২০২৯ চনৰ লোকসভা নিৰ্বাচনৰ পিছত দেশৰ প্ৰধানমন্ত্ৰীৰ পদত বহিব ৰাহুল গান্ধী। এই মন্তব্য কৰ্ণাটকৰ উপ-মুখ্যমন্ত্ৰী তথা কংগ্ৰেছ নেতা ডি কে শিৱকুমাৰৰ।
উল্লেখ্য যে ২০২৪ চনৰ লোকসভা নিৰ্বাচনৰ পূৰ্বে কংগ্ৰেছ নেতৃত্বই একেই দাবী উত্থাপন কৰিছিল। কংগ্ৰেছে ৰাহুল গান্ধীক প্ৰধানমন্ত্ৰী পদৰ প্ৰাৰ্থী হিচাপে লৈ নিৰ্বাচনী প্ৰতিদ্বন্দ্বিতাত প্ৰৱেশ কৰিছিল। কিন্তু কংগ্ৰেছে ৯৮ খনহে আসন লাভ কৰিবলৈ সক্ষম হৈছিল। অৱশ্যে কৰ্ণাটক কংগ্ৰেছ নেতা ডি কে শিৱকুমাৰে স্পষ্টকৈ কৈছে যে কংগ্ৰেছ নেতৃত্ব ইয়াক লৈ বিশেষভাৱে চিন্তিত নহয়।
শেহতীয়াকৈ সৰ্বভাৰতীয় সংবাদ মাধ্যমক দিয়া এক সাক্ষাৎকাৰত কৰ্ণাটকৰ উপ-মুখ্যমন্ত্ৰীয়ে কয়, “দেশত পৰিৱৰ্তনৰ প্ৰয়োজন। গতিকে ২০২৯ চনত ৰাহুল গান্ধী দেশৰ পৰৱৰ্তী প্ৰধানমন্ত্ৰী হ’বলৈ গৈ আছে।”
চুবুৰীয়া দেশৰ সৈতে ভাৰতৰ সম্পৰ্ক অৱনতি ঘটাৰ বাবে বিজেপিক দোষাৰোপ কৰি শিৱকুমাৰে কয় যে, “এতিয়া কোনেও ভাৰতৰ বন্ধু নহয়।” তেওঁ বাংলাদেশকো উদাহৰণ হিচাপে উল্লেখ কৰে। ইয়াৰ সমান্তৰালকৈ কংগ্ৰেছ নেতা ডি কে শিৱকুমাৰে কয় যে কৰ্ণাটকৰ ৰাজনৈতিক পৰিৱৰ্তনৰ পৰম্পৰাগত সংস্কৃতি এইবাৰ সলনি হ’বলৈ গৈ আছে। ২০২৯ চনৰ বিধানসভা নিৰ্বাচনতো কৰ্ণাটকত কংগ্ৰেছে ক্ষমতা অক্ষুণ্ণ ৰাখিব বুলি তেওঁ নিশ্চিত।মন কৰিবলগীয়া যে বিহাৰৰ বিশেষ সংশোধনীক লৈ কংগ্ৰেছে সৰৱ হৈ পৰিছে। ইতিমধ্যে সকলো বিৰোধী দলৰ সাংসদৰ সৈতে দিল্লীৰ ৰাজপথলৈ ওলাই আহি নিজৰ মতামত প্ৰকাশ কৰিছে ৰাহুল গান্ধীয়ে। ভোটাৰ তালিকা সংশোধনৰ নামত বিজেপিয়ে ভোটৰ ৰিগিং কৰিছে। শাসকীয় দলটোক সহায় আগবঢ়াইছে ৰাষ্ট্ৰীয় নিৰ্বাচন আয়োগে। তেওঁ এনে বিস্ফোৰক অভিযোগ উত্থাপন কৰিছিল।
