বিদেশী আগ্ৰাসন আৰু ইজৰাইলৰ নৃশংসতাৰ প্ৰতি প্ৰত্যুত্তৰত য়েমেনৰ হুথি বিদ্ৰোহীয়ে অভিযান তীব্ৰতৰ কৰি তুলিছে। কিন্তু ইয়াৰ প্ৰতিক্ৰিয়া স্বৰূপে কেইবা ডজন ইজৰাইলী যুদ্ধ বিমানে য়েমেনৰ টাৰ্গেটত বিমান আক্ৰমণ চলাইছে।
য়েমেনৰ স্থানীয় সংবাদ মাধ্যমে প্ৰকাশ কৰা অনুসৰি সোমবাৰে নিশা ইজৰাইলৰ ৩০খনতকৈও অধিক যুদ্ধ বিমানে দেশখনৰ বন্দৰ চহৰ হুদাইদাত আক্ৰমণ চলায়।
আমেৰিকাৰ এজন জ্যেষ্ঠ বিষয়াই নিশ্চিত কৰিছে যে এই বিমান আক্ৰমণ আমেৰিকাৰ সৈতে ঘনিষ্ঠ সমন্বয়ত চলোৱা হৈছে।
য়েমেনৰ আল-মছিৰা টেলিভিছন চেনেলে প্ৰকাশ কৰা অনুসৰি ৪ মে’ৰ পৰা আমেৰিকাই ৩৫টা আক্ৰমণ সংঘটিত কৰিছে। আল-জাউফ আৰু মাৰিবকে ধৰি য়েমেনৰ কেইবাখনো প্ৰদেশক লক্ষ্য কৰি আক্ৰমণ চলোৱা হৈছে।
মাৰ্চ মাহৰ পৰা আমেৰিকা, ব্ৰিটেইনে ইজৰাইলৰ সৈতে মিলি য়েমেনত দৈনিক বিমান আক্ৰমণ চলাই আহিছে। আৰব দেশখনত ১০০০ৰো অধিক লক্ষ্যত আঘাত কৰা বুলি দাবী কৰিছে আমেৰিকাই।
এই অভিযানৰ লক্ষ্য হৈছে লোহিত সাগৰৰ জাহাজ লেনত ইজৰাইল আৰু ইজৰাইলৰ সৈতে জড়িত জাহাজসমূহৰ ওপৰত য়েমেনৰ সামৰিক আক্ৰমণ আৰু দখলীকৃত পেলেষ্টাইন ভূখণ্ডৰ ভিতৰত হুথিৰ অভিযান বন্ধ কৰা।
শেহতীয়াকৈ য়েমেনৰ পৰা বেন গুৰিয়ান আন্তঃৰাষ্ট্ৰীয় বিমানবন্দৰৰ সীমান্তত বেলিষ্টিক মিছাইল আক্ৰমণৰ পিছত ইজৰাইল-আমেৰিকাৰ আগ্ৰাসন আৰম্ভ হৈছে।
য়েমেনৰ সেনাই কয় যে অৱৰুদ্ধ গাজা উপত্যকাত থকা পেলেষ্টাইনী জনসাধাৰণৰ সমৰ্থনত তেওঁলোকে ইজৰাইলৰ বিৰুদ্ধে নতুন প্ৰতিশোধমূলক অভিযান চলাইছে।
য়েমেনৰ সশস্ত্ৰ বাহিনীৰ মুখপাত্ৰ ব্ৰিগেডিয়াৰ জেনেৰেল ইয়াহিয়া ছাৰীয়ে দেওবাৰে কয় যে এই আক্ৰমণৰ ফলত ৩০ লাখতকৈ অধিক ইজৰাইলী বসতিপ্ৰধান লোকে বাংকাৰত আশ্ৰয় ল’বলগীয়া হৈছে।
তেওঁ কয় যে এঘণ্টাৰো অধিক সময় বিমানবন্দৰটোৰ কাম-কাজ সম্পূৰ্ণৰূপে বন্ধ হৈ পৰিছিল।
