বিশ্ব ৰাজনীতিত পুনৰ উত্তেজনাময় পৰিস্থিতিৰ সূচনা হৈছে। শেহতীয়াকৈ ৰাছিয়াৰ ৰাষ্ট্ৰপতি ভ্লাদিমিৰ পুটিনে ঘোষণা কৰিছে যে মস্কোৱে ইৰাণক ইউৰেনিয়াম সমৃদ্ধিৰ ক্ষেত্ৰত সহায় আগবঢ়াইছে আৰু আগলৈও সহযোগিতা অব্যাহত ৰাখিব। ইজৰাইল-ইৰাণৰ মাজত উদ্ভৱ হোৱা সংকটৰ পটভূমিত এই ঘোষণাই বিশ্বত উদ্বেগৰ সৃষ্টি কৰিছে।
ৰাছিয়াৰ সংবাদ মাধ্যমৰ আগত পুটিনে স্পষ্টভাৱে কয় – “আমি আমাৰ ইৰাণী অংশীদাৰৰ সৈতে নিয়মীয়াকৈ যোগাযোগ কৰি আছো। ইৰাণৰ বুশ্বেহৰ চহৰত প্ৰায় ৬০০ ৰাছিয়ান বিশেষজ্ঞ কাৰ্যৰত আছে। আমি এই কাৰ্যসূচী পৰিত্যাগ কৰা নাই।”
পুটিনে লগতে জানিবলৈ দিয়ে যে ইৰাণে ৰাছিয়াৰ পৰা কোনো নতুন সহায় বিচাৰিছে বুলি নহয়, কিন্তু ৰাছিয়া নিজেই শান্তিপূৰ্ণ উদ্দেশ্যৰে সহায় আগবঢ়াইছে। তেখেতে ইজৰাইল আৰু ইৰাণৰ মাজত চলি থকা উত্তেজনাৰ মাজত শান্তি প্ৰতিষ্ঠাৰ উদ্দেশ্যে ক্ৰেমলিনক মধ্যস্থতাৰ প্ৰস্তাৱো আগবঢ়ায়। তেওঁ কয় – “ইৰাণ আৰু ইজৰাইলে ইচ্ছা কৰিলে শান্তিচুক্তিত উপনীত হ’ব পাৰে, য’ত ইৰাণে শান্তিপূৰ্ণ কাৰ্যসূচী অব্যাহত ৰাখিব আৰু ইজৰাইলৰ নিৰাপত্তাও নিশ্চিত হ’ব।”
এই ঘটনাৰ প্ৰতি লক্ষ্য ৰাখি ৰাছিয়াই আমেৰিকা আৰু ইজৰাইলৰ সৈতে আলোচনাও আৰম্ভ কৰিছে বুলি পুটিনে সদৰী কৰে। লগতে ইৰাণকো শান্তিচুক্তিৰ প্ৰস্তাৱ দিয়া হৈছে।
ইয়াৰ মাজতে স্পষ্ট হৈ পৰিছে যে ইৰাণ আৰু ইজৰাইলৰ মাজৰ বৈৰিতা কেৱল ৰাজনৈতিক নহয়, বৰং ধৰ্মীয় আৰু সাংস্কৃতিক গভীৰতাও বহন কৰে। ইজৰাইল আৰু পশ্চিমী বিশ্বই সন্দেহ কৰিছে যে ইৰাণে শান্তিপূৰ্ণ উদ্দেশ্যৰ নামত গোপনে পাৰমাণৱিক অস্ত্ৰ উন্নয়নৰ দিশে আগবাঢ়ি আছে। যদিও সকলোৰে সন্মুখত তেহৰানে দাবী কৰিছে যে তেওঁলোকে মানৱীয় কল্যাণ আৰু বিদ্যুৎ উৎপাদনৰ বাবে ইউৰেনিয়ামৰ মজুত বৃদ্ধি কৰিছে। ৰাছিয়াৰ মুখতো একে সুৰ শুনা যায়। তেওঁলোকে দাবী কৰে যে মস্কো ইৰাণৰ শান্তিপূৰ্ণ পাৰমাণৱিক কাৰ্যসূচীৰ অংশীদাৰ। অৱশ্যে আমেৰিকাই তেওঁলোকৰ দাবী মানি ল’বলৈ অনিচ্ছুক। স্পষ্টভাৱে উল্লেখ কৰা হৈছে যে তেওঁলোক ইৰাণৰ পাৰমাণৱিক শক্তিৰ মজুত বৃদ্ধিৰ পৰিকল্পনাৰ বিৰোধী। যদি প্ৰয়োজন হ’য় আমেৰিকাই আক্ৰমণ কৰিব বুলি সকীয়াই দিছে।
