চীনত পোৱা ৫২ কোটি বছৰ পুৰণি এটা আৰ্থ্ৰপড জীৱাশ্মই বিজ্ঞানীসকলক আচৰিত কৰি তুলিছে। কেম্ব্ৰিয়ান যুগৰ এই জীৱাশ্মৰ গৱেষণাত দেখা গৈছে যে ইয়াৰ মগজু, অন্ত্ৰ, স্নায়ুতন্ত্ৰ আদি অংগ এতিয়াও অক্ষত অৱস্থাত আছে। ‘য়ুটি ইউয়ানছি’ নামৰ এই প্ৰাণীটো কেঁকোৰা আৰু মকৰাৰ পূৰ্বপুৰুষ বুলি চিনাক্ত কৰা হৈছে। এই আৱিষ্কাৰে প্ৰাচীন জীৱৰ বিৱৰ্তন আৰু শৰীৰৰ গঠন সম্পৰ্কে নতুন তথ্য পোহৰলৈ আনিছে।
ইউনান বিশ্ববিদ্যালয়ত সংৰক্ষিত এই জীৱাশ্মৰ ওপৰত গৱেষণাৰ নেতৃত্ব দিয়া ডাৰহাম বিশ্ববিদ্যালয়ৰ মাৰ্টিন স্মিথে “Nature” আলোচনীত প্ৰকাশিত প্ৰতিবেদনত জানিবলৈ দিয়ে যে, চিনক্ৰ’টন এক্স-ৰে ট’ম’গ্ৰাফীৰ সহায়ত জীৱাশ্মৰ ত্ৰিমাত্ৰিক ছবি তুলি অধ্যয়ন কৰা হৈছে। এই পদ্ধতিৰে প্ৰাণীটোৰ মগজু, পাচন গ্ৰন্থি, ৰক্তসঞ্চালন তন্ত্ৰ, ভৰি আৰু চকুৰ স্নায়ু স্পষ্টভাৱে চিনাক্ত কৰা সম্ভৱ হৈ উঠিছে। স্মিথে কয়, সাধাৰণতে পলুৰ অংগৰ জীৱাশ্ম গঠন নহয় কাৰণ সেইবোৰ সোনকালে নষ্ট হৈ যায়, কিন্তু এই জীৱাশ্ম অক্ষত অৱস্থাত সংৰক্ষিত হৈছে, যি অতি বিৰল।
এই জীৱাশ্মত আভ্যন্তৰীণ অংগসমূহ অক্ষত থকাৰ বাবে বিজ্ঞানীসকলে প্ৰাচীন জীৱৰ শৰীৰৰ গঠন আৰু বিৱৰ্তন প্ৰক্ৰিয়া গভীৰভাৱে বুজিবলৈ সক্ষম হয়। ষ্ট্ৰেথক্লাইড বিশ্ববিদ্যালয়ৰ অধ্যাপিকা কেথেৰিন ডবছনে কয়, এই আৱিষ্কাৰে জৈৱ বৈচিত্ৰ্য আৰু বিৱৰ্তনৰ ইতিহাস বুজাত গুৰুত্বপূৰ্ণ ভূমিকা পালন কৰিব। এই জীৱাশ্মৰ জৰিয়তে জীৱৰ সৃষ্টিৰ আৰম্ভণিৰ শৰীৰ গঠন সম্পৰ্কে নতুন ধাৰণা লাভ কৰা সম্ভৱ হৈছে। ভৱিষ্যতে এই বিষয়ত অধিক গৱেষণাৰ সম্ভাৱনা আছে বুলিও তেওঁ আশা প্ৰকাশ কৰিছে।
