বিহাৰ বিধানসভাৰ নির্বাচনত বিজেপিৰ হৈ জয়ী হ’বলৈ নির্বাচন আয়োগে কাৰ্যতঃ ডকাইতিৰ দৰে কাম আৰম্ভ কৰিছে৷ বুধবাৰে সংবাদ মাধ্যমৰ সন্মুখত এনে অভিযোগ উত্থাপন কৰে আৰজেডিৰ বিধায়ক তেজস্বী যাদৱে। তেওঁ অভিযোগ কৰে যে বিজেপিৰ নেতা-কৰ্মী আৰু তেওঁলোকৰ পৰিয়ালৰ সদস্যক নিৰ্বাচিতভাৱে দুটা ভিন্ন ইপিআইচি নম্বৰৰ ভোটাৰ কাৰ্ড দিয়া হৈছে। তেওঁৰ এই দাবীৰ সমৰ্থনত সংবাদ মাধ্যমৰ সন্মুখত প্ৰমাণ দাখিল কৰে তেজস্বীয়ে। এছ আই আৰক লৈ বিতৰ্কৰ মাজতে তেজস্বীৰ এই অভিযোগে নতুন আলোড়নৰ সৃষ্টি কৰিছে।
তেজস্বীয়ে কয়, “বিজেপিৰ এগৰাকী ডাঙৰ নেত্ৰী হৈছে নিৰ্মলা দেৱী। তেওঁ মুজাফ্ফৰপুৰৰ মেয়ৰ। তেওঁৰ ইপিআইচি নম্বৰ থকা দুখন বেলেগ বেলেগ ভোটাৰ কাৰ্ড আছে, ক্ৰমে- REM1251917 আৰু GSB1835164। একেখন বিধানসভাৰ দুটা বেলেগ বেলেগ বুথত দুখন ভোটাৰ কাৰ্ড দিয়া হৈছে। ইপিআইচি নম্বৰৰ লগতে তেওঁৰ বয়সো বৰ্ষত বেলেগ।”
কাৰ্ড দুখন মহিলাগৰাকীয়ে এছ আই আৰত দুখন বেলেগ বেলেগ ফৰ্ম পূৰণ কৰিছিল যাৰ জৰিয়তে মহিলাগৰাকীয়ে দুখন ভোটাৰ কাৰ্ড পাইছিল। তেজস্বীয়ে অভিযোগ কৰে যে, “নিৰ্বাচনৰ পূৰ্বে নিৰ্বাচন আয়োগৰ সহযোগত বিজেপিয়ে ভোট-ৰিগিং আৰম্ভ কৰিছে। যদি নিৰ্বাচন আয়োগে নিজেই এই দুৰ্নীতি কৰিছে, তেন্তে SIR ৰ অৰ্থ কি? এই ঘটনা এটা নহয়, সমগ্ৰ বিহাৰতে এনে বহু ঘটনা বিয়পি আছে।”
কেৱল সেয়াই নহয়, তেজস্বী যাদৱে অভিযোগ কৰে যে নিৰ্বাচনৰ পূৰ্বে আন ৰাজ্যৰ লোকে বিহাৰলৈ ভোট দিবলৈ আহিছে। তেওঁ অভিযোগ কৰে, “গুজৰাটত বিজেপিৰ ডাঙৰ দায়িত্বত আছে বিখুভাই দলছানিয়া। শেহতীয়াকৈ তেওঁ পাটনাৰ ভোটাৰ হৈ পৰিছে। অৱশ্যে ২০২৪ চনত গুজৰাটৰ পৰা ভোটদান কৰিছিল। গুজৰাটৰ ভোটাৰ তালিকাৰ পৰা নাম বাদ দি পাটনালৈ আহিছিল। অৱশ্যে নিয়ম অনুসৰি ৫ বছৰৰ আগতে এই কাম কৰিব নোৱাৰি। কিন্তু আচৰিত কথাটো হ’ল তেওঁ নিজৰ নাম আৰু ঠিকনা সলনি কৰি লৈ গুচি গৈছে।”
মন কৰিবলগীয়া যে বিহাৰত SIR আৰম্ভ হোৱাৰ পৰাই বিৰোধী শিবিৰ নিৰ্বাচন আয়োগৰ বিৰুদ্ধে সৰৱ হৈ পৰিছে। বিজেপিৰ লাভৰ বাবে SIRৰ নামত ভোটাৰক অনৈতিকভাৱে বাদ দিয়াৰ অভিযোগ উত্থাপন হৈছে। জীৱিত মানুহক মৃত বুলি দেখুওৱা হৈছে। এই বিষয়ত উচ্চতম ন্যায়ালয়তো গোচৰ ৰুজু কৰা হৈছে। মঙলবাৰে উচ্চতম ন্যায়ালয়ত এই গোচৰৰ শুনানিৰ সময়ত মৃত বুলি ভোটাৰ তালিকাৰ পৰা বাদ পৰা বহু লোকক আদালতত হাজিৰ কৰা হয়। এইবাৰ তথ্য আৰু প্ৰমাণ লৈ বিজেপিৰ এই ভোট চুৰিৰ বিৰুদ্ধে মাত মাতিছে তেজস্বী যাদৱে।
