ট্ৰাম্পৰ শুল্কৰ প্ৰভাৱৰ বাবে পুৱা বজাৰ খোলাৰ লগে লগে ভাৰতীয় শ্বেয়াৰ বজাৰত ৰক্তক্ষৰণ আৰম্ভ হয়। বৃহস্পতিবাৰে পুৱা ৯:৩০ বজাত বজাৰ মুকলি হোৱাৰ সময়ত চেন্সেক্সৰ মূল্য ৫০০ পইণ্ট হ্ৰাস পায়। আৰু কিছু সময়ৰ পাছতে চেন্সেক্স ৬৩০ পইণ্টতকৈ অধিক হ্ৰাস পায়। নিফ্টি ৫০ সূচকাংকতো একেই ছবি দেখা গৈছিল। ১৮০ পইণ্ট হ্ৰাস পাইছে সূচকাংক। আৰু সেই কম সময়ৰ ভিতৰতে বিনিয়োগকাৰীৰ বিপুল পৰিমাণৰ ধন বজাৰৰ পৰা উধাও হৈ গ’ল।
ইকনমিক টাইমছৰ এক প্ৰতিবেদন অনুসৰি শ্বেয়াৰ বজাৰত আঘাত হানি মাত্ৰ ১৫ মিনিটতে বিনিয়োগকাৰীৰ ৫ লাখ কোটি টকা বজাৰৰ পৰা উধাও হৈ যায়। বিএছইত তালিকাভুক্ত কোম্পানীসমূহৰ মুঠ বজাৰ মূলধন এবাৰতে ৫.৫ লাখ কোটি টকা হ্ৰাস পাই ৪৫৩.৩ লাখ কোটি টকা হয়।
দিনটোৰ আৰম্ভণিৰ ব্যৱসায়ত চেন্সেক্সৰ মূল্য প্ৰায় ৮০০ পইণ্ট হ্ৰাস পাইছিল। বৃহস্পতিবাৰে পুৱা ১০ বজালৈকে চেন্সেক্স ৬৬০ পইণ্টৰ ওচৰত হ্ৰাস পাইছিল। একে সময়তে নিফ্টি ফিফটি ১৯৪ পইণ্ট হ্ৰাস পায়। টকাৰ মুল্যও অভিলেখ হ্ৰাস দেখা গৈছে।
বৃহস্পতিবাৰে সৰ্বাধিক ক্ষতিগ্ৰস্ত হয় তেলৰ ষ্টক। ভাৰতীয় তেল কোম্পানীসমূহৰ শ্বেয়াৰৰ মূল্যত বৃহৎ আঘাত পৰে। ইণ্ডিয়ান অইল, বিপিচিএল, মহানগৰ গেছ, অ’এনজিচি, গুজৰাট গেছৰ দৰে কোম্পানীৰ শ্বেয়াৰৰ মূল্য হ্ৰাস পাইছে। ৰিলায়েন্স, টাটা মটৰ্ছ, মহিন্দ্ৰা এণ্ড মহিন্দ্ৰা, ভাৰতী এয়াৰটেল, ষ্টেট বেংক অৱ ইণ্ডিয়াৰ দৰে ষ্টকো ক্ষতিগ্ৰস্ত হয়।
কিন্তু দুপৰীয়াৰ পিছত পৰিস্থিতি সলনি হ’বলৈ ধৰিলে, বজাৰখন পুৱাৰ জোকাৰণিৰ পৰা সুস্থ হৈ উঠে। দুপৰীয়া ১ বজালৈকে বজাৰখনে পুৱাৰ জোকাৰণিৰ পৰা প্ৰায় ১৫০ পইণ্টে সুস্থ হৈ উঠিছিল। বেংক নিফটিও প্ৰায় ১৬০ পইণ্ট বৃদ্ধি পাইছে। এইচ ইউ এল আৰু জিঅ’ ফাইনেন্সৰ ওপৰত ভৰ কৰি বজাৰ সুস্থিৰতালৈ আহে।
