একেটা ঘৰত থাকে ২৩০ জন সদস্য। প্ৰায় ৩ লাখ ভোটাৰৰ বাবে হাউছ নম্বৰ ০। বিহাৰত ভোটাৰ তালিকাৰ বিশেষ সংশোধনৰ অন্তত প্ৰকাশিত ভোটাৰ তালিকাতো বৃহৎ ত্ৰুটিৰ সৃষ্টি হৈছে। নিৰ্বাচন আয়োগে প্ৰকাশ কৰা খচৰা ভোটাৰ তালিকাত দেখা গৈছে যে জামুই জিলাৰ চৌদিহা পঞ্চায়তৰ এটা বুথত এটা সৰু ঘৰত ২৩০ জন ভোটাৰ বাস কৰে!
সেই অঞ্চলৰ বাসিন্দাসকলে কয় যে তেওঁলোক একেটা ঘৰতে নাথাকে। সকলোৰে ঘৰ বেলেগ বেলেগ। ঠিকনাটো বেলেগ। ঘৰৰ নম্বৰটোও বেলেগ। ইয়াৰ পিছতো এনে ভুল হৈছে। ভোটাৰ তালিকাৰ পুনৰীক্ষণৰ বাবে আহিবলগীয়া বুথ পৰ্যায়ৰ বিষয়াজনে স্থানীয় তদন্ত নকৰাৰ অভিযোগ স্থানীয় ৰাইজৰ। ঘৰতে বহি কাম কৰা অভিযোগ উঠিছে। সেই অঞ্চলৰ বাসিন্দাসকলে দাবী কৰে যে বহু আগতেই হয়তো মৃত্যু হোৱা বহু ভোটাৰৰ নাম এই তালিকাত দেখা গৈছে। দৰাচলতে বুথ পৰ্যায়ৰ বিষয়াসকলৰ অদক্ষতাৰ বাবে বিশেষ তালিকা পুনৰীক্ষণৰ প্ৰকৃত উদ্দেশ্য পূৰণ হোৱা নাই। যদিও স্থানীয় বিএলঅ’ই দাবী কৰিছে, “সেই ভুলবোৰ কাৰিকৰী কাৰণত হৈছে।মই ইতিমধ্যে বিডিঅ’ক এই বিষয়ে অৱগত কৰিছো।”
তথ্য অনুসৰি বিহাৰৰ এছ আই আৰৰ পিছত প্ৰকাশিত খচৰা ভোটাৰ তালিকাত ২ লাখ ৯২ হাজাৰতকৈ অধিক ভোটাৰৰ ঘৰৰ সংখ্যা ০, ০০ আৰু ০০০ বুলি দেখুওৱা হৈছে। বিশেষ সংশোধনীৰ অন্তত নিৰ্বাচন আয়োগে প্ৰস্তুত কৰা সংশোধিত তালিকাখনো ত্ৰুটিপূৰ্ণ বুলি বিৰোধীয়ে অভিযোগ উত্থাপন কৰিছে। খৰখেদাকৈ বুথ স্তৰৰ বিষয়াই বহু অবৈধ কাম কৰি আছে। ফলত সংশোধিত ভোটাৰ তালিকাতো ত্ৰুটি আছে। লক্ষ্য পূৰণৰ বাবে ভোটাৰৰ সৈতে কথা নোপোৱাকৈ বুথ পৰ্যায়ৰ বিষয়াসকলে প্ৰ-পত্ৰ পূৰণ কৰাৰ অভিযোগ আৰজেডিৰ। বহু ভোটাৰৰ নামত প্ৰ-পত্ৰ পূৰণ হৈছিল যদিও তেওঁলোকে গম নাপালে। এনেদৰে বহু মৃত ভোটাৰৰ নামো ফৰ্ম পূৰণ কৰা হৈছিল। ফলত ভুৱা ভোটাৰ ধৰা বুলি আয়োগে কৰা দাবীও মিছা।
আনফালে এটা কোঠাৰ সৰু ঘৰত ৮০ জন ভোটাৰ! একেটা ঘৰতে ৪৩ জন সদস্য। তেওঁলোকৰ উপাধি বেলেগ বেলেগ। কৰ্ণাটকৰ মহাদেৱপুৰ বিধান সভা সমষ্টিৰ ভোটাৰ তালিকাত এই ভুলসমূহৰ ওপৰত আলোকপাত কৰিছে বিৰোধী দল নেতা ৰাহুল গান্ধীয়ে। নিৰ্বাচন আয়োগৰ সূত্ৰই দাবী কৰিছে যে এই বিশেষ পুনৰীক্ষণ যাতে ভোটাৰ তালিকাত এনে কোনো ভুল নাথাকে। কিন্তু বাস্তৱতা হ’ল বিশেষ পুনৰীক্ষণৰ অন্তত প্ৰকাশিত খচৰা তালিকাখনো ত্ৰুটিপূৰ্ণ।
