কেৰালাৰ উপকূলত ছিংগাপুৰৰ জাহাজত সংঘটিত হৈছে বিস্ফোৰণ। এই খবৰ পোৱাৰ পিছতে ততাতৈয়াকৈ সেই স্থানত উপস্থিত হয় ভাৰতীয় নৌসেনা। ঘটনাস্থলীত উপস্থিত হয় ভাৰতীয় যুদ্ধ জাহাজ INS Surat। নৌসেনাৰ বিমানো প্ৰেৰণ কৰা হৈছে বুলি জানিব পৰা গৈছে।
সোমবাৰে পুৱা সংঘটিত হয় এই ঘটনা। বিস্ফোৰণ হোৱা ছিংগাপুৰৰ মালবাহী জাহাজখনৰ নাম হৈছে এম ভি ৱান হাই ৫০৩। সংবাদ সংস্থা পিটিআইয়ে প্ৰকাশ কৰা তথ্য অনুসৰি ২৭০ মিটাৰ দৈৰ্ঘ্যৰ এই জাহাজখনে শ্ৰীলংকাৰ কলম্বোৰ পৰা ৭ জুনত মুম্বাইলৈ গৈছিল। ১০ জুনত অৰ্থাৎ মঙলবাৰে তাত উপস্থিত হোৱাৰ কথা আছিল। ইয়াৰ পূৰ্বে কেৰালাৰ উপকূলৰ ওচৰত সংঘটিত হৈছিল এই বিস্ফোৰণ।
প্ৰতিৰক্ষা মন্ত্ৰালয়ৰ এগৰাকী বিষয়াই জনোৱা মতে, সোমবাৰে পুৱা ১০:৩০ বজাত ছিংগাপুৰৰ জাহাজখনত সংঘটিত হোৱা বিস্ফোৰণৰ তথ্য মুম্বাইৰ মেৰিটাইম অপাৰেচন চেণ্টাৰে লাভ কৰে। এই সন্দৰ্ভত তেওঁলোকে কোচিৰ কাৰ্যালয়ক অৱগত কৰে। ইয়াৰ পিছত ভাৰতীয় নৌসেনাই তাৎক্ষণিক ব্যৱস্থা গ্ৰহণ কৰে।
প্ৰতিৰক্ষা মন্ত্ৰালয়ে জনোৱা মতে, তথ্য লাভ কৰাৰ লগে লগে ভাৰতীয় যুদ্ধ জাহাজ আই এন এছ ছুৰাটক সেই স্থানলৈ প্ৰেৰণ কৰা হয়। তদুপৰি কোচি নৌসেনাৰ ঘাটিৰ পৰা এখন নৌসেনাৰ বিমানো সেই স্থানলৈ প্ৰেৰণ কৰা হয়। এই নৌসেনাৰ বিমানখনক সমগ্ৰ পৰিস্থিতি নিৰীক্ষণ কৰিবলৈ আৰু প্ৰয়োজন হ’লে উদ্ধাৰ অভিযানত সহায় কৰিবলৈ প্ৰেৰণ কৰা হৈছে বুলি প্ৰতিৰক্ষা মন্ত্ৰালয়ে জানিবলৈ দিয়ে।
