এক অভূতপূৰ্ব কেলেংকাৰীয়ে কঁপাই তুলিছে থাইলেণ্ডৰ বৌদ্ধ সম্প্ৰদায়ক। ‘মিছ গ’ল্ফ’ নামেৰে পৰিচিত উইলাৱান মছাৱাট নামৰ এগৰাকী ৩০ বছৰীয়া মহিলাৰ বিৰুদ্ধে কমেও ৯ জন প্ৰভাৱশালী বৌদ্ধ সন্ন্যাসীৰ সৈতে যৌন সম্পৰ্ক স্থাপন কৰি তাৰ পিছত তেওঁলোকৰ সম্পৰ্কৰ অশ্লীল ফটো আৰু ভিডিঅ’ৰে ব্লেকমেইল কৰাৰ অভিযোগ উত্থাপন হৈছে।
সুন্দৰীৰ ফান্দত পৰি ইটোৰ পিছত সিটো মন্দিৰৰ গোপন ধন আত্মসাৎ কৰা বুলি তদন্তত জানিব পৰা গৈছে। বেংককৰ এজন প্ৰসিদ্ধ উচ্চ পদস্থ সন্ন্যাসীয়ে হঠাতে মঠৰ জীৱন এৰি যোৱাৰ পৰাই এই ঘটনা আৰম্ভ হয়। তদন্তত প্ৰকাশ পাইছে যে উইলাৱানে তেওঁক ভুৱা গৰ্ভধাৰণৰ কথা জনাই তেওঁৰ পৰা ৭২ লাখ থাই বাট (প্ৰায় ২.২২ মিলিয়ন ডলাৰ) দাবী কৰিছিল। এই মানসিক চাপত সন্ন্যাসীয়ে মঠৰ জীৱন এৰি থৈ গ’ল। তেতিয়াই আৰক্ষী সন্দেহ ওপজে আৰু তদন্ত আৰম্ভ হ’ল।
তদন্তত চাঞ্চল্যকৰ তথ্য পোহৰলৈ আহিছে। আৰক্ষীয়ে উইলাৱানৰ ঘৰত তালাচী চলাই ৮০ হাজাৰতকৈ অধিক পৰ্ণগ্ৰাফিক ফটো আৰু ভিডিঅ’ উদ্ধাৰ কৰে, যাৰ অধিকাংশই আছিল দেশৰ বিভিন্ন প্ৰান্তৰ মঠত কাম কৰা সন্ন্যাসীসকলৰ সৈতে তেওঁৰ শাৰীৰিক সম্পৰ্কৰ প্ৰমাণ। এই ভিডিঅ’ আৰু ফটোবোৰ ব্যৱহাৰ কৰি তেওঁ ধন দাবী কৰিছিল।
আৰক্ষীয়ে দাবী কৰিছে যে তেওঁ কমেও ৩৮৫ মিলিয়ন থাই বাট (প্ৰায় ১১.৯ মিলিয়ন ডলাৰ) আত্মসাৎ কৰিছিল, যাৰ বহুখিনি মন্দিৰৰ অনুদান বাকচৰ পৰা আহিছিল। উত্তৰ থাইলেণ্ডৰ এটা বিখ্যাত মঠৰ সমগ্ৰ বেংক বেলেঞ্চ উইলাৱানৰ একাউণ্টলৈ ট্ৰেন্সফাৰ হোৱা বুলিও খবৰ ওলাইছে।
আচৰিত কথাটো হ’ল এই বৃহৎ পৰিমাণৰ ধনৰ অধিকাংশই অনলাইন জুৱা চাইটলৈ গৈছিল। অভিযুক্ত মহিলাগৰাকীয়ে মূলতঃ ছ’চিয়েল মিডিয়াত সন্ন্যাসীসকলৰ সৈতে যোগাযোগ কৰি ক্ৰমান্বয়ে প্ৰেমৰ সম্পৰ্ক গঢ়ি তুলিছিল আৰু তাৰ পিছত ধন দাবী কৰিছিল।
