পেহেলগাম আক্ৰমণত পাকিস্তানৰ সমৰ্থনৰ বিষয়টো ক্ৰমান্বয়ে ঘণীভূত হৈ পৰাৰ লগে লগে বতাহত যুদ্ধৰ গোন্ধ ভাহি ফুৰিছে! বুধবাৰে প্ৰতিৰক্ষা মন্ত্ৰী ৰাজনাথ সিঙে চীফ অফ ডিফেঞ্চ ষ্টাফ আৰু তিনিগৰাকী সেনা প্ৰধানৰ সৈতে বৈঠকত মিলিত হয়।
জানিব পৰা মতে, এই বৈঠকত জম্মু-কাশ্মীৰৰ নিৰীহ পৰ্যটকৰ ওপৰত সন্ত্ৰাসবাদী আক্ৰমণৰ পৰিপ্ৰেক্ষিতত পৰৱৰ্তী পদক্ষেপৰ বিষয়ে আলোচনা কৰা হয়। সাম্প্ৰতিক পৰিস্থিতিত পাকিস্তান অধিকৃত কাশ্মীৰৰ সন্ত্ৰাসবাদী প্ৰশিক্ষণ শিবিৰসমূহত প্ৰতিশোধমূলক চাৰ্জিকেল ষ্ট্ৰাইক হ’ব পাৰে নেকি?
মঙলবাৰে সন্ত্ৰাসবাদী আক্ৰমণৰ ফলত ৰক্তাক্ত হৈ পৰে জম্মু-কাশ্মীৰ। ভূস্বৰ্গ হিচাপে পৰিগণিত হোৱা পেহেলগামত ২৮ জন পৰ্যটকক হত্যা কৰে সন্ত্ৰাসবাদীয়ে। কালিৰ আক্ৰমণৰ আটাইতকৈ ডাঙৰ আঘাত পৰিছে কাশ্মীৰৰ অৰ্থনীতিৰ চালিকা শক্তি পৰ্যটন উদ্যোগৰ ওপৰত।
মঙলবাৰে নিশাই পেহেলগামকে ধৰি উপত্যকাৰ বিভিন্ন স্থানত স্থানীয় ৰাইজে প্ৰতিবাদী সমদল উলিয়ায়। পাকিস্তান সমৰ্থিত উগ্ৰপন্থী সংগঠন লস্কৰ-ই-তৈবাৰ ‘ছায়া সংগঠন’ টিআৰএফে কালি এই আক্ৰমণৰ দায়িত্ব স্বীকাৰ কৰে।
বুধবাৰে পুৱা গৃহমন্ত্ৰী অমিত শ্বাহে মৃতকৰ পৰিয়ালক সাক্ষাৎ কৰে। মৃতকক শ্ৰদ্ধা জনায়। ইয়াৰ পিছত এক্সে হেণ্ডেলত হুংকাৰ দিয়ে, “ভাৰতে সন্ত্ৰাসবাদৰ ওচৰত আত্মসমৰ্পণ নকৰে। এই নৃশংস সন্ত্ৰাসবাদী আক্ৰমণৰ দোষীক ৰেহাই দিয়া নহ’ব।” সন্ত্ৰাসবাদীক উপযুক্ত উত্তৰ দিয়া হ’ব বুলি সকীয়াই দিছে প্ৰধানমন্ত্ৰী নৰেন্দ্ৰ মোদীয়েও।
বুধবাৰে পুৱা পেহেলগাম আৰু কাশ্মীৰৰ সাম্প্ৰতিক পৰিস্থিতিৰ বিষয়ে প্ৰতিৰক্ষা মন্ত্ৰীক অৱগত কৰে চীফ অফ ডিফেঞ্চ ষ্টাফ অনিল চৌহানে। তেওঁৰ লগত স্থলসেনা, বায়ুসেনা আৰু নৌসেনাৰ মুৰব্বীসকলো আছিল। উল্লেখ্য যে পেহেলগাম নৰসংহাৰত নৌসেনাৰ এজন বিষয়াৰো মৃত্যু হৈছিল।
সমগ্ৰ দেশতে বৰ্তমান শোকৰ পৰিৱেশৰ মাজতে প্ৰতিশোধৰ জুই জ্বলি আছে। এনে পৰিস্থিতিত প্ৰথমে সন্ত্ৰাসবাদীৰ সন্ধানৰ বাবে সমগ্ৰ উপত্যকাটোত নিৰাপত্তা বহুগুণে বৃদ্ধি কৰা হৈছে। আৰম্ভ হৈছে কম্বিং অপৰাৰেচন। সেনা-আৰক্ষীৰ যৌথ অভিযান। ইয়াৰ সমান্তৰালকৈ নিয়ন্ত্ৰণ ৰেখাত নিৰাপত্তা বৃদ্ধি কৰাৰ লগতে কঠোৰ নিৰীক্ষণ আৰম্ভ কৰা হৈছে।
এনে পৰিস্থিতিত প্ৰতিৰক্ষা মন্ত্ৰী ৰাজনাথ সিঙৰ সৈতে সেনাধ্যক্ষৰ বৈঠক তাৎপৰ্যপূৰ্ণ বুলি বিবেচিত হৈছে। চাৰ্জিকেল ষ্ট্ৰাইকৰ সম্ভাৱনাও নুই কৰিব নোৱাৰি।
