শনিবাৰে চি আৰ পি এফৰ ৪১ নং বেটেলিয়নৰ কনিষ্টবল মুনীৰ আহমেদক চাকৰিৰ পৰা বৰ্খাস্ত কৰা হয়। মুনিৰে গোপনে পাকিস্তানী মহিলাক বিয়া কৰাই ভিছাৰ ম্যাদ উকলি যোৱাৰ পিছতো জানি-বুজি আশ্ৰয় দিয়াৰ অভিযোগ উত্থাপন হৈছিল।
দেওবাৰে চাকৰিৰ পৰা বৰ্খাস্ত কৰা কনিষ্টবল মুনীৰ আহমেদে তেওঁৰ বিৰুদ্ধে দিয়া শাস্তিৰ বিষয়ে মুকলিকৈ কয়। ইয়াৰ পিছতে তেওঁ ন্যায় বিচাৰি প্ৰধানমন্ত্ৰী নৰেন্দ্ৰ মোডীলৈ পত্ৰ প্ৰেৰণ কৰে।
সংবাদ মাধ্যমৰ সৈতে হোৱা এক সাক্ষাৎকাৰত মুনীৰ আহমেদে কয় যে, “মই সকলো কৈছো, মোৰ হাতত প্ৰমাণ আছে। মই যথাযথ প্ৰক্ৰিয়া অনুসৰণ কৰিছো আৰু নথি-পত্ৰ সংলগ্ন কৰিছো।”
মুনীৰ আহমেদক চাকৰিৰ পৰা বৰ্খাস্ত কৰাৰ সিদ্ধান্ত ঘোষণা কৰাৰ সময়ত চি আৰ পি এফৰ মুখপাত্ৰ উপ মহাপৰিদৰ্শক এম ধীনকৰনে কয় যে, “কনিষ্টবল মুনীৰ আহমেদে গোপনে এগৰাকী পাকিস্তানী মহিলাক বিয়া কৰাইছিল আৰু ভিছাৰ ম্যাদ উকলি যোৱাৰ পিছতো জানি-বুজি তেওঁক আশ্ৰয় দিছিল। তেওঁৰ এই কাৰ্য্য সেৱাৰ নিয়ম উলংঘা কৰা আৰু ৰাষ্ট্ৰীয় নিৰাপত্তাৰ বাবে ক্ষতিকাৰক বুলি ধৰা পৰিছে। সেয়েহে কনিষ্টবলজনক সেৱাৰ পৰা বৰ্খাস্ত কৰা হৈছে।”
উল্লেখ্য যে যোৱা বছৰৰ ২৪ মে’ত ভিডিঅ’ কলৰ জৰিয়তে বিবাহপাশত আবদ্ধ হৈছিল মুনীৰ আহমেদ আৰু পাকিস্তানী নাগৰিক মিনাল খান। মুনিৰে কয় যে তেওঁ অক্টোবৰ মাহত চি আৰ পি এফ কৰ্তৃপক্ষক এই বিবাহৰ বিষয়ে অৱগত কৰিছিল। এই ফেব্ৰুৱাৰী মাহত মিনাল খানে ৱাগাহ-আটাৰী সীমান্তৰে ভাৰতলৈ আহি মুনীৰ আহমেদৰ লগত থাকিবলৈ আৰম্ভ কৰে। মাৰ্চ মাহত মিনালৰ ১৫ দিনীয়া ভিছাৰ ম্যাদ উকলি গৈছিল আৰু ইয়াৰ পিছতে মুনীৰে পত্নী মিনালৰ বাবে দীৰ্ঘম্যাদী ভিছাৰ বাবে আবেদন কৰে। ইয়াৰ এমাহৰ পাছত পেহেলগামত সংঘটিত সন্ত্ৰাসবাদী আক্ৰমণত ২৬জন নিৰীহ লোক নিহত হয়। ইয়াৰ পিছত নতুন দিল্লীয়ে ভাৰতত বসবাস কৰা পাকিস্তানী নাগৰিকৰ বিৰুদ্ধে কঠোৰ ব্যৱস্থা গ্ৰহণ কৰে। মিনাল খানকো দেশ এৰি যাবলৈ কোৱা হয়। ঠিক তেনেকৈয়ে তেওঁ ৱাগাহ সীমান্তলৈ ৰাওনা হয়। কিন্তু জম্মু-কাশ্মীৰ উচ্চ ন্যায়ালয়ে তেওঁক দেশ এৰি যোৱাৰ পূৰ্বে শেষ মুহূৰ্তত আৰু ১০ দিন থাকিবলৈ অনুমতি দিয়ে।
