অসম প্ৰদেশ কংগ্ৰেছৰ সভাপতি তথা লোকসভাৰ বিৰোধী দলৰ উপ-দলপতি গৌৰৱ গগৈয়ে দেওবাৰে প্ৰধানমন্ত্ৰী নৰেন্দ্ৰ মোডীক সোমবাৰৰ পৰা আৰম্ভ হ’বলগীয়া সংসদৰ বৰ্ষাকালীন অধিৱেশনত দেশৰ জৰুৰী বিষয়সমূহ প্ৰত্যক্ষভাৱে সম্বোধন কৰিবলৈ আহ্বান জনায়।
গগৈয়ে পেহেলগাম সন্ত্ৰাসবাদী আক্ৰমণক কেন্দ্ৰ কৰি হোৱা গাফিলতিৰ লগতে তদানীন্তন লেফটেনেণ্ট গৱৰ্ণৰৰ মন্তব্য সন্দৰ্ভত সংসদত বক্তব্য দিবলৈ চৰকাৰক আহ্বান জনায়। তেওঁ কয়, ‘বহু সময় পাৰ হৈ গ’ল, এই অতি গুৰুত্বপূৰ্ণ বিষয়টোৰ ওপৰত চৰকাৰে নিজৰ বক্তব্য দিব লাগিব।’
তেওঁ জোৰ দি কয় যে ধাৰাবাহিকভাৱে গুৰুতৰ ঘটনা সংঘটিত হোৱাৰ পিছত দেশে চৰকাৰৰ পৰা স্পষ্ট আৰু অৰ্থপূৰ্ণ উত্তৰ আশা কৰে। গগৈয়ে কয়, ‘’প্ৰধানমন্ত্ৰীয়ে এই অধিৱেশনত সংসদত অধিক সময় কটাব আৰু ৰাইজৰ সৈতে পোনপটীয়াকৈ কথা পাতিব বুলি আমি আশা কৰিছো।’’
তেওঁ মূল চিন্তাৰ বিষয়সমূহৰ ওপৰত আলোকপাত কৰি গগৈয়ে জৰুৰী মনোযোগৰ প্ৰয়োজনীয় তিনিটা ডাঙৰ দিশৰ ৰূপৰেখা দাঙি ধৰে আৰু চীন, পাকিস্তান আৰু বাংলাদেশৰ সৈতে ভাৰতৰ সীমান্ত সন্দৰ্ভত সেনাবাহিনীৰ জ্যেষ্ঠ বিষয়াসকলে উত্থাপন কৰা সতৰ্কতামূলক উদ্বেগৰ কথা উল্লেখ কৰে।
ভাৰতৰ সামৰিক শক্তিক লৈ প্ৰশ্ন উত্থাপন কৰি আমেৰিকাৰ ৰাষ্ট্ৰপতি ড’নাল্ড ট্ৰাম্পৰ পূৰ্বৰ মন্তব্যক সমালোচনা কৰি তেওঁ জোৰ দি কয় যে মন্ত্ৰী বা প্ৰেছ বিবৃতি নহয়, কেৱল প্ৰধানমন্ত্ৰীয়েহে ইয়াৰ সঠিক উত্তৰ দিব পাৰে। তেওঁ পূৰ্বৰ অধিবেশনত কংগ্ৰেছে দাবী কৰা প্ৰতিৰক্ষা আৰু বৈদেশিক নীতিৰ ওপৰতো বিশদ আলোচনাৰ আহ্বান জনায়।
গগৈয়ে নাগৰিকৰ ভোটাধিকাৰক লৈ উদ্বেগ প্ৰকাশ কৰি নিৰ্বাচন আয়োগে ৰাজনৈতিক দলৰ সৈতে আলোচনা আওকান কৰি স্বচ্ছতা প্ৰদান নকৰাৰ অভিযোগ উত্থাপন কৰে। তেওঁ কয়, ‘সংবিধানৰ নিৰ্মাতাসকলে কল্পনা কৰা নিৰপেক্ষ নিৰ্বাচন আয়োগৰ সপোন বিঘ্নিত হোৱা যেন লাগে।’ তেওঁ আয়োগৰ কাম-কাজ সন্দৰ্ভত চৰকাৰৰ স্থিতি স্পষ্ট কৰিবলৈ প্ৰধানমন্ত্ৰীক দাবী জনায়।
এবছৰতকৈও অধিক সময় ধৰি হিংসাত্মক পৰিস্থিতি অব্যাহত থকা মণিপুৰত দীৰ্ঘদিন ধৰি চলি থকা গোষ্ঠীগত সংঘাতক লৈ গগৈয়ে গভীৰ উদ্বেগ প্ৰকাশ কৰে। হিংসাত্মক পৰিস্থিতিত আক্ৰান্ত উত্তৰ-পূবৰ ৰাজ্যখন ভ্ৰমণৰ পৰা আঁতৰি থকাৰ লগতে বিশ্ব ভ্ৰমণৰ বাবে মোডীৰ আগ্ৰহক সমালোচনা কৰি তেওঁ কয়, ‘প্ৰধানমন্ত্ৰীয়ে প্ৰতিশ্ৰুতি দিছিল যে অতি সোনকালে শান্তি ঘূৰি আহিব। সেই প্ৰতিশ্ৰুতি এতিয়াও পূৰণ হোৱা নাই।’
গগৈয়ে ৰাজনৈতিক মতাদৰ্শ নিৰ্বিশেষে সশস্ত্ৰ বাহিনীক সমৰ্থন কৰাৰ ক্ষেত্ৰত ঐক্যৰ প্ৰয়োজনীয়তাৰ ওপৰত গুৰুত্ব আৰোপ কৰে। তেওঁ লগতে কয়, ‘পাকিস্তানৰ সৈতে বিগত সংঘাতৰ সময়ত আমি যেনেকৈ ঐক্যবদ্ধভাৱে থিয় দিছিলো, আমি সংসদত আমাৰ সৈন্যসকলক সমৰ্থন কৰিবলৈ পুনৰ একত্ৰিত হ’ব লাগিব।’
জবাবদিহিতা, স্বচ্ছত আৰু নেতৃত্বৰ আহ্বান জনাই গগৈয়ে শেষত কয়, “আমি আশা কৰোঁ এই অধিবেশনে জনসাধাৰণৰ বাবে আটাইতকৈ গুৰুত্বপূৰ্ণ বিষয়সমূহৰ ওপৰত অৰ্থপূৰ্ণ আৰু গঠনমূলক বিতৰ্কৰ সুবিধা প্ৰদান কৰিব।”
