হিমাচল প্ৰদেশ আৰু উত্তৰাখণ্ডত পুনৰ প্ৰকৃতিৰ তাণ্ডৱ অব্যাহত বৰষুণ, ডাৱৰ বিস্ফোৰণ আৰু বানপানীৰ কবলত ৰাজ্য দুয়োখনৰ পৰিস্থিতি দুৰ্বিষহ হৈ পৰিছে।
হিমাচলৰ মাণ্ডী জিলাত মুষলধাৰ বৰষুণৰ ফলত নদী আৰু নলাৰ জলস্তৰ হঠাতে বৃদ্ধি পাই বিস্তীৰ্ণ অঞ্চল প্লাৱিত কৰে। এই দুৰ্যোগত ইতিমধ্যে ৩ জন লোকৰ মৃত্যু হৈছে। প্ৰশাসনৰ তথ্য মতে, এতিয়ালৈকে প্ৰায় ৬ জন লোক নিৰুদ্দেশ হৈ আছে। ধৰমপুৰতো বহু অঞ্চল বানত প্লাৱিত হোৱাৰ লগতে বাসগৃহ ডুবি যোৱা খবৰ আহিছে। বানপানীৰ প্ৰভাৱত মাণ্ডী জিলাৰ বহু পথ ভাঙি পৰাৰ ফলত সম্পূৰ্ণ যাতায়াত ব্যৱস্থা স্তব্ধ হৈ পৰিছে।
ইতিমধ্যে দুৰ্যোগ ব্যৱস্থাপনা দলে উদ্ধাৰ অভিযান আৰম্ভ কৰিছে, যদিও অব্যাহত ধাৰাসাৰ বৰষুণৰ বাবে অভিযানতো ব্যাপক সমস্যা দেখা দিছে। মাণ্ডী-কুল্লু ঘাইপথত একাধিক স্থানত ভূমিস্খলনৰ ফলত যান-বাহনৰ চলাচল বন্ধ হৈ পৰিছে।
ইফালে উত্তৰাখণ্ডতো প্ৰকৃতিয়ে ভয়ংকৰ ৰূপ লৈছে। ৰাজ্যখনৰ ডেৰাডুন জিলাৰ সহস্ত্ৰধৰাত মাজনিশা সংঘটিত ডাৱৰ বিস্ফোৰণত ব্যাপক ধ্বংসলীলা সংঘটিত হয়। ফলস্বৰূপে নদীৰ জলস্তৰ বৃদ্ধি পাই বহু অঞ্চল ক্ষতিগ্ৰস্ত হয়। ছালোনা পথ সম্পূৰ্ণৰূপে বিধ্বস্ত হোৱাৰ লগতে বহু পৰিয়ালক নিশাৰ পৰা নিৰাপদ স্থানলৈ স্থানান্তৰ কৰিব লগা হয়।
প্ৰশাসনে ক্ষতিগ্ৰস্ত অঞ্চলত উদ্ধাৰ অভিযান চলাই ৰাখিছে। বিদ্যালয় আৰু অংগনবাড়ী কেন্দ্ৰসমূহক সুৰক্ষা হেতু বন্ধ ৰখাৰ নিৰ্দেশ দিয়া হৈছে। আনহাতে, তামছা নদীৰ জলপৃষ্ঠ বৃদ্ধি হোৱাৰ পিছত সৃষ্টি হোৱা বানত ৪-৫ জন লোক উটুৱাই নিয়া বুলি স্থানীয় সূত্ৰই জনাইছে। প্ৰকৃতিৰ এই প্ৰচণ্ড তাণ্ডৱত দুয়োখন পাহাৰীয়া ৰাজ্যত জনজীৱন প্ৰায় স্তব্ধ হৈ পৰিছে।
