নিজৰ গৃহৰাজ্য গুজৰাটত আইনী সমস্যাত পৰিছে তৃণমূলৰ সাংসদ ইউছুফ পাঠান। গুজৰাট উচ্চ ন্যায়ালয়ে ইউছুফক ‘বেদখলকাৰী’ বুলি অভিহিত কৰিছে। আদালতে কয় যে ইউছুফে অবৈধভাৱে বৰোদা পৌৰসভাৰ মাটি দখল কৰিছে। তেওঁ সেই মাটি খালী কৰিব লাগিব। প্ৰয়োজন হ’লে পৌৰসভাই বুলডজাৰ ব্যৱহাৰ কৰি সেই মাটি খালী কৰিব পাৰে।
বৰোদা পৌৰসভাই অভিযোগ উত্থাপন কৰিছে যে ২০১২ চনত বৰোদাৰ তানাডালজা অঞ্চলত ইউছুফ পাঠানে মাটি ক্ৰয় কৰিছিল। তেওঁৰ কাষৰ মাটিও ক্ৰয় কৰিবলৈ চেষ্টা কৰিছিল যদিও সেই মাটি পৌৰসভাৰ। পাঠানে এই মাটি ক্ৰয়ৰ প্ৰস্তাৱ নাকচ কৰিলে বৰোদা পৌৰসভাই। পিছত যদিও পৌৰসভাৰ সভাত পাঠানৰ মাটি ক্ৰয়ৰ প্ৰস্তাৱ গৃহীত হয়, তথাপিও ৰাজ্য চৰকাৰে নাকচ কৰে। অভিযোগ অনুসৰি ইয়াৰ পিছতে ইউছুফে বলপূৰ্বকভাৱে সেই মাটি দখল কৰে। পৌৰসভাৰ মাটিত দেৱালো স্থাপন কৰে।
লগতে পৌৰসভাই বলপূৰ্বকভাৱে মাটি দখল কৰাৰ অভিযোগত ইউছুফ পাঠানলৈ জাননী প্ৰেৰণ কৰে। তেওঁক বাৰে বাৰে মাটি খালী কৰিবলৈ কোৱা হৈছিল। কিন্তু তেওঁ খালী কৰা নাছিল। যদিও ইয়াৰ আঁৰত ৰাজনৈতিক ষড়যন্ত্ৰৰ তত্ত্বও উদ্ভৱ হৈছে। যোৱা বছৰ বংগৰ পৰা লোকসভা নিৰ্বাচনত ইউছুফে জয়ী হোৱাৰ লগে লগে পৌৰসভাই তেওঁক নতুন জাননী প্ৰেৰণ কৰে। ইউছুফে উচ্চ ন্যায়ালয়ৰ কাষ চাপিল। কিন্তু ন্যায়াধীশ মৌনা এম ভট্টৰ আদালতে স্পষ্টকৈ উল্লেখ কৰিছে যে সাংসদগৰাকীয়ে অবৈধভাৱে মাটি দখল কৰিছে। গতিকে তেওঁ মাটি খালী কৰিব লাগিব।
আদালতে পৰ্যবেক্ষণ কৰে যে ইউছুফ এজন জনপ্ৰতিনিধি আৰু একে সময়তে এজন চেলিব্ৰিটি। তেওঁৰ প্ৰতিটো খোজে সমাজত প্ৰভাৱ পেলায়। সেয়েহে তেওঁ বিধান পালন কৰা উচিত। বিপৰীতে তেওঁৱেই অবৈধ কাম কৰি আছে। গুজৰাট উচ্চ ন্যায়ালয়ে স্পষ্ট কৰি দিছে যে, পৌৰসভাই তৃণমূলৰ সাংসদগৰাকীলৈ আৰু কোনো জাননী প্ৰেৰণ নকৰে। ইয়াৰ পাছত যদিহে মাটি মুক্ত নহয় তেন্তে পৌৰসভাই প্ৰয়োজন সাপেক্ষে বুলডজাৰ ব্যৱহাৰ কৰিব পাৰিব।
