বিজেপিক ভোট নিদিলে বা অন্য দলৰ প্ৰাৰ্থীক সমৰ্থন কৰিলে চৰকাৰী আঁচনিৰ পৰা নাম কৰ্তন কৰি দিয়া হ’ব বুলি বিজেপিৰ নেতা-পালিনেতাই হিতাধিকাৰীসকলক ভাবুকি দি অহা বুলি বিভিন্ন সময়ত অভিযোগ উত্থাপন হৈছে। আনকি বিজেপি নেতাই বহু ভাষণত এনে কথা কোৱা শুনিবলৈ পোৱা গৈছে। এইবাৰ বিজেপি চৰকাৰ বিষয়ে এনে অভিযোগ উত্থাপন কৰিছে নাজিৰাৰ এগৰাকী মহিলাই। নাজিৰাৰ মনিষা বৰুৱা নামৰ এগৰাকী মহিলাই ইতিমধ্যে এই বিষয়টো অৱগত কৰি জিলা আয়ুক্তলৈ পত্ৰ লিখিছে। উল্লেখ্য যে মহিলাগৰাকীয়ে জিলা আয়ুক্তলৈ প্ৰেৰণ কৰা এই পত্ৰ প্ৰতিলিপি স্থানীয় বিধায়ক দেবব্ৰত শইকীয়ালৈকো প্ৰেৰণ কৰিছে।
মহিলাগৰাকীৰ অভিযোগ অনুসৰি, তেওঁ মুখ্যমন্ত্ৰী মহিলা উদ্যমিতা আঁচনিৰ অধীনত লাখপতি বাইদেউ আঁচনিৰ বাবে যথা সময়ত আবেদন কৰে। সেই সময়চোৱাত মহিলা আত্মসহায় গোটৰ সদস্য হিচাপে সকলো চৰকাৰী কার্য্যসূচীত অংশ গ্রহণ কৰাৰ উপৰিও গোটৰ প্রতিখন সভাতে নিয়মীয়াকৈ উপস্থিত থাকে মহিলাগৰাকী। মহিলাগৰাকীৰ আবেদন অনুসৰি মহিলা গৰাকীৰ নাম এই আঁচনিৰ তালিকাত অন্তৰ্ভুক্ত কৰা হয় আৰু তিনিটা স্তৰত হোৱা পৰীক্ষণৰ সময়ত ব্লক পর্য্যায়লৈকে বিভাগীয় ভাবে অনুমোদন জনোৱা হয়।
কিন্তু ইয়াৰ পৰৱৰ্তী সময়ত মনিষা বৰুৱা নামৰ দৰিদ্ৰ মহিলাগৰাকীয়ে জানিব পাৰে যে তেখেতৰ নামটো Block Level Scrutiny Committee এ কোনো ধৰণৰ যাৱতীয় পৰীক্ষণ নকৰাকৈ কর্তন কৰি দিছে।
মনিষা বৰুৱাই অভিযোগ কৰি জিলা আয়ুক্তলৈ লিখা পত্ৰখনত উল্লেখ কৰিছে, “ মোৰ নাম কর্তন কৰিলেও ৰাজ্য চৰকাৰৰ নিয়মাৱলী ভংগ কৰি ঘৰত বাছ-ট্রাক থকা অথবা নিজৰ নামত Income Tax ৰ ফাইল থকা মহিলাকো এই আঁচনিৰ বাবে বাচনি কৰিছে। আশাকৰো আপুনি মোৰ এই অভিযোগ গুৰুত্ব সহকাৰে ল’ব আৰু প্রয়োজনীয় তদন্ত সাপেক্ষে মোক মহিলা উদ্যমি হোৱাৰ সুযোগ দিব।”
এতিয়া জিলা আয়ুক্তই দৰিদ্ৰ লোকক প্ৰাপ্য সুবিধাৰ পৰা বঞ্চিত কৰা বিজেপিৰ নেতা-পালিনেতা সকলৰ বিৰুদ্ধে কি ব্যৱস্থা লয় সেয়া লক্ষনীয় হ’ব
