ঘৰৰ সন্মুখত অবৈধ পাৰ্কিঙক লৈ কাজিয়াৰ সূত্ৰপাত ঘটে। অভিনেত্ৰী হুমা কুৰেশ্বীৰ খুড়াকৰ ল’ৰা আছিফ কুৰেশ্বীক ছুৰীৰে আঘাত কৰি হত্যা কৰিলে দুজন যুৱকে। দিল্লীৰ নিজামুদ্দিন অঞ্চলত সংঘটিত এই ঘটনাক লৈ নিৰাপত্তাৰ প্রশ্ন উত্থাপিত হৈছে৷
ইতিমধ্যে যুৱক দুজনক গ্ৰেপ্তাৰ কৰা হৈছে। তদন্তকাৰী আৰক্ষীয়ে ছুৰীখন জব্দ কৰিছে। এই পৰ্যন্ত বলীউডৰ অভিনেত্ৰীগৰাকীয়ে এই ঘটনাক লৈ কোনো ধৰণৰ প্ৰতিক্ৰিয়া প্ৰকাশ কৰা নাই।
অভিনেত্ৰীগৰাকীৰ ভাতৃ আছিফ কুৰেশ্বী দীৰ্ঘদিন ধৰি দিল্লীৰ নিজামুদ্দিন অঞ্চলৰ বাসিন্দা। বৃহস্পতিবাৰে নিশা ১০:৩০ বাজিছিল। দিল্লী আৰক্ষীৰ সূত্ৰৰ পৰা জানিব পৰা মতে, সেই সময়ত দুজন যুৱক স্কুটীত উঠি তেওঁৰ ঘৰৰ সন্মুখলৈ আহিছিল। তেওঁলোকে স্কুটিখন প্ৰৱেশদ্বাৰৰ ঠিক সন্মুখতে ৰখাবলৈ বিচাৰিলে।
অভিনেত্ৰীগৰাকীৰ ভাতৃয়ে বাধা দিয়ে। সেই সময়ত এজন যুৱকে তেওঁৰ লগত থকা চোকা ছুৰী এখন উলিয়ায়। আছিফ কুৰেশ্বীৰ বুকুত উপৰ্যুপৰি ছুৰীৰে আঘাত কৰে। তেওঁ থিতাতে ঢলি পৰে। অলপ সময়ৰ ভিতৰতে সকলো শেষ হৈ গ’ল। তেওঁৰ মৃত্যু ঘটিল। এই ঘটনাত থানাত এজাহাৰ দাখিল কৰা হৈছে।
অভিযোগ পোৱাৰ পিছৰে পৰা আৰক্ষীয়ে তৎপৰ হৈ পৰে। শীঘ্ৰে গ্ৰেপ্তাৰ কৰা হয় যুৱক দুজনক। ধৃত যুৱক দুজন ক্ৰমে উজ্জ্বল (১৯) আৰু গৌতম (১৮)।
এই ঘটনাত স্তম্ভিত হৈ পৰিছে মৃতকৰ পত্নী। তেওঁ কয়, “পাৰ্কিঙৰ বাবে বিবাদ হৈছিল। কিন্তু হঠাতে ইমান ডাঙৰ কাণ্ড হ’ব বুলি মই কল্পনাও কৰিব পৰা নাই।” এই ঘটনাত হুমা কুৰেশ্বীৰ পিতৃ আৰু খুৰাকো স্তম্ভিত হৈ পৰিছে। তেওঁলোকে অভিযুক্তক কঠোৰ শাস্তি প্ৰদানৰ দাবী জনাইছে।
