হিমাচল প্ৰদেশত ডাৱৰ বিস্ফোৰণ আৰু ক্ষন্তেকীয়া বানপানীয়ে ৩০০ৰো অধিক পথ বন্ধ কৰাৰ লগতে শিমলা আৰু লাহাউল-স্পিটি জিলাৰ কেইবাখনো দলং উটুৱাই লৈ যায়। শিমলাত গানৱী খাদত এখন আৰক্ষী চকী উটুৱাই নিয়াৰ বিপৰীতে বাছ ষ্টেণ্ড আৰু কাষৰ দোকান-পোহাৰৰ বিস্তৰ ক্ষতিসাধন হয়। দলং দুখন ধ্বংস হোৱাৰ ফলত বিচ্ছিন্ন হৈ পৰিছে কুট আৰু ক্যাৱ পঞ্চায়ত। লাহাউল-স্পিতিত কাৰ্পাট, চাংগুট আৰু উডগোছ নাল্লাত ক্ষন্তেকীয়া বানপানীয়ে আৰু দুখন দলঙৰ ক্ষতিসাধন কৰিছে বুলি জানিব পৰা গৈছে। কুল্লুৰ নিৰ্মণ্ড মহকুমাৰ শ্ৰীখণ্ড পাহাৰ আৰু বঞ্জাৰৰ বাথাৰহ পাহাৰতো মেঘ বিস্ফোৰণ ঘটি কুৰ্পন খাদ বানপানীৰ ফলত বাগীপুল বজাৰ খালী কৰিবলৈ বাধ্য হয়। কোনো লোকৰ মৃত্যু হোৱা নাই যদিও জুপুৰি আৰু বাহনসমূহৰ ক্ষতিসাধন হৈছে।
প্ৰকাশিত তথ্য অনুসৰি মুঠ ৩২৫টা পথ বন্ধ হৈ পৰিছে, ইয়াৰে ১৭৯টা মাণ্ডিত আৰু ৭১টা কুল্লুৰ। ভাৰতৰ বতৰ বিজ্ঞান বিভাগে বৃহস্পতিবাৰে চাম্বা, কংৰা আৰু মাণ্ডিত প্ৰচণ্ড বৰষুণৰ বাবে অ’ৰেঞ্জ এলাৰ্ট আৰু কিছু অঞ্চলৰ বাবে শুকুৰবাৰৰ পৰা দেওবাৰলৈ ইয়েল্ল’ এলাৰ্ট জাৰি কৰে। ২০ জুনত বাৰিষা আৰম্ভ হোৱাৰ পাছৰে পৰা ৰাজ্যখনত ১২৬ জন লোকৰ মৃত্যু, ৩৬ জন নিৰুদ্দেশ, ৬৩ টা ক্ষন্তেকীয়া বানপানী, ৩১ টা ডাৱৰ বিস্ফোৰণ আৰু ৫৭ টা ভূমিস্খলনকে ধৰি ২০৩১ কোটি টকাৰ লোকচান হৈছে।ইফালে মুষলধাৰ বৰষুণৰ মাজতে তেলেংগানাত জাৰি কৰা হৈছে ৰেড এলাৰ্ট। বুধবাৰে তেলেংগানাত প্ৰচণ্ড বৰষুণ হোৱাৰ লগতে কিছুমান অঞ্চলত ২০ চে.মি.তকৈ অধিক বৰষুণ হোৱাৰ তথ্য পোৱা গৈছে। বৃহস্পতিবাৰে আই এম ডিয়ে বিকাৰবাদ, সংগৰেড্ডী আৰু মেডাক জিলাৰ বাবে ৰেড এলাৰ্ট আৰু কামাৰেড্ডী, নিজামাবাদ আৰু আদিলাবাদৰ বাবে অ’ৰেঞ্জ এলাৰ্ট জাৰি কৰে।
