বিজেপিৰ আমোলত অসমত ৰকেট গতিত বাঢ়িছে আদানিৰ সাম্ৰাজ্য। বিজেপিৰ “বন্ধু” বুলি সততে অভিযোগ উত্থাপিত আদানি গ্ৰুপৰ এৰ’চিটি নিৰ্মাণৰ বাবে লোকপ্রিয় গোপীনাথ বৰদলৈ আন্তঃর্জাতিক বিমান বন্দৰৰ সমীপত হিমন্ত বিশ্ব শৰ্মা চৰকাৰে অধিগ্রহণ কৰিব ১,১১৬ টা পৰিয়ালৰ ৪১০ বিঘা ভূমি। আজি সংবাদমেলযোগে এই তথ্য দাঙি ধৰে ৰাইজৰ দলৰ নেতা ভাস্কো ডি শইকীয়াই।
সংবাদমেলত শইকীয়াই জনোৱা মতে, ইতিমধ্যে ভূমি অধিগ্ৰহণৰ জাননী জাৰি কৰা হৈ গৈছে। বিমান বন্দৰৰ সমীপৰ ৩ খন গাঁও আজাৰা, মির্জাপুৰ আৰু গৰলত অধিগ্ৰহণ কৰা হ’ব আদানিৰ এৰ’চিটিৰ বাবে এই বিশাল পৰিমাণৰ ভূমি। মির্জাপুৰত ২৫৭ বিঘা ৯১.৫ লেচা, আজাৰাত ৮৩ বিঘা ৪ কঠা ১৫ লেচা আৰু গৰলত ৭০ বিঘা, ১৬ লেচা ভূমি অধিগ্রহণৰ বাবে যো-জা চলোৱা হৈছে।
এই ক্ষেত্রত তাৎপর্যপূর্ণ কথাটো হ’ল যে এই তিনিখন গাঁৱৰ ৰাইজৰ মাটি এতিয়ালৈকে বিমান বন্দৰৰ বাবে চাৰিবাৰ পৰ্যন্ত অধিগ্রহণ কৰা হৈছে। এতিয়া বহু পৰিয়ালৰ কেৱল ভেটি মাটিহে আছে। এইবাৰ এৰ’চিটিৰ নামত অধিগ্রহণ হ’লে বহু পৰিয়ালে হেৰুৱাব নিজৰ ভেটি মাটিও।
কেৱল এই তিনিখন গাঁৱৰ মাটিয়েই নহয় আৰু অন্য মাটিও পৰৱৰ্তী সময়ত অধিগ্রহণ হোৱাৰ পূৰ্ণ সম্ভাৱনা আছে। কিয়নো ২০১৭ চনতে ভাৰত চৰকাৰে এৰ’চিটি নিৰ্মাণৰ বাবে ২,০০০ একৰ মাটি অসম চৰকাৰক বিচাৰিছিল অর্থাৎ, ৩,২২০ বিঘা মাটি।
সমষ্টি পুনৰ নিৰ্দ্ধাৰণৰ পিছত আজাৰা ৰাজহ চক্ৰৰ অধীনৰ অঞ্চল জালুকবাৰী সমষ্টিৰ অন্তর্ভুক্ত হৈছে। দ্রুতগতিত উন্নয়ন হৈ থকা অঞ্চলটো কৌশলৰে মুখ্যমন্ত্রী হিমন্ত বিশ্ব শৰ্মাই নিজৰ সমষ্টিৰ অন্তৰ্ভুক্ত কৰি লোবাৰ সম্ভাবনাই প্রবল। কিন্তু যি সময়ত মুখ্যমন্ত্রীগৰাকীয়ে জাতি-মাটি-ভেটি ৰক্ষাৰ কথা কৈ আছে, সেই সময়ত মুখ্যমন্ত্রী হিমন্ত বিশ্ব শর্মাই নিজ সমষ্টিতে থলুৱাৰ ভেটি উছন কৰি আদানিক মাটি গতাই দিব বিচাৰিছে।
ৰাজসাহাৰ্যৰে নিৰ্মাণ কৰা হ’ব আদানিৰ বাবে এৰ’চিটি। এৰ’চিটিৰ বাবে বুজাবুজিৰ চুক্তি স্বাক্ষৰিত হৈছিল Advantage Assam 2.0 ত। তেতিয়াই মুখ্যমন্ত্রী হিমন্ত বিশ্ব শর্মাই ঘোষণা কৰিছিল বিনিয়োগকাৰীক দিয়া হ’ব বিশেষ ৰাজসাহাৰ্যৰ সুবিধা। এতিয়াৰ থলুৱাৰ ভেটি উছন কৰি ৰাজকোষৰ ৰাজসাহাৰ্যৰে নিৰ্মাণ কৰা হ’ব আদানিৰ এৰ’চিটি।
হিমন্ত বিশ্ব শর্মাই শেহতীয়াকৈ জাতিক ৰক্ষা দিবলৈ সংখ্যালঘুৰ দখলত থকা অঞ্চলত উচ্ছেদৰ ৰাজনীতিৰে উচ্ছেদ চলাই আছে। কিন্তু সেই একেটা সময়তে আদানিক মাটি গতাই দিবলৈ ১,১১৬ টা খিলঞ্জীয়া পৰিয়াললৈ ভূমি অধিগ্রহণৰ জাননীও প্ৰেৰণ কৰা হৈছে। একেটা সময়তে এফালে ধুবুৰীত উচ্ছেদ চলাই আছে আৰু আনফালে কার্বি আংলঙত আদানিক মাটি গতাই দিয়াৰ যো-জা চলাই আছে।
সংবাদ মেলত ৰাইজৰ দলে কয় যে বিজেপিৰ আমোলত অসমত ৰকেট গতিত বাঢ়িছে আদানিৰ বেপাৰ। দলটোৱে বিজেপিৰ আমোলত আদানিৰ বাণিজ্যিক সম্প্ৰসাৰণৰ এক তালিকাও দাখিল কৰে।
১) লোকপ্রিয় আন্তঃর্জাতিক বিমান বন্দৰ।
২) ৮৪০ কোটি টকাৰ স্মার্ট মিটাৰৰ ঠিকা।
৩) এৰ’চিটি।
৪) ধুবুৰীত ৩,৫০০ বিঘা ভূমিত ৩,০০০ মেগাৱাটৰ তাপ বিদ্যুৎ প্রকল্প।
৫) কার্বি আংলঙত ১২,০০০ বিঘা ভূমিত সৌৰ শক্তি প্রকল্প। (সংবাদ মাধ্যমত প্রকাশিত খবৰ অনুসৰি)
৬) ৯,০০০ বিঘা মাটিত ডিমা হাচাওত চিমেন্ট কোম্পেনী। (সংবাদ মাধ্যমত প্রকাশিত খবৰ অনুসৰি)
