বিহাৰত ৰাহুল গান্ধীৰ ‘ভোটাৰ আধিকাৰ যাত্ৰা’ক লৈ পুনৰ গৰম বিহাৰৰ ৰাজনীতি। অভিযোগ অনুসৰি দৰভংগাৰ এখন মঞ্চৰ পৰাই প্ৰধানমন্ত্ৰী নৰেন্দ্ৰ মোদীক লক্ষ্য কৰি লোৱা হৈছিল। বৃহস্পতিবাৰে বিজেপিয়ে দাবী কৰিছিল যে এই ঘটনাৰ বাবেই আগন্তুক বিধানসভা নিৰ্বাচনত কংগ্ৰেছ নেতৃত্বাধীন ‘ইণ্ডিয়া ব্লক’ মিত্ৰজোঁটক ৰাইজে শাস্তি প্ৰদান কৰিব। কেন্দ্ৰীয় গৃহমন্ত্ৰী অমিত শ্বাহে এই ঘটনাক “দেশৰ গণতন্ত্ৰৰ দাগ” বুলি অভিহিত কৰে।
বুধবাৰে ছ’চিয়েল মিডিয়াত ভাইৰেল হৈ পৰে এটা ভিডিঅ’, য’ত কোনোবাই মঞ্চৰ পৰাই মোদীৰ প্ৰতি গালি-গালাজ কৰা দেখা গৈছে। অৱশ্যে এই ভিডিঅ’টোৰ সত্যতা সত্যতা নৰ্থইষ্ট নাৱে পৰীক্ষা কৰা নাই । সেইদিনা ৰাহুল, প্ৰিয়ংকা গান্ধী আৰু আৰজেডি নেতা তেজস্বী যাদৱ দৰভংগাৰ পৰা মটৰবাইকেৰে মুজাফ্ফৰপুৰলৈ ৰাওনা হয়।
এই ঘটনাৰ প্ৰতিবাদত বিহাৰ বিজেপিয়ে পাটনা কোতৱালি থানাত এফআইআৰ দাখিল কৰিছে। দলটোৰ জিলা সভাপতি আদিত্য নাৰায়ণ ঝা মান্নাই কয় যে, “কাণ্ডৰ প্ৰমাণ সংগ্ৰহ কৰা হৈছে। আমি দোষীৰ বিৰুদ্ধে আইনী ব্যৱস্থা বিচাৰো।”
অমিত শ্বাহে এক্সত লিখিছে, “দৰভংগাৰ মঞ্চৰ পৰা প্ৰধানমন্ত্ৰী মোদী আৰু তেওঁৰ প্ৰয়াত মাতৃক লৈ কৰা অশ্লীল মন্তব্য কেৱল নিন্দনীয়ই নহয়, দেশৰ গণতন্ত্ৰৰ বাবেও কৰা এক অপমান।”
উপ-মুখ্যমন্ত্ৰী সম্ৰাট চৌধুৰীয়ে আৰজেডি সমৰ্থকে কৰা ‘দাদাগিৰি’ বুলি অভিহিত কৰিছে। তেওঁ কয়, “কংগ্ৰেছে ক্ষমতাৰ লোভত এনে অৰাজকতাক মানি লৈছে। কিন্তু বিহাৰৰ জনসাধাৰণে ভাৰত মিত্ৰজোঁটক ক্ষমা নকৰে।” কেন্দ্ৰীয় ৰাজ্যিক মন্ত্ৰী নিত্যানন্দ ৰায়েও ৰাহুল আৰু তেজস্বীক ক্ষমা খুজিবলৈ কয়।
আনহাতে, কংগ্ৰেছৰ মুখপাত্ৰ অসিত নাথ তিৱাৰীয়ে দাবী কৰে যে বিজেপিয়ে সদায় অপমানৰ ৰাজনীতিত লিপ্ত হৈ আহিছে।
আৰজেডিৰ মুখপাত্ৰ মৃণাল তিৱাৰীয়ে কয় যে, ‘তদন্তত যিকোনো দলৰ সমৰ্থকে কৰা মন্তব্যৰ আঁৰৰ উদ্দেশ্য পোহৰলৈ আহিব। সদায় বিজেপিয়েই ভদ্ৰ ৰাজনৈতিক ভাষাৰ সীমা অতিক্ৰম কৰে, ইণ্ডিয়া মিত্ৰজোঁটে নহয়।’
