যোৱা ১১ বছৰত ভাৰতত চৰম দৰিদ্ৰতাৰ হাৰ ২১.৮ শতাংশ হ্ৰাস পাইছে। ২০১১-১২ চনত চৰম দৰিদ্ৰতাৰ হাৰ আছিল ২৭.১ শতাংশ, যিটো ২০২২-২৩ চনত ৫.৩ শতাংশলৈ হ্ৰাস পাইছে। বিশ্ব বেংকৰ শেহতীয়া তথ্যত এই কথা প্ৰকাশ পাইছে।
ভাৰত চৰকাৰৰ কেইবাটাও কল্যাণমূলক নীতিৰ বাবে এই চৰম দৰিদ্ৰতাৰ হাৰ হ্ৰাস পাইছে বুলি প্ৰকাশ কৰিছে বিশ্ব বেংকে। এই সন্দৰ্ভত প্ৰধানমন্ত্ৰী মোদীয়ে তেওঁৰ চৰকাৰক প্ৰশংসা কৰি কয়- সৱলীকৰণৰ জৰিয়তে আমি কেৱল দৰিদ্ৰতা দূৰ কৰাই নহয়, দৰিদ্ৰৰ মৰ্যাদা আৰু সুযোগো পুনৰ ঘূৰাই আনিছো।
বিশ্ব বেংকৰ তথ্য অনুসৰি ২০১১-১২ চনত ভাৰতৰ ৩৪ কোটিতকৈ অধিক লোক চৰম দৰিদ্ৰ সীমাৰেখাৰ তলত আছিল। ২০২২-২৩ চনত এই সংখ্যা ৭.৫ কোটিতকৈ অলপ বেছিলৈ হ্ৰাস পাইছে। অৰ্থাৎ মাত্ৰ ১১ বছৰত প্ৰায় ২৭ কোটি লোক চৰম দৰিদ্ৰতাৰ পৰা মুক্ত হৈছে।
বিশ্ব বেংকে কয় যে উত্তৰ প্ৰদেশ, মহাৰাষ্ট্ৰ, বিহাৰ, পশ্চিম বংগ আৰু মধ্যপ্ৰদেশ ৰাজ্যই এই অগ্ৰগতিৰ ক্ষেত্ৰত মুখ্য ভূমিকা গ্ৰহণ কৰিছে। এই পাঁচখন ৰাজ্যই মিলি চৰম দৰিদ্ৰতা হ্ৰাসৰ কমেও দুই তৃতীয়াংশ অৰিহণা যোগাইছে।
দৰিদ্ৰতা হ্ৰাস পোৱাটো গ্ৰাম্য আৰু চহৰ দুয়োখন অঞ্চলতে স্পষ্ট হৈ পৰিছে। ২০১১-১২ চনৰ পৰা ২০২২-২৩ চনৰ ভিতৰত গ্ৰাম্য অঞ্চলৰ চৰম দৰিদ্ৰতা ১৮.৪ শতাংশৰ পৰা ২.৮ শতাংশলৈ হ্ৰাস পাইছে, আৰু চহৰৰ চৰম দৰিদ্ৰতা ১০.৭ শতাংশৰ পৰা মাত্ৰ ১.১ শতাংশলৈ হ্ৰাস পাইছে।বিশ্ব বেংকে আন্তঃৰাষ্ট্ৰীয় দৰিদ্ৰ সীমাৰেখা প্ৰতিদিনে ২.১৫ ডলাৰ (২০১৭ চনৰ মূল্যত) নিৰ্ধাৰণ কৰিছে। এই স্কেলত ২০২২ চনত ভাৰতত দৰিদ্ৰ সীমাৰেখাৰ তলত বাস কৰা লোকৰ সংখ্যা আছিল ৩৩.৬৬ মিলিয়ন, যিটো ২০১১ চনত ২০৫.৯৩ মিলিয়ন আছিল।
