পেহেলগামত সন্ত্ৰাসবাদী আক্ৰমণৰ পিছত ভাৰত আৰু পাকিস্তানৰ যুদ্ধৰ পৰিস্থিতি ক্ৰমান্বয়ে জটিল হৈ পৰিছিল। এনে পৰিস্থিতিত শনিবাৰে বিয়লি হঠাতে যুদ্ধবিৰতি ঘোষণা কৰা হয়। আমেৰিকাৰ ৰাষ্ট্ৰপতি ড’নাল্ড ট্ৰাম্পেও এই সন্দৰ্ভত পোষ্ট কৰে। কিন্তু এই ঘোষণাৰ কিছু ঘণ্টাৰ ভিতৰতে পাকিস্তানে যুদ্ধবিৰতি উলংঘা কৰে। পেহেলগামত সন্ত্ৰাসবাদী আক্ৰমণৰ পিছৰে পৰা কি ঘটিছে চাওঁক।
২২ এপ্ৰিল : জম্মু-কাশ্মীৰৰ পেহেলগামৰ বৈছাৰন উপত্যকাত সন্ত্ৰাসবাদীয়ে আক্ৰমণ চলায়। পৰ্যটকৰ ধৰ্মীয় পৰিচয় সুধি হত্যা কৰাৰ অভিযোগ উঠে। মুঠ ২৬ জন লোকৰ মৃত্যু হয়।
২৩ এপ্ৰিল : পেহেলগাম আক্ৰমণৰ প্ৰতিবাদত নতুন দিল্লীয়ে বলিষ্ঠ কূটনৈতিক পদক্ষেপ গ্ৰহণ কৰে। ভাৰতে সিন্ধু জল সন্ধি বাতিল কৰে, ভিছা বাতিল কৰিলে, সীমান্ত বন্ধ কৰিলে আৰু পাকিস্তানী নাগৰিকক দেশ এৰি যাবলৈ নিৰ্দেশ দিলে।
তদুপৰি, এপ্ৰিল মাহৰ বাকী দিনকেইটাত নতুন দিল্লীয়ে কেইবাটাও কূটনৈতিক পদক্ষেপ গ্ৰহণ কৰে। এই সময়ছোৱাত দেশৰ সেনাই একাধিক স্থানত অনুশীলন চলাইছিল।
৭ মে’: ভাৰতীয় সেনাই আৰম্ভ কৰে অপাৰেচন সিন্দুৰ। সেই অভিযানত পাকিস্তান আৰু পাকিস্তান অধিকৃত কাশ্মীৰৰ মুঠ ৯টা স্থানত সন্ত্ৰাসবাদী ঘাটিক লক্ষ্য কৰি নিয়ন্ত্ৰিত বিমান আক্ৰমণ চলোৱা হৈছিল। ফলত কেইবাটাও সন্ত্ৰাসবাদী ঘাটি ধ্বংস হয়। বহু সন্ত্ৰাসবাদীৰ মৃত্যুও ঘটে।
৮ মে’ : অপাৰেচন সিন্দুৰত বিধ্বস্ত হৈ পৰা পাকিস্তানে সেই নিশা ভাৰতৰ ওপৰত প্ৰত্যাক্ৰমণৰ চেষ্টা চলায়। ভাৰতৰ কাশ্মীৰ আৰু পঞ্জাৱৰ কেইবাটাও স্থানৰ ওপৰেৰে পাকিস্তানী ড্ৰোন আৰু ক্ষেপণাস্ত্ৰ উৰিবলৈ আৰম্ভ কৰে। কিন্তু ভাৰতৰ শক্তিশালী বায়ু প্ৰতিৰক্ষা ব্যৱস্থাই ইয়াৰে অধিকাংশকে প্ৰতিহত কৰে। পাকিস্তানী সেনাই নিয়ন্ত্ৰণ ৰেখাত প্ৰচণ্ড গুলীচালনা আৰম্ভ কৰে। ভাৰতেও তাৰ উপযুক্ত উত্তৰ দিয়ে। সেই নিশা ভাৰতে লাহোৰত পাকিস্তানৰ বায়ু প্ৰতিৰক্ষা ব্যৱস্থা ধ্বংস কৰে।
৯ মে’ : পুৱাৰে পৰা নিশালৈ একাধিক ঘটনা সংঘটিত হয়। উদাহৰণস্বৰূপে, এদিনতে পাকিস্তানে সীমান্তত গুলীচালনাৰ তীব্ৰতা বৃদ্ধি কৰে। ভাৰতৰ প্ৰায় ২৬ স্থানত ড্ৰ’ন আক্ৰমণৰ চেষ্টা অব্যাহত ৰাখে। ভাৰতে মাজনিশা আন এক বিমান আক্ৰমণৰ জৰিয়তে একাধিক পাকিস্তানী বিমান ঘাটি ধ্বংস কৰে। পাকিস্তান অধিকৃত কাশ্মীৰৰ সেনা শিবিৰ আৰু সন্ত্ৰাসবাদীৰ লঞ্চ পেডো ধ্বংস কৰা হয়।
১০ মে’ : ভাৰত আৰু পাকিস্তানৰ সৈতে যুদ্ধ বন্ধ কৰাৰ বিষয়ে আলোচনা কৰিলে আমেৰিকাৰ বিদেশ মন্ত্ৰী মাৰ্কো ৰুবিঅ’ই। বিয়লি যুদ্ধবিৰতি ঘোষণা কৰা হয়। কিন্তু কেইঘণ্টামানৰ পাছত পাকিস্তানে চুক্তি উলংঘা কৰে। ড্ৰোন আক্ৰমণ আৰু গুলীচালনাৰ ঘটনা পুনৰ সংঘটিত হয়।
