বিৰোধী কংগ্ৰেছ দলে বিজেপি নেতৃত্বাধীন চৰকাৰৰ অধীনত অসমৰ জনসাধাৰণে সন্মুখীন হোৱা অৰ্থনৈতিক দুৰ্দশাৰ ওপৰত গভীৰ অধ্যয়ন চলাই আছে। আগন্তুক দুমাহৰ ভিতৰত এক বিস্তৃত প্ৰতিবেদন প্ৰকাশ কৰাৰ পৰিকল্পনা কৰা হৈছে বুলি কংগ্ৰেছৰ এগৰাকী জ্যেষ্ঠ নেতাই জানিবলৈ দিয়ে।
নেতাগৰাকীয়ে কয় যে এই অধ্যয়নৰ লক্ষ্য হৈছে ৰাজ্যখনৰ অৰ্থনৈতিক দুৰ্দশাসমূহ মোকাবিলা কৰাৰ বাবে এক ৰোডমেপ প্ৰদান কৰা আৰু অহা বছৰ আগন্তুক বিধানসভা নিৰ্বাচনৰ বাবে ই দলটোৰ কৌশলৰ এক প্ৰধান আৰ্হি হ’ব।
নিখিল ভাৰত কংগ্ৰেছ কমিটীৰ ৰাষ্ট্ৰীয় মুখপাত্ৰ চৰণ সিং ছাপ্ৰাই শেহতীয়াকৈ এক সাক্ষাৎকাৰত বিজেপিৰ বহু প্ৰচাৰিত ‘ডাবল ইঞ্জিন চৰকাৰ’ক তীব্ৰ সমালোচনা কৰি ইয়াৰ পৰিৱৰ্তে অসমৰ বাবে ইয়াক ‘ট্ৰাবল ইঞ্জিন চৰকাৰ’ বুলি অভিহিত কৰে।
ছাপ্ৰাই অভিযোগ কৰে যে শাসকীয় দলটোৱে ৰাজ্যখনৰ জৰুৰী অৰ্থনৈতিক সমস্যাসমূহৰ সমাধান নকৰি মূলতঃ “মেৰুকৰণ”ৰ ওপৰত গুৰুত্ব আৰোপ কৰিছে।
ছাপ্ৰাই কয়, ‘অসমৰ মানুহৰ অৰ্থনৈতিক দুৰ্দশা আৰু ইয়াৰ সৈতে মোকাবিলা কৰাৰ সম্ভাৱ্য সমাধানৰ সৈতে জড়িত এক অধ্যয়ন চলি আছে। এবাৰ প্ৰকাশ পোৱাৰ পিছত ই চৰকাৰৰ বাবে ৰাজহ আহৰণৰ ভৱিষ্যতৰ ৰ’ডমেপো দাঙি ধৰিব।
ছাপ্ৰাই অসম চৰকাৰৰ হিতাধিকাৰী আঁচনিসমূহৰ সন্দৰ্ভতো উদ্বেগ প্ৰকাশ কৰি এই নগদ ধন ব্যায় সাপেক্ষ কাৰ্যসূচীসমূহৰ বিত্তীয় সাহায্যৰ বাবে লোৱা যথেষ্ট পৰিমাণৰ ঋণে ৰাজ্যখনৰ বিত্তীয় স্থিতিশীলতাৰ বাবে বিশেষকৈ ভৱিষ্যত প্ৰশাসনৰ বাবে যথেষ্ট বিপদৰ সৃষ্টি কৰে বুলি দৃঢ়তাৰে কয়।
“অনাগত সময়ছোৱাত এইটো এটা ডাঙৰ বিষয় হ’ব। প্ৰশ্ন হয়, অসমে এই বৃহৎ ঋণ চম্ভালিব পাৰিবনে? অহা দুমাহৰ ভিতৰত আমি অধ্যয়নৰ তথ্য লৈ ওলাই আহিম। অসমৰ জনসাধাৰণক আমি এক বিস্তৃত আৰু স্থায়িত্বপূৰ্ণ পৰিকল্পনা দিম।’
কংগ্ৰেছ নেতাগৰাকীয়ে অসম চৰকাৰৰ ২০২৪-২৫ বৰ্ষৰ অৰ্থনৈতিক জৰীপৰ প্ৰতিবেদনলৈ আঙুলিয়াই দিয়ে, য’ত ইংগিত পোৱা গৈছে যে ২০১৯-২০ চনৰ পৰা আৰম্ভ হোৱা তিনি বছৰত বাৰ্ষিক গড় ঋণ প্ৰায় ৭৮ শতাংশ বৃদ্ধি পাইছে।
