পৰিৱেশৰ প্ৰভাৱত তেওঁলোকৰ অপৰাধী মানসিকতা সলনি হৈ পৰে। তেওঁলোকে চুৰি নকৰি নিজৰ সৈতে থকা ধনৰ পৰা ৩,৫০০ টকা আৰু ৪,৫০০ টকা শৰাইত থৈ দিলে। লগতে দুখন চিঠি লিখি থৈ গৈছে, চিঠিত তেওঁলোকে নিজকে বৰডুবি চাহ বাগিচাৰ বাসিন্দা বুলি উল্লেখ কৰি জনায় যে চোৰ বৃত্তিৰ বাবে মানসিক অশান্তিত ভুগি আছে। চিঠিত তেওঁলোকে নিজৰ ভুলৰ বাবে ক্ষমা বিচাৰি শৰাই আগবঢ়োৱাৰ ইচ্ছা প্ৰকাশ কৰিছে।
এই ঘটনা প্ৰচাৰ হোৱাৰ পিছত ডুমডুমা অঞ্চলত উৎসাহৰ সৃষ্টি হৈছে। নামঘৰ সমিতিয়ে চোৰ দুজনৰ অনুৰোধৰ প্ৰতি সন্মান জনাই আগন্তুক ২৫ মে’ত অনুষ্ঠিত হ’বলগীয়া বাৰ্ষিক নামৰ সময়ত তেওঁলোকৰ হৈ শৰাই আগবঢ়োৱাৰ সিদ্ধান্ত গ্ৰহণ কৰিছে। স্থানীয় লোকে এই ঘটনাক নামঘৰৰ আধ্যাত্মিক শক্তিৰ প্ৰমাণ হিচাপে গণ্য কৰিছে। এজন বাসিন্দাই কয়,নামঘৰৰ পৱিত্ৰতাই চোৰৰো মন সলনি কৰিলে। এয়া বিশ্বাসৰ জয়।
