“গৌৰৱ গগৈয়ে যদি নিজৰ নাবালক সন্তান ভাৰতীয় নাগৰিক বুলি প্ৰমাণ কৰিব পাৰে মই মুখ্যমন্ত্ৰী পদ এৰি দিম।” কিছুদিন পূৰ্বে কংগ্ৰেছ সাংসদ গৌৰৱ গগৈক এইদৰে প্ৰত্যাহ্বান জনাইছিল মুখ্যমন্ত্ৰী হিমন্ত বিশ্ব শৰ্মাই।
হিমন্ত বিশ্ব শৰ্মাই কংগ্ৰেছৰ সাংসদ গৌৰৱ গগৈক আক্ৰমণ কৰি কয় যে যোৰহাট সাংসদগৰাকীৰ সন্তান দুটা ভাৰতীয় নাগৰিক নহয় । যদিও ইয়াৰে এজনৰ জন্ম ভাৰতত আৰু সেয়েহে জন্মসূত্ৰে ভাৰতৰ নাগৰিক হ’ব লাগিছিল।
ধুবুৰীত নিৰ্বাচনী প্ৰচাৰ সভাত ভাষণ দি সংবাদ মাধ্যমৰ আগত মুখ্যমন্ত্ৰী শৰ্মাই কয় যে, “মই নিশ্চিত যে গৌৰৱ গগৈৰ পুত্ৰ আৰু কন্যা ভাৰতীয় নাগৰিক নহয়। কংগ্ৰেছৰ সাংসদগৰাকীৰ দুই সন্তানৰ নাগৰিকত্ব ভাৰতীয় নহয় বুলি মোৰ ওচৰত প্ৰমাণ আছে। তেওঁলোকৰ নাগৰিকত্বৰ মৰ্যাদা গৌৰৱ গগৈ আৰু তেওঁৰ পত্নীয়ে তেওঁলোকৰ অজ্ঞাতে সলনি কৰিছিল।”
“গৌৰৱ গগৈয়ে তেওঁৰ নাবালক সন্তান ভাৰতীয় নাগৰিক নহয় বুলি অস্বীকাৰ কৰিব পাৰিলে মই মুখ্যমন্ত্ৰী পদৰ পৰা পদত্যাগ কৰিম। তেওঁৰ পত্নী ভাৰতীয় নাগৰিক নহয় আৰু তেওঁৰ নাবালক পুত্ৰ-কন্যাও ভাৰতৰ নাগৰিক নহয়। কোনে জানে গৌৰৱ গগৈয়ে কেতিয়া ভাৰতীয় নাগৰিকত্ব ত্যাগ কৰে।”
ইয়াৰ পূৰ্বে শৰ্মাই বৃহস্পতিবাৰে সন্ধিয়া ‘এক্স’ৰ এটা পোষ্টত দাবী কৰিছিল যে “অসমৰ এজন সংসদৰ নাবালক সন্তান ভাৰতৰ নাগৰিক নহয়”।
মুখ্যমন্ত্ৰী শৰ্মাই পোষ্টটোত লিখিছে, “মই এই কথা সম্পূৰ্ণ দায়িত্ব লৈ কৈছো, অসমৰ এজন সংসদৰ নাবালক ল’ৰা-ছোৱালী এতিয়া ভাৰতৰ নাগৰিক নহয়। কিন্তু এয়া মাত্ৰ আৰম্ভণিহে। আৰু বহু কথা প্ৰকাশ কৰিবলগীয়া আছে।”
আনহাতে, যোৰহাটৰ সাংসদগৰাকীয়ে কেন্দ্ৰীয় চৰকাৰক অন্ধকাৰত ৰাখি ১৫ দিন পাকিস্তানত থাকি অহা বিষয়টো অত্যন্ত গুৰুত্বপূৰ্ণ আৰু এছ আই টিৰ তদন্তত আৰু বহু কথা ওলাই পৰিব বুলিও মুখ্যমন্ত্ৰী হিন্ত বিশ শৰ্মাই মন্তব্য কৰে।হিমন্ত বিশ্ব শৰ্মাই লগতে কয় যে গৌৰৱ গগৈয়ে পাকিস্তান ভ্ৰমণৰ সময়ত কি কৰিছিল, ক’ত আছিল সেই কথা তেওঁ অসমৰ ৰাইজক জনাব লাগে। অৱশ্যে এই সম্পৰ্কে এতিয়াও কোনো স্পষ্টীকৰণ দিয়া নাই গৌৰৱ গগৈয়ে।
