ভাৰত আৰু আমেৰিকাৰ মাজত বাণিজ্যিক সম্পৰ্কত কিছু অৱনতি হোৱাৰ পিছতো শেহতীয়াকৈ দুয়োখন দেশৰ নেতাসকলে ইতিবাচক ইংগিত প্ৰদান কৰিছে। আমেৰিকাৰ ৰাষ্ট্ৰপতি ড‘নাল্ড ট্ৰাম্পে ভাৰতৰ প্ৰধানমন্ত্ৰী নৰেন্দ্ৰ মোদীৰ সৈতে বন্ধুত্বপূৰ্ণ সম্পৰ্ক অব্যাহত ৰখাৰ কথা প্ৰকাশ কৰিছে, এই আহ্বানৰ প্ৰতি মোদীয়েও সঁহাৰি জনাইছে। ৰাছিয়াৰ পৰা তেল ক্ৰয়ৰ বাবে ভাৰতৰ ওপৰত ৫০ শতাংশ শুল্ক আৰোপ কৰাৰ পিছত উদ্ভৱ হোৱা অচলাৱস্থাৰ পিছত এই প্ৰতিক্ৰিয়াসমূহে দুয়োখন দেশৰ সম্পৰ্ক পুনৰ সুস্থিৰ হোৱাৰ আশা জগাই তুলিছে।
শুকুৰবাৰে হোৱাইট হাউচত সাংবাদিকসকলৰ সৈতে হোৱা কথোপকথনত ট্ৰাম্পে কয় যে তেওঁ মোদীৰ সৈতে সদায় বন্ধুত্ব বজাই ৰাখিব। তেওঁ কয়, “মোদীৰ সৈতে মোৰ বন্ধুত্ব সদায় থাকিব, ভাৰত আৰু আমেৰিকাৰ মাজত এক বিশেষ সম্পৰ্ক আছে। চিন্তাৰ কোনো কাৰণ নাই…।” ট্ৰাম্পে লগতে উল্লেখ কৰে যে মোদীৰ সৈতে তেওঁৰ ভাল মিল আছে আৰু দুমাহমান আগতে মোদী আমেৰিকালৈ আহিছিল।
ইফালে ভাৰতৰ সৈতে সম্পৰ্ক পুনৰ স্থাপন কৰিবলৈ সাজু নেকি বুলি সোধা প্ৰশ্নৰ উত্তৰত ট্ৰাম্পে ভাৰতে ৰাছিয়াৰ পৰা অধিক তেল ক্ৰয় কৰাৰ বাবে হতাশা প্ৰকাশ কৰি কয়, “মই অতি হতাশ হৈছো যে ভাৰতে ৰাছিয়াৰ পৰা ইমান তেল ক্ৰয় কৰিব আৰু মই তেওঁলোকক সেই কথা জনাই দিছো। আমি ভাৰতৰ ওপৰত অতি বেছি শুল্ক, ৫০ শতাংশ শুল্ক আৰোপ কৰিছো।”
ট্ৰাম্পৰ এই মন্তব্যৰ প্ৰতি সঁহাৰি জনাই প্ৰধানমন্ত্ৰী নৰেন্দ্ৰ মোদীয়ে এক্স (পূৰ্বৰ টুইটাৰ)ত লিখিছে, যে “ৰাষ্ট্ৰপতি ট্ৰাম্পৰ আৱেগ আৰু আমাৰ সম্পৰ্কৰ ইতিবাচক মূল্যায়নৰ গভীৰ শলাগ লওঁ আৰু সম্পূৰ্ণৰূপে সমৰ্থন কৰোঁ। ভাৰত আৰু আমেৰিকাৰ এক অতি ইতিবাচক আৰু কম্প্ৰেইহেন্সিভ এণ্ড গ্ল‘বেল ষ্ট্ৰেটেজিক পাৰ্টনাৰশ্বিপ আছে।”
ইয়াৰ পূৰ্বে ট্ৰাম্পে সামাজিক মাধ্যমত এক পোষ্টত লিখিছিল, “চীনৰ আটাইতকৈ গভীৰ, অন্ধকাৰত আমি ভাৰত আৰু ৰাছিয়াক হেৰুৱাই পেলাইছো। আশা কৰো তেওঁলোকৰ দীঘলীয়া আৰু সমৃদ্ধিশালী ভৱিষ্যত হওক!” এই পোষ্টত ট্ৰাম্পে ৰাছিয়াৰ ৰাষ্ট্ৰপতি ভ্লাদিমিৰ পুটিন আৰু চীনৰ নেতা ঝি জিনপিঙৰ সৈতে মোদীৰ এখন পুৰণি ফটো পোষ্ট কৰিছিল।
আন হাতে চীনৰ টিয়ানজিনত অনুষ্ঠিত ছাংহাই সহযোগিতা সংস্থাৰ সন্মিলনত মোদী, ঝি জিনপিঙ আৰু পুটিনৰ মাজত হোৱা সাক্ষাৎকাৰে বিশ্বৰ দৃষ্টি আকৰ্ষণ কৰিছে। এই পৰিস্থিতিত দুয়োখন দেশৰ নেতাসকলৰ প্ৰতিক্ৰিয়াসমূহে ভাৰত-আমেৰিকাৰ বন্ধুত্ব পুনৰ ইতিবাচক দিশত আগবঢ়াৰ ইংগিত প্ৰদান কৰিছে।
