পঞ্জাৱ নেচনেল বেংকৰ পৰা ১৩,৮৫০ কোটি টকা আত্মসাৎ কৰাৰ অভিযোগত পলাতক হৈ থকা ভাৰতীয় ব্যৱসায়ী মেহুল চোকচিৰ জামিন আবেদন নাকচ কৰিলে বেলজিয়ামৰ এখন আদালতে।
সংবাদ সংস্থা পিটিআইৰ খবৰৰ মতে, বেলজিয়ামৰ আপীল আদালতে চোকচিৰ আবেদন খাৰিজ কৰিছে। তেওঁ আদালতত কয় যে, তেওঁক জামিনত মুক্তি দি ঘৰতে ২৪ ঘণ্টাৰ গৃ্হবন্দী হৈ থাকিবলৈ সুযোগ দিব লাগে। কিন্তু চিবিআইয়ে এই আৱেদনৰ তীব্ৰ বিৰোধিতা কৰে। তদন্তকাৰী সংস্থাটোৰ যুক্তি অনুসৰি, চোকচিয়ে ইতিমধ্যেই ন্যায় ব্যৱস্থাৰ পৰা পলায়নৰ চেষ্টা কৰিছে, সেয়েহে জামিন পালে পুনৰ অন্য দেশলৈ পলাই যাবলৈ প্ৰয়াস কৰিব পাৰে।
উল্লেক্ষ্য যে চোকচিৰ বিৰুদ্ধে পঞ্জাৱ নেচনেল বেংকৰ ১৩,৮৫০ কোটি টকা আত্মসাতৰ অভিযোগ আছে। ২০১৮ চনৰ জানুৱাৰীত পিএনবি কেলেংকাৰী পোহৰলৈ অহাৰ পিছত তেওঁ ভাৰতৰ পৰা পলাই যায়। তাৰ পিছত চিবিআই আৰু ইডিয়ে তেওঁৰ বিৰুদ্ধে আইনী পদক্ষেপ গ্ৰহণ কৰে। শেষত, চলতি বৰ্ষৰ ১৪ এপ্ৰিলত বেলজিয়ামত তেওঁক গ্ৰেপ্তাৰ কৰা হয়।
চিবিআইয়ে ইতিমধ্যে চোকচিক ভাৰতলৈ প্ৰত্যাৰ্পণৰ বাবে আদালতত আবেদন দাখিল কৰিছে। সংশ্লিষ্ট বিষয়াৰ মতে, এই গোচৰৰ শুনানি ছেপ্টেম্বৰৰ মাজভাগৰ পৰা আৰম্ভ হ’ব। লগতে মুম্বাইৰ এখন বিশেষ আদালতে ২০১৮ আৰু ২০২১ চনত চোকচিৰ বিৰুদ্ধে গ্ৰেপ্তাৰী পৰোৱানাও জাৰি কৰিছিল বুলি জানিব পৰা গৈছে।
