বিশ্বৰ ধনীতম ব্যক্তি ইলন মাস্কৰ সৈতে তেওঁৰ সম্পৰ্ক শেষ হোৱা বুলি প্ৰকাশ কৰিছে আমেৰিকাৰ ৰাষ্ট্ৰপতি ড’নাল্ড ট্ৰাম্পে। তেওঁ সম্পৰ্কটো আৰু পুনৰ জোৰা লগাব নিবিচাৰে।
শনিবাৰে এনবিচি নিউজৰ সৈতে হোৱা এক সাক্ষাৎকাৰত ট্ৰাম্পে এই কথা কয়। তেওঁক সোধা হৈছিল যে তেওঁলোকৰ ঘনিষ্ঠ সম্পৰ্ক শেষ হৈছে নেকি? তেওঁ উত্তৰ দিলে, “হয়, মই সেইটোৱে ধৰি লৈছো।”
মাস্কৰ সৈতে সম্পৰ্ক পুনৰ গঢ়িব বিচাৰে নেকি সেই প্ৰশ্নৰ উত্তৰত ট্ৰাম্পে স্পষ্টভাৱে কয় যে “নাই”। এই মন্তব্য ছ’চিয়েল মিডিয়াত মাস্কৰ সৈতে তেওঁৰ ৰাজহুৱা সংঘাতৰ শেহতীয়া বহিৰ্প্ৰকাশ।
টেছলা আৰু স্পেচএক্সৰ চিইঅ’ মাস্কে ট্ৰাম্পৰ আমেৰিকাৰ ৰাষ্ট্ৰপতি নিৰ্বাচনৰ প্ৰচাৰত কোটি কোটি টকাৰ অনুদান আগবঢ়ায়। ট্ৰাম্প ৰাষ্ট্ৰপতি হোৱাৰ পিছত তেওঁ হোৱাইট হাউছৰ উপদেষ্টা হিচাপে কাৰ্যনিৰ্বাহ কৰিছিল। শেহতীয়াকৈ তেওঁ ট্ৰাম্পৰ কৰ আৰু ব্যয়ৰ বিলক তীব্ৰ সমালোচনা কৰে।
শেহতীয়াকৈ মাস্কে ট্ৰাম্পৰ কৰ আৰু ব্যয়ৰ বিলক “নিকৃষ্ট” বুলি সমালোচনা কৰিছে। তেওঁৰ মন্তব্যৰ উত্তৰত ট্ৰাম্পে অ’ভেল অফিচত সাংবাদিকৰ আগত কয়, “চাওক, ইলনৰ সৈতে মোৰ বহুত ভাল সম্পৰ্ক আছিল। সেইটো থাকিব নে নাথাকিব মই নাজানো।’
মাস্ক সন্দৰ্ভত এক প্ৰশ্নৰ উত্তৰত ট্ৰাম্পে কয়, ‘মই বহুত হতাশ। কাৰণ এই বিলখনৰ ভিতৰৰ কথা তেওঁ ইয়াত থকা আন সকলোতকৈ ভালকৈ জানিছিল। হঠাতে তেওঁৰ ইয়াক লৈ সমস্যা হৈছে।’ অৱশ্যে মাস্কে ট্ৰাম্পৰ এই দাবীক মিছা বুলি খাৰিজ কৰে।
ট্ৰাম্পৰ এই বক্তব্যৰ পিছত মাস্কে ছ’চিয়েল মিডিয়া এক্সত কেইবাটাও পোষ্ট কৰিছিল।এই পোষ্টবোৰত তেওঁ ব্যক্তিগতভাৱে ট্ৰাম্পক আক্ৰমণ কৰিবলৈ কুণ্ঠাবোধ কৰা নাছিল। যদিও তেওঁ প্ৰমাণ নিদিলে, মাস্কে দাবী কৰে যে ট্ৰাম্প ‘এপষ্টেইন ফাইল’তো আছে।
শনিবাৰে এনবিচিৰ সৈতে হোৱা এক সাক্ষাৎকাৰত ট্ৰাম্পে কয় যে মাস্কে ৰাষ্ট্ৰপতিৰ কাৰ্যালয়ৰ প্ৰতি অসন্মানজনক আচৰণ কৰিছে।
