ভাৰতৰ উচ্চতম ন্যায়ালয়ে সকলো আদালতক জামিন আৰু অগ্ৰিম জামিনৰ আৱেদন দাখিলৰ দুমাহৰ ভিতৰত সিদ্ধান্ত ল’বলৈ নিৰ্দেশ দিছে, যদিহে জড়িত পক্ষৰ কাৰণে পলম নহয়। দ্ৰুত ন্যায় নিশ্চিত কৰা উদ্দেশ্যে এই সিদ্ধান্ত গ্ৰহণ কৰা হৈছে, কিয়নো জামিনৰ সিদ্ধান্তত পলম হ’লে সংবিধানৰ ১৪ আৰু ২১ নং অনুচ্ছেদৰ অধীনত সুৰক্ষিত স্বাধীনতাৰ অধিকাৰত প্ৰভাৱ পৰে। জামিন আৱেদন বহুদিন বিচাৰাধীন ৰখাটো অন্যায় আৰু ন্যায়ৰ ধাৰণাৰ বিপৰীত বুলি আদালতে মত পোষণ কৰে।
উল্লেখ্য যে মহাৰাষ্ট্ৰৰ দুজন ৰাজহ বিষয়াৰ বিৰুদ্ধে প্ৰৱঞ্চনা আৰু জালিয়াতিৰ অভিযোগত দাখিল কৰা জামিনৰ আৱেদন প্ৰায় ছয় বছৰ ধৰি বিচাৰাধীন হৈ থকা বম্বে উচ্চ ন্যায়ালয়ৰ এটা গোচৰ পৰ্যালোচনাৰ সময়ত উচ্চতম ন্যায়ালয়ে এই সিদ্ধান্ত গ্ৰহণ কৰিছে। উচ্চতম ন্যায়ালয়ে তেওঁলোকৰ জামিন প্ৰত্যাখ্যানৰ সিদ্ধান্ত সমৰ্থন কৰে যদিও গোচৰৰ বিচাৰ পলম হোৱাৰ বাবে কঠোৰ সমালোচনা কৰিছে। লগতে, উচ্চ ন্যায়ালয়সমূহক জামিনৰ আৱেদনৰ বাঢ়ি যোৱা সংখ্যা ৰোধৰ ব্যৱস্থা কৰিবলৈ আৰু তদন্তকাৰী সংস্থাসমূহৰ তদন্ত দ্ৰুত কৰাৰ লগতে গোচৰ বিচাৰ কৰিবলৈ নিৰ্দেশ দিছে যাতে অভিযুক্ত বা অভিযোগকাৰীৰ অপ্ৰয়োজনীয় কষ্ট নহয়।
নেশ্যনেল জুডিচিয়েল ডাটা গ্ৰীডৰ তথ্য অনুসৰি, দেশৰ জিলা আদালতত ২.৬ লাখতকৈ অধিক জামিনৰ আৱেদন বিচাৰাধীন হৈ আছে। উচ্চতম ন্যায়ালয়ে কয় যে জামিনৰ সিদ্ধান্ত সাধাৰণতে সহজ হ’ব লাগে আৰু পলম কৰা উচিত নহয়, কাৰণ ইয়াৰ ফলত মানুহে উদ্বেগৰ মাজত অপেক্ষা কৰিবলগীয়া হয়।
