অসমত বৃদ্ধি পাইছে বিদ্যুতৰ চাহিদা। এনে পৰিপ্ৰেক্ষিতত, এনএইচপিচিৰ নামনি সোৱণশিৰি জলবিদ্যুৎ প্ৰকল্পটোক চৰকাৰে এক ডাঙৰ সাফল্য হিচাপে বিবেচনা কৰিছিল, কিন্তু বাস্তৱত এই প্ৰকল্পই অসমক ক্ষতি হে কৰিছে। তথাপি অসমে যিমান পৰিমাণৰ বিদ্যুৎ ক্ৰয় কৰিবলৈ আগ্ৰহী আছিল, সেয়াও পূৰ্ণ নহ’ল।
উল্লেখ্য যে অৰুণাচলৰ ভূমিত নিৰ্মিত এই প্ৰকল্পৰ পৰিণাম অসমে ভুগিব লাগিব। সেয়ে এই প্ৰকল্পটোক বন্ধ কৰাৰ দাবীত দলসংঠন তথা স্থানীয় ৰাইজে তীব্ৰ প্ৰতিবাদ কৰি অহিছে। অসমক যিহেতু এই প্ৰকল্পই বিপদৰ মুখলৈ ঠেলি দিছে, তেনে পৰিস্থিতিত অসমক বিনামূলীয়াকৈ বিদ্যুৎ প্ৰদান কৰাৰ দাবী উত্থাপন হৈচে। কিন্তু এই দাবীক এন এইচ পি চি কর্তৃপক্ষ কোনো গুৰুত্ব নিদি অসমক কেৱল ক্রেতা ৰাজ্য হিচাপে বিবেচনা কৰিছে।
জানিব পৰা মতে এপিডিচিএলে ইতিমধ্যে এই প্ৰকল্পৰ পৰা বছৰি ২০৮ মেগাৱাট বিদ্যুৎ ক্ৰয় কৰাৰ চুক্তি সম্পন্ন কৰিছে। এই চুক্তিৰ অধীনত, অসমত চাহিদা অনুসৰি বিদ্যুৎ যোগান ধৰিবৰ বাবে এপিডিচিএলে বিভিন্ন উৎসৰ লগত চুক্তি কৰিছে। বৰ্তমান অসমৰ বিদ্যুৎ চাহিদা ২৮ শ মেগাৱাট বৃদ্ধি হৈছে আৰু আগন্তুক সময়ত এই পৰিমাণ অধিক বৃদ্ধি হ’ব বুলি উল্লেখ কৰিছে।
প্ৰসংগ ক্ৰমে নামনি সোৱণশিৰি জলবিদ্যুৎ প্ৰকল্পৰ পৰা দৈনিক উৎপাদিত বিদ্যুতৰ পৰিমাণ ২,০০০ মেগাৱাটৰ ওপৰলৈ যাব, যদিও অসমক মাত্ৰ ২০৮ মেগাৱাট বিদ্যুৎ বিক্ৰী হ’ব। ২০২৬ চনৰ পৰা ই কাৰ্যকৰী হ’ব কিয়নো সেই বছৰত প্ৰকল্পটোৰ পূৰ্ণাঙ্গ কার্যক্ষম হোৱা বুলি আশা কৰা হৈছে। অৱশ্যে বিদ্যুৎ উৎপাদন আৰম্ভ কৰিবলৈ ৰাষ্ট্ৰীয় বান্ধ সুৰক্ষা প্ৰাধিকৰণৰ পৰা অনুমতিৰ প্ৰয়োজন, সেই অনুমতি এতিয়ালৈকে লাভ কৰা হোৱা নাই।