এজন সন্ন্যাসীয়ে কৈছে যে উইলাৱানৰ সৈতে তেওঁৰ দীৰ্ঘদিনীয়া সম্পৰ্ক আছিল আৰু আনকি তেওঁৰ পৰা এখন গাড়ীও পাইছিল। পিছত যেতিয়া তেওঁ গম পালে যে উইলাৱান আন এজন সন্ন্যাসীৰ সৈতেও জড়িত হৈছে, তেতিয়াই সম্পৰ্কৰ অৱনতি ঘটে আৰু ব্লেকমেইল আৰম্ভ হ’ল।
এই কাণ্ডৰ পিছতে থাইলেণ্ডৰ ৰজা মহা বাজিৰালংকৰ্ণে এই কাণ্ডত সমগ্ৰ দেশৰ বৌদ্ধ সম্প্ৰদায়ৰ যি “গভীৰ ক্ষতি আৰু লজ্জা” হৈছে তাৰ অপৰাধত ৮১ জন সন্ন্যাসীৰ ৰাজকীয় উপাধি কাঢ়ি লয়।
ভাৰপ্ৰাপ্ত প্ৰধানমন্ত্ৰী ফুমথাম উইচাচাইয়ে ইতিমধ্যে জৰুৰী সংস্কাৰৰ কথা ঘোষণা কৰিছে। এই ব্যৱস্থাসমূহৰ ভিতৰত আছে মন্দিৰৰ বিত্তীয় ব্যৱস্থাৰ ওপৰত নিৰীক্ষণ বৃদ্ধি, সন্ন্যাসীসকলৰ বাবে কঠোৰ নিয়ম আৰু অভিযোগ দাখিল কৰিব পৰাকৈ ফেচবুক হটলাইন খোলা। থাইলেণ্ডৰ সৰ্বোচ্চ ধৰ্মীয় সংস্থা সংঘ উচ্চতম পৰিষদে মঠ পৰিচালনাৰ ক্ষেত্ৰত নতুন নিয়ম প্ৰৱৰ্তন কৰিবলৈ সাজু হৈছে আৰু বিশেষ তদন্ত সমিতি গঠন কৰা হৈছে।
আৰক্ষীয়ে জনোৱা মতে, উইলাৱানৰ ফোনত আন বহু সন্ন্যাসীৰ নাম পোৱা গৈছে আৰু তেওঁলোকৰ বিৰুদ্ধে তদন্ত আৰম্ভ কৰা হৈছে। উইলাৱানৰ বিৰুদ্ধে ধন সৰবৰাহ, ব্লেকমেইল, জালিয়াতি আৰু প্ৰতাৰণাৰ অভিযোগ উত্থাপন হৈছে।
এই ঘটনাৰ ফলত থাইলেণ্ডৰ বহু লোকে বৌদ্ধ সন্ন্যাসীৰ ওপৰত বিশ্বাস হেৰুৱাই পেলাইছে। বহুতে ছ’চিয়েল মিডিয়াত সুধিছে, “এতিয়া সন্যাস কেৱল পোছাকৰ বিষয় নেকি?” আন এজনে লিখিছে, “মই গোটেই জীৱন যিসকলৰ পৰা পৰামৰ্শ লৈছো তেওঁলোক নিজেই চৰিত্ৰহীন!”
এই হানী ট্ৰেপ কাণ্ডটো কেৱল এগৰাকী নাৰীৰ ফান্দ নহয়, বৌদ্ধ মঠৰ ভিতৰত নিয়ন্ত্ৰণহীন ক্ষমতা আৰু অৰ্থনৈতিক দুৰ্নীতিৰ এক নগ্ন উদাহৰণ হৈ পৰিছে। থাইলেণ্ডৰ ধৰ্ম আৰু নৈতিকতাক লৈ এতিয়া সমগ্ৰ দেশখনে প্ৰশ্নৰ সন্মুখীন হৈছে।
