মাত্ৰ ২১ বছৰ বয়সতে কেন্দ্ৰীয় লোকসেৱা আয়োগৰ (UPSC) অসামৰিক সেৱা পৰীক্ষাত সৰ্বভাৰতীয় ৰেংক ৬১! কেৱল সেয়াই নহয়, প্ৰথম প্ৰচেষ্টাতে সফলতা আহিছিল, তাকো কোনো প্ৰশিক্ষণ নোহোৱাকৈ। একমাত্ৰ নিজৰ প্ৰস্তুতিত ভৰসা কৰিয়েই এই সাফল্য।
পঞ্জাৱৰ জিৰাকপুৰ নিবাসী আস্থা সিং। এই মুহূৰ্তত তেওঁৰ এই সফলতা কেৱল চণ্ডীগড় ত্ৰাইচিটি (চণ্ডীগড়, মোহলী আৰু পঞ্চকুলা)ৰ বাবেই নহয়, সমগ্ৰ দেশৰ নৱপ্ৰজন্মৰ বাবেও এক প্ৰেৰণা হৈ পৰিছে।
আস্থাই চৰকাৰী সেৱাৰ অভিজ্ঞতা লাভ কৰা এইটোৱেই প্ৰথম নহয়। ২০২৪ চনত আস্থাই প্ৰথম চৰকাৰী চাকৰিত যোগদান কৰে। সেই সময়ত হাৰিয়ানা লোকসেৱা আয়োগৰ পৰীক্ষাত ৩১ নং স্থান লাভ কৰি ‘অতিৰিক্ত আবকাৰী আৰু কৰ বিষয়া’ (AETO) হিচাপে নিযুক্তি লাভ কৰে। মাত্ৰ কেইমাহমান সেৱা আগবঢ়োৱাৰ পিছত তেওঁ ইউ পি এছ চিৰ পৰীক্ষাত বহিবলৈ সিদ্ধান্ত লয় আৰু প্ৰথম প্ৰচেষ্টাতে ক্লিয়াৰ কৰে।
আন সফল প্ৰাৰ্থীৰ দৰে তেওঁৰ হাতত দীঘলীয়া প্ৰস্তুতি আৰু কোচিং ক্লাছৰ কাহিনী নাই। আস্থাৰ ভাষাত, “মই কোনো কোচিং লোৱা নাছিলো। মই অনুভৱ কৰিছিলো যে অসামৰিক সেৱা মোৰ বাবে মোৰ পছন্দৰ কেৰিয়াৰ হ’ব পাৰে। গতিকে মই নিজাববীয়াকৈ পঢ়িবলৈ আৰম্ভ কৰিলোঁ। মই প্ৰথমবাৰে পৰীক্ষাত অৱতীৰ্ণ হৈছিলো।”
ভৱিষ্যতে মহিলাৰ উন্নতিৰ বাবে কিবা এটা কৰিব বিচাৰিছে বুলিও কয় আস্থাই। নাৰীৰ অধিকাৰ, বিভিন্ন সুযোগৰ প্ৰতি সজাগতা আৰু জীৱনৰ সিদ্ধান্ত নিজাববীয়াকৈ লোৱাৰ ওপৰত কাম কৰিব বিচাৰে। সমাজৰ অনুন্নত শ্ৰেণীৰ উন্নয়নত অধিক গুৰুত্ব দিব তেওঁ।
আস্থাৰ জন্ম পঞ্জাৱৰ পঞ্চকুলাত আৰু তাতেই তেওঁ ডাঙৰ-দীঘল হৈছিল। তেওঁৰ পিতৃ ব্ৰজেশ সিং বড্ডিৰ এটা ফাৰ্মাচিউটিকেল কোম্পানীৰ মেনেজাৰ আৰু মাতৃ শালিনী সিং এগৰাকী গৃহিণী। তেওঁলোকৰ পৰিয়ালৰ শিপা উত্তৰ প্ৰদেশৰ জৌনপুৰ জিলাৰ কুশাহা কনৌৰা গাঁৱৰ সৈতে সংযুক্ত।
দিল্লীৰ শ্ৰী ৰাম কলেজ অৱ কমাৰ্চ (এছ আৰ চি চি)ৰ পৰা অৰ্থনীতিত অনাৰ্চ লৈ উত্তীৰ্ণ হৈছে আস্থাই। ঘৰৰ প্ৰথমগৰাকী চৰকাৰী চাকৰিয়াল হ’বলৈ গৈ আছে আস্থা।
এইবাৰ ইউ পি এছ চি পৰীক্ষাত স্থান লাভ কৰা শীৰ্ষ ৩০০ পৰীক্ষাৰ্থীৰ ভিতৰত ত্ৰাইচিটি অঞ্চলৰ (চণ্ডীগড়, মোহালী, পঞ্চকুলা) ৰ পৰা যিকেইগৰাকীয়ে স্থান পাইছে তাৰে চাৰিগৰাকী মহিলা। আস্থা তাৰ ভিতৰত কনিষ্ঠতম।