প্ৰতিবেদনত পূৰ্বৰ তুলনাত যোৱা বিত্তীয় বৰ্ষত মুঠ ৰাজ্যিক ঘৰুৱা উৎপাদন (জি এছ ডি পি) আৰু জনমূৰি আয়ৰ বৃদ্ধিৰ মন্থৰতাও উল্লেখ কৰা হৈছে।
‘বিজেপিয়ে ইয়াক ডাবল ইঞ্জিন চৰকাৰ বুলি কয়। কিন্তু বাস্তৱত ই ট্ৰাবল ইঞ্জিন চৰকাৰ। তেওঁলোকৰ একমাত্ৰ মূলমন্ত্ৰ হ’ল মিছা কথাৰে মানুহক মেৰুকৰণ কৰা আৰু সাধাৰণ মানুহক প্ৰতাৰণা কৰা।’- ছাপ্ৰাই অভিযোগ কৰি কয়।
ছাপ্ৰাই লগতে দাবী কৰে যে বিজেপিৰ কামক সাৰাংশত “ঝুথ (মিছা), জুমলা আৰু জগলাৰী (ফোপদাং)” বুলি ক’ব পাৰি আৰু মুখ্যমন্ত্ৰী হিমন্ত বিশ্ব শৰ্মা এই কৌশলসমূহৰ “বিশেষজ্ঞ”।
ছাপ্ৰাই দৃঢ়তাৰে কয়, ‘বিজেপিৰ অৰ্থ হ’ল ভাৰতীয় ঝুথ পাৰ্টি, ভাৰতীয় জুমলা পাৰ্টি, আৰু ভাৰতীয় জগলাৰী পাৰ্টি। মেৰুকৰণ তেওঁলোকৰ মূল লক্ষ্য, কিন্তু ইয়াক প্ৰতিহত কৰিবলৈ আমাৰ কাৰ্য্য পৰিকল্পনা থাকিব।
ছাপ্ৰাই উল্লেখ কৰে যে, ‘এই সময়ৰ প্ৰয়োজনীয়তা হ’ল অহা বছৰৰ বিধানসভা নিৰ্বাচনত বিজেপিক পৰাস্ত কৰাৰ বাবে এক সন্মিলিত আৰু ধাৰাবাহিক প্ৰচেষ্টা চলোৱা। ইয়াত ১০ বছৰীয়া শাসন ব্যৱস্থাই বহু নেতিবাচকতাৰ সৃষ্টি কৰিছে। কংগ্ৰেছৰ সকলোৱে অসমৰ বাবে চিন্তিত আৰু কেন্দ্ৰীয় নেতৃত্বই ৰাজ্যখনক সৰ্বোচ্চ গুৰুত্ব দিছে।
ছাপ্ৰাই উল্লেখ কৰে যে কংগ্ৰেছ নেতা ৰাহুল গান্ধীয়ে দলৰ মতাদৰ্শ ৰক্ষাৰ ক্ষেত্ৰত ঐক্যৰ প্ৰয়োজনীয়তাৰ ওপৰত গুৰুত্ব আৰোপ কৰি অসমৰ গুৰুত্বপূৰ্ণ গোটৰ নেতাসকলৰ সৈতে বৈঠকত মিলিত হৈছে।
“সকলো জ্যেষ্ঠ নেতাই বাৰ্তাটো বুজি পাইছে আৰু এতিয়া একেলগে কাম কৰি আছে। কংগ্ৰেছৰ বক্তব্য আক্ৰমণাত্মক হোৱা উচিত আৰু ই মানুহৰ অনুভৱৰ লগত সংপৃক্ত হোৱা উচিত। মূল বিষয়টো হ’ব গৈ আছে দুৰ্নীতি, যিয়ে অসমৰ সাধাৰণ মানুহৰ দৈনন্দিন জীৱনত প্ৰভাৱ পেলাইছে।’
শেহতীয়া পঞ্চায়ত নিৰ্বাচনৰ সময়ত কংগ্ৰেছৰ টিকট বিতৰণত বিজেপিৰ দুৰ্নীতিৰ অভিযোগক সম্বোধন কৰি ছাপ্ৰাই সেইবোৰক “মিছা অভিযোগ” আৰু চৰিত্ৰহননৰ লক্ষ্যৰে “পৰিচালিত পৰিকল্পিত অভিযোগ” বুলি উপেক্ষা কৰি বিজেপিক “ছ’চিয়েল মিডিয়া নিষ্পেষণ বিশেষজ্ঞ” বুলি অভিযোগ কৰে।
