কানাডাৰ নিৰ্বাচনত লিবাৰেল পাৰ্টিয়ে জয়লাভ কৰিছে। ইলেকচনছ কানাডাৰ তথ্য অনুসৰি কানাডাৰ নিৰ্বাচনত ৬৭.১৫ শতাংশ ভোটাৰে ভোটদান কৰিছিল। ২০২১ চনত ৬২.৬ শতাংশ ভোটদান হৈছিল। নিৰ্বাচনত জয়ী হোৱাৰ পিছত পুনৰ প্ৰধানমন্ত্ৰীৰ দায়িত্ব গ্ৰহণ কৰিব মাৰ্ক কাৰ্নীয়ে।
যোৱা ২৮ এপ্ৰিলত কানাডাত ভোটগ্ৰহণ অনুষ্ঠিত হয়। ভোটৰ শতাংশৰ ক্ষেত্ৰত লিবাৰেল পাৰ্টিয়ে ৪৩.৫ শতাংশ আৰু কনজাৰ্ভেটিভ পাৰ্টিয়ে ৪১.৪ শতাংশ ভোট লাভ কৰে।
চলিত বৰ্ষৰ ৭ জানুৱাৰীত জাষ্টিন ট্ৰুডোৱে প্ৰধানমন্ত্ৰী পদৰ পৰা পদত্যাগ কৰাৰ পিছত ৫৯ বছৰীয়া মাৰ্ক কাৰ্নীয়ে ১০ মাৰ্চত শাসকীয় লিবাৰেল পাৰ্টিৰ নেতাৰ দায়িত্ব গ্ৰহণ কৰিছিল। দলৰ আভ্যন্তৰীণ নিৰ্বাচনত তেওঁ লাভ কৰিছিল প্ৰায় ৮৬ শতাংশ ভোট। তেওঁ প্ৰতিদ্বন্দ্বী ‘বিত্তমন্ত্ৰী’ ক্ৰীষ্টিয়া ফ্ৰীলেণ্ডক পৰাস্ত কৰে। ৰাজনৈতিক মহলত কাৰ্নীক কঠোৰ ট্ৰাম্প বিৰোধী হিচাপে জনা যায়।
দিনটোৰ ফলাফলৰ লগে লগে কনজাৰ্ভেটিভ পাৰ্টিৰ নেতা পিয়েৰ পইলেভাৰে পৰাজয় স্বীকাৰ কৰে। নিৰ্বাচনত জয়ী হোৱাটো নিশ্চিত বুলি জানি মাৰ্ক কাৰ্নীয়ে পুনৰবাৰ আমেৰিকাৰ বিৰুদ্ধে নিজৰ ক্ষোভ প্ৰকাশ কৰিছে। তেওঁ কয়, “আমাৰ সৈতে আমেৰিকাৰ পুৰণি সম্পৰ্ক এতিয়া অতীতৰ কথা। আমেৰিকাৰ বিশ্বাসঘাতকতাত আমি স্তম্ভিত হৈছো।”
কানাডাত মুঠ ৩৪৩খন আসন আছে। সংখ্যাগৰিষ্ঠতাৰ বাবে ১৭২ খন আসনৰ প্ৰয়োজন। শেহতীয়া খবৰ অনুসৰি লিবাৰেল পাৰ্টিয়ে ১৬৮খন আসনত জয়ী হৈ আগবাঢ়ি আছে, আনহাতে কনজাৰ্ভেটিভ পাৰ্টিয়ে ১৪৪খন আসনত জয়লাভ কৰি আগবাঢ়ি আছে। বিকিউৱে জয়লাভ কৰি ২৩খন আসনত আগবাঢ়ি আছে। নিউ ডেম’ক্ৰেটিক পাৰ্টিয়ে জয়লাভ কৰি ৭খন আসনত আগবাঢ়ি আছে, আৰু গ্ৰীণ পাৰ্টিয়ে ১ খন আসনত জয়ী হৈ আগবাঢ়ি আছে। এই পৰ্যন্ত উপলব্ধ তথ্য অনুসৰি ৯৯% ভোটগণনা সম্পূৰ্ণ হৈছে। ৩৪৩খন আসনৰ ভিতৰত বাকী ১৫খন আসনৰ চূড়ান্ত ফলাফল ঘোষণা কৰা হ’ব।
কানাডাৰ প্ৰধানমন্ত্ৰী জাষ্টিন ট্ৰুডোৱে চলিত বৰ্ষৰ ৭ জানুৱাৰীত পদত্যাগ ঘোষণা কৰে। প্ৰায় এটা দশক ধৰি তেওঁ কানাডাক শাসন কৰি আহিছে। দলৰ ভিতৰত আৰু বাহিৰত একাধিক প্ৰত্যাহ্বানৰ সন্মুখীন হৈ তেওঁ পদত্যাগ কৰিবলৈ বাধ্য হয়। অৱশ্যে পদত্যাগ কৰাৰ পিছত দেশৰ নিৰ্বাচনী ব্যৱস্থাক লৈ তেওঁ হতাশা প্ৰকাশ কৰে।
পদত্যাগ কৰাৰ পিছত অট’ৱাত অনুষ্ঠিত সংবাদমেলত ভাষণ দি ৫৩ বছৰীয়া ট্ৰুডোৱে নিজৰ হতাশা প্ৰকাশ কৰি কয় যে, “যদি মোৰ এটা আক্ষেপ আছে, তেন্তে সেয়া হৈছে আমাৰ নিৰ্বাচনী ব্যৱস্থাৰ সংস্কাৰ। মই আশা কৰিছিলোঁ যে মানুহে নিজৰ ভোটৰ জৰিয়তে প্ৰকৃত পছন্দৰ স্বাধীনতা পাব। তেওঁলোকে বেলটত কাৰোবাক প্ৰথম পছন্দ, দ্বিতীয় পছন্দ বা তৃতীয় পছন্দ হিচাপে বাছি লোৱাৰ সুযোগ পাব।”
