আফগানিস্তানৰ পূব অঞ্চলত হোৱা ভূমিকম্পত মৃত্যু হোৱা লোকৰ সংখ্যা ৬১০ লৈ বৃদ্ধি পোৱা বুলি তালিবানৰ গৃহ মন্ত্ৰালয়ে প্ৰকাশ কৰিছে। মন্ত্ৰালয়ৰ তথ্য অনুসৰি ১৩০০ৰো অধিক লোক আহত হৈছে।
দেওবাৰে নিশা ১১:৪৭ বজাত আফগানিস্তানৰ নাংগাৰহৰ আৰু কুনাৰ প্ৰদেশত ভূমিকম্পৰ সৃষ্টি হয়। ইয়াৰ গভীৰতা আছিল ৮ কিলোমিটাৰ। ইয়াৰ পিছত পুনৰ অন্ততঃ তিনিটা কঁপনি অনুভূত হয়, যাৰ তীব্ৰতা ৪.৫ৰ পৰা ৫.২ৰ ভিতৰত আছিল।
সংবাদ সংস্থা এ এফ পিৰ মতে, আফগানিস্তানৰ ৰাজধানী কাবুল আৰু পাকিস্তানৰ ৰাজধানী ইছলামবাদলৈকে ভূমিকম্পৰ কম্পন অনুভৱ কৰা হৈছে। ভূমিকম্পৰ ফলত হোৱা ক্ষতিৰ অধিকাংশই কুনাৰ প্ৰদেশত হৈছে, যাৰ প্ৰায় ৯০ শতাংশ ভূমি পাহাৰীয়া।
ভূমিকম্প প্ৰভাৱিত অঞ্চললৈ যোৱা পথসমূহ অতি সংকীৰ্ণ হোৱাৰ বাবে ভূমিস্খলনৰ বাবে বহু পথ বন্ধ হৈ পৰিছে।
তালিবানৰ বিষয়াসকলে কয় যে তেওঁলোকৰ হাতত সীমিত সম্পদ আছে আৰু তেওঁলোকে হেলিকপ্টাৰ যোগান ধৰি ক্ষতিগ্ৰস্ত অঞ্চলসমূহত উপনীত হ’বলৈ আন্তঃৰাষ্ট্ৰীয় সংস্থাসমূহৰ পৰা সহায় বিচাৰিছে।
