শুকুৰবাৰে ইডিয়ে ৩ হাজাৰ কোটি টকাৰ ঋণৰ গোচৰত অনিল আম্বানীৰ বিৰুদ্ধে লুক আউট নোটিচ জাৰি কৰিছিল। কেন্দ্ৰীয় তদন্তকাৰী সংস্থাই এই গোচৰত জড়িত এজনক গ্ৰেপ্তাৰ কৰিবলৈ সক্ষম হৈছে।
জানিব পৰা মতে ওড়িশাৰ এটা কোম্পানীৰ মুৰব্বী পাৰ্থসাৰথি বিশ্বলক গ্ৰেপ্তাৰ কৰিছে ইডিয়ে। তেওঁক ধন সৰবৰাহৰ প্ৰতিৰোধ আইনৰ অধীনত গ্ৰেপ্তাৰ কৰা হয়। কোম্পানীটোৱে অনিল অম্বানীৰ এটা কোম্পানীৰ বাবে ৬৮.২ কোটি টকাৰ ভুৱা গেৰাণ্টী জমা দিয়াৰ অভিযোগ উত্থাপন হৈছে। ইয়াৰ বাবে ৫.৪ কোটি টকাও লৈছিল বুলি জানিব পৰা গৈছে। ২০১৯ চনত গঠন হোৱা এই কোম্পানীটোৰ বিৰুদ্ধে দিল্লী আৰক্ষীয়ে এফআইআৰ পঞ্জীয়ন কৰি পাৰ্থসাৰথিক বিশেষ ইডি আদালতত হাজিৰ কৰে। আটকাধীন ব্যক্তিজনক বুধবাৰলৈ ৰিমাণ্ডত নিবলৈ ইডিক নিৰ্দেশ দিছে আদালতে।
উল্লেখ্য যে অনিল অম্বানীৰ কোম্পানীসমূহৰ বিৰুদ্ধে ১৭ হাজাৰ কোটি টকাৰ জালিয়াতিৰ অভিযোগ আছে। ইয়াৰে ৩০০০ কোটি টকা য়েছ বেংকৰ। ইডিৰ সূত্ৰ অনুসৰি এই ঋণ তেওঁৰ কেইবাটাও কোম্পানীৰ মাজত বিতৰণ কৰা হৈছিল।
ইয়াৰ পূৰ্বে এই ধন বেংকৰ প্ৰমোটাৰৰ নিয়ন্ত্ৰিত বিভিন্ন কোম্পানীলৈ গৈছিল। লগতে ব্যক্তিগত বেংকটোৱে ঋণ অনুমোদন কৰাৰ ক্ষেত্ৰত কেইবাটাও নিয়ম উলংঘা কৰে। সেয়ে সেই ঋণৰ লগত উৎকোচ জড়িত আছিল নে নাই, এই সন্দৰ্ভত তদন্ত আৰম্ভ কৰিছে ইডিয়ে। ইয়াৰোপৰি বিভিন্ন বিদেশী বেংকৰ একাউণ্ট আৰু সম্পত্তিৰো তদন্ত চলি আছে। আৰু এই সন্দৰ্ভত সোধা-পোচাৰ বাবে অনিল অম্বানীক মাতি অনা হৈছে বুলি জানিবলৈ দিয়ে ইডিয়ে।
