ন্যায়পালিকা আৰু প্ৰশাসনৰ মাজত বাঢ়িছে নেকি ব্যৱধান? এইবাৰ সংবিধানৰ ১৪৩ নং অনুচ্ছেদক ব্যৱহাৰ কৰি উচ্চতম ন্যায়ালয়ক প্ৰশ্ন কৰিছে খোদ ৰাষ্ট্ৰপতিয়ে। ৰাজ্যপাল আৰু ৰাষ্ট্ৰপতিয়ে বিধেয়ক গৃহীত কৰাৰ সময়সীমা সন্দৰ্ভত ন্যায়পালিকাৰ সন্মুখত ১৪টা প্ৰশ্ন উত্থাপন কৰিছে ৰাষ্ট্ৰপতি দ্ৰৌপদী মুৰ্মুৱে। নিয়ম অনুসৰি এইবাৰ ৰাষ্ট্ৰপতিৰ প্ৰশ্নৰ উত্তৰ দিব লাগিব উচ্চতম ন্যায়ালয়ৰ সংবিধান বিচাৰপীঠে।
শেহতীয়াকৈ উচ্চতম ন্যায়ালয়ৰ বিচাৰপীঠে ৰায় দিছিল যে ৰাজ্যপাল বা ৰাষ্ট্ৰপতিয়েও বিধায়িনী দলে গৃহীত কৰা বিধেয়ক অনিৰ্দিষ্টকাললৈ স্থগিত ৰাখিব নোৱাৰে। সেই বিল সন্দৰ্ভত তেওঁলোকে নিৰ্দিষ্ট সময়সীমাৰ ভিতৰত সিদ্ধান্ত ল’ব লাগিব। উল্লেখ্য যে উচ্চতম ন্যায়ালয়ে কেৱল ৰাজ্যপাল বা ৰাষ্ট্ৰপতিক এনে ‘নিৰ্দেশনা’ দিব নোৱাৰে। কিন্তু সংবিধানৰ ১৪২ নং অনুচ্ছেদ অনুসৰি উচ্চতম ন্যায়ালয়ে আইনৰ বাহিৰলৈ গৈ ‘ন্যায় প্ৰতিষ্ঠাৰ উদ্দেশ্যে’ বিশেষ ৰায় দিব পাৰে। এই গোচৰত উচ্চতম ন্যায়ালয়েও ১৪২ নং অনুচ্ছেদৰ অধীনত ৰায় দান দিছিল। ইতিমধ্যে শাসকীয় শিবিৰৰ বহু নেতাই ইয়াৰ বাবে ন্যায়পালিকাক সমালোচনা কৰিছে। এইবাৰ ৰাষ্ট্ৰপতিগৰাকীয়ে নিজেই এই বিষয়ক লৈ প্ৰশ্ন উত্থাপন কৰিলে।
উল্লেখ্য যে সংবিধানৰ ১৪৩ নং অনুচ্ছেদৰ অধীনত ৰাষ্ট্ৰপতিয়েও বিশেষ ক্ষমতা লাভ কৰে। উচ্চতম ন্যায়ালয়ৰ যিকোনো ৰায়ক লৈ প্ৰশ্ন উত্থাপন কৰাৰ অধিকাৰ লাভ কৰে। সংবাদ মাধ্যমৰ এক সূত্ৰ অনুসৰি সেই অধিকাৰ সন্দৰ্ভত উচ্চতম ন্যায়ালয়ত ১৪টা প্ৰশ্ন উত্থাপন কৰিছে দ্ৰৌপদী মুৰ্মুৱে। ইয়াৰ ভিতৰত উল্লেখযোগ্য যে উচ্চতম ন্যায়ালয়ে ৰাষ্ট্ৰপতি বা ৰাজ্যপালৰ বাবে বিধেয়ক গৃহীত কৰাৰ সময়সীমা কেনেকৈ নিৰ্ধাৰণ কৰিব পাৰে? উচ্চতম ন্যায়ালয়ৰ বিশেষ ক্ষমতা ৰাজ্যসমূহে কেন্দ্ৰৰ বিৰুদ্ধে ব্যৱহাৰ কৰিছেনে? কোনো ৰাজ্যপালৰ সিদ্ধান্তত ন্যায়পালিকাই আচলতে হস্তক্ষেপ কৰিব পাৰেনে? উচ্চতম ন্যায়ালয়ৰ ৰায়ৰ ফলত ৰাজ্যপাল বা ৰাষ্ট্ৰপতিৰ ক্ষমতা কৰ্তন হোৱা নাই নেকি?
বুধবাৰে উচ্চতম ন্যায়ালয়ৰ মুখ্য ন্যায়াধীশ হিচাপে শপত গ্ৰহণ কৰা ন্যায়াধীশ বি আৰ গাভাই, শপত গ্ৰহণৰ পিছতে এক কঠিন প্ৰত্যাহ্বানৰ সন্মুখীন হৈছে। প্ৰসংগ ক্ৰমে এতিয়া ৰাষ্ট্ৰপতিৰ প্ৰশ্নৰ উত্তৰ দিবলৈ তেওঁ সাংবিধানিক বিচাৰপীঠ গঠন কৰিব লাগিব। সেই সাংবিধানিক বিচাৰপীঠৰ সদস্যৰ সংখ্যা কমেও ৫ গৰাকী হ’ব লাগিব। মুখ্য ন্যায়াধীশে সেই সাংবিধানিক বিচাৰপীঠৰ পৰামৰ্শ অনুসৰি ৰাষ্ট্ৰপতিৰ প্ৰশ্নৰ উত্তৰ দিব।
