শ্বপিং মল বা ডিপাৰ্টমেণ্ট ষ্ট’ৰসমূহত প্ৰায়ে দেখা যায় যে গ্ৰাহকৰ পৰা মোবাইল নম্বৰ বিচৰা হয়। সাধাৰণতে এইটো কৰা হয় ‘ল’য়েলটি পইণ্ট’, কিছুমান ৰেহাই বা অনলাইন বিল প্ৰেৰণৰ উদ্দেশ্যে। কিন্তু এতিয়া আৰু এই ব্যৱাস্থা দেখা নাযাব। কোনো দোকানে বা শ্বপিং মলে গ্ৰাহকৰ মোবাইল নম্বৰ সুধিব নোৱাৰিব।
কেন্দ্ৰই জনাইছে যে এই ধৰণৰ প্ৰচলিত ব্যৱস্থাই গ্ৰাহকৰ ব্যক্তিগত তথ্য সুৰক্ষাৰ বাবে ভাবুকি স্বৰূপ হৈ পৰিছে। সেয়ে শীঘ্ৰেই কার্যকৰী হ’ব ডিজিটেল পাৰ্চনেল ডাটা প্ৰটেকচন এক্ট, যাৰ অধীনত কোনো দোকানী বা প্ৰতিষ্ঠানে ৰাজহুৱাভাৱে মোবাইল নম্বৰ বিচাৰিলে সেইটো আইন মতে অবৈধ বুলি গণ্য কৰা হ’ব।
উল্লেখযোগ্য যে, এই বিধেয়কখন ২০২৩ চনৰ আগষ্ট মাহতেই সংসদৰ দুয়োটখন সদনত গৃহীত কৰিছিল। ৰাষ্ট্ৰপতিয়েও অতি সোনকালে সন্মতি প্ৰদান কাৰিছিল। কিন্তু আইনখন এতিয়ালৈ কার্যকৰী হোৱা নাছিল। ২০২৫ বৰ্ষৰ জানুৱাৰীত খচৰা নিয়মাৱলী প্ৰস্তুত কৰা হয় আৰু আগষ্টৰ দ্বিতীয় সপ্তাহত নিয়মত কোনো পৰিৱৰ্তন কৰা হ’ব নে নাই তাৰ স্পষ্টিকৰণ দিছিল।
অচিৰেই দেশজুৰি গ্ৰাহকৰ গোপনীয়তা সুৰক্ষাৰ বাবে এই আইন কার্যকৰী হ’ব বুলি অনুমান কৰা হৈছে।
