সোমবাৰে মুডুমলাই বাঘ সংৰক্ষিত বনাঞ্চলৰ পৰা স্থানচ্যুত হোৱা জনজাতীয় পৰিয়ালসমূহে তেওঁলোকৰ ১৭টা দাবী পূৰণৰ দাবীত জিলা উপায়ুক্তৰ কাৰ্যালয়ৰ সন্মুখত বিক্ষোভ প্ৰদৰ্শন কৰে।
এমটিআৰ ঘৰ-ভূমিৰ পৰা বলপূৰ্বক উচ্ছেদ কৰাৰ বাবে ক্ষুব্ধ হৈ পৰিছে তেওঁলোক। পুনঃসংস্থাপনৰ সময়ত তেওঁলোকৰ সৈতে প্ৰতাৰণা কৰি মাটি আৰু ন্যায্য ক্ষতিপূৰণৰ পৰা বঞ্চিত কৰা বুলি দাবী উত্থাপন কৰিছে। পানিয়া আৰু কাট্টুনায়কান সম্প্ৰদায়ৰ সদস্যসহ বিক্ষোভকাৰীসকলে কয় যে বন বিভাগৰ কৰ্মচাৰী, অধিবক্তা আৰু ভূমি দালালে তেওঁলোকৰ সৈতে প্ৰতাৰণা কৰিছে, যাৰ ফলত বহুতৰে ন্যায্য ক্ষতিপূৰণ বা আইনী মাটিৰ নথি লাভ কৰা নাই।
জনজাতীয় পৰিয়ালসমূহে জানিবলৈ দিয়ে যে চৰকাৰে বাঘ আৰু বন্যপ্ৰাণী সুৰক্ষাৰ বাবে এমটিআৰৰ পৰা স্থানান্তৰৰ বিনিময়ত তেওঁলোকক ১০ লাখ টকা বা সমপৰিমাণৰ মাটিৰ প্ৰতিশ্ৰুতি দিছিল। কিন্তু একাংশ লোকক প্ৰদান কৰা ধন দালালে লোৱাত, তেওঁলোকক ব্যৱহাৰৰ অনুপযোগী চৰকাৰী পৰম্বোক মাটি বিক্ৰী কৰিছিল, যিবিলাক আইনীভাৱে নিজৰ কৰিব নোৱাৰি। পুলিয়ালাম আৰু নাগামপল্লিৰ কিছু পৰিয়াল এতিয়াও পূৰ্ণ ক্ষতিপূৰণৰ অপেক্ষাত আছে। তেওঁলোকে প্ৰতাৰণাকাৰীৰ বিৰুদ্ধে ব্যৱস্থা, আইনী মাটিৰ নথি আৰু ২৫ লাখ টকা ক্ষতিপূৰণৰ দাবী কৰিছে।
উল্লেখ্য যে তামিলনাডুৰ জনজাতি সংগঠনৰ কে. মহেন্দ্ৰনে কয় যে বৰ্তমানলৈ ৫৭৪টা পৰিয়ালক একাধিক পৰ্যায়ত সংৰক্ষিত বনাঞ্চলৰ পৰা স্থানচ্যুত কৰা হৈছে। ইয়াৰে ১০৮টা পৰিয়াল এতিয়াও সংৰক্ষিত অঞ্চলত বাস কৰি আছে আৰু স্থানান্তৰ হ’বলৈ অস্বীকাৰ কৰিছে। তেওঁ উল্লেখ কৰে যে ২০০৭ চনত মাদ্ৰাজ উচ্চ ন্যায়ালয়ে চৰকাৰক এবছৰৰ ভিতৰত উচ্ছেদ সম্পূৰ্ণ কৰিবলৈ নিৰ্দেশ দিছিল, কিন্তু বন বিভাগে ২০১৬ চনতহে এই প্ৰক্ৰিয়া আৰম্ভ কৰিছিল।
জনজাতীয় লোকসকলে অভিযোগ কৰে যে বন্যপ্ৰাণী সুৰক্ষা আইন, বন অধিকাৰ আইন, আৰু ভূমি অধিগ্ৰহণ, পুনঃসংস্থাপন আৰু ক্ষতিপূৰণত ন্যায্যতা আৰু স্বচ্ছতাৰ অধিকাৰ আইনৰ নিয়মবোৰ সঠিকভাৱে পালন কৰা হোৱা নাছিল। তেওঁলোকে ২০১৯ চনৰ পৰা চলি থকা গোচৰসমূহত বন বিভাগৰ কৰ্মচাৰী, অধিবক্তা আৰু ভূমি দালালৰ বিৰুদ্ধে তৎপৰ ব্যৱস্থা গ্ৰহণৰ দাবী জনায়। লগতে, অভিযুক্তসকলে বিক্ৰী কৰা মাটিৰ নথি-পত্ৰ লাভ কৰাত চৰকাৰৰ সহায় বিচাৰিছে।
