‘আপুনি আনক নিজৰ ধৰ্ম শিকাই’ – কিন্তু ‘চোৰে ধৰ্মীয় কাহিনী নুশুনে’। বিপৰীত বাটেৰে খোজ কাঢ়ি যাব। বিজেপি শাসিত দিল্লীৰ বৰ্তমান পৰিস্থিতি সেয়াই। সুৰা দুৰ্নীতিক লৈ বিজেপিয়ে অৰবিন্দ কেজৰিৱাল চৰকাৰক ক্ষুৰধাৰ সমালোচনা কৰিছিল।কিন্তু শেহতীয়াকৈ সেই সুৰা সন্দৰ্ভত বিজেপিৰ মুখ্যমন্ত্ৰী ৰেখা গুপ্তাৰ চৰকাৰৰ সিদ্ধান্তই ৰাজধানীত আলোড়নৰ সৃষ্টি কৰিছে। আৰম্ভ হৈছে বিতৰ্কৰ। দিল্লীত নৱনিৰ্বাচিত বিজেপি চৰকাৰে সুৰাৰ দোকানৰ পৰা সুৰা ক্ৰয়ৰ ন্যূনতম বয়স ৪ বছৰ হ্ৰাস কৰি ২১ বছৰ কৰিবলৈ সিদ্ধান্ত গ্ৰহণ কৰিছে।
এতিয়াৰে পৰা ২১ বছৰ বয়সৰ পিছতহে চৰকাৰী দোকানৰ পৰা বিয়েৰ পোৱা যাব।আগতে ২৫ বছৰ আছিল। অৰ্থাৎ মদ কিনাৰ ন্যূনতম বয়স ৪ বছৰ হ্ৰাস কৰা হৈছে। ইয়াৰ সমান্তৰালকৈ চৰকাৰে ব্যক্তিগত বিক্ৰেতাক মুক্তভাৱে সুৰা বিক্ৰী কৰিবলৈ অনুমতি দিয়াৰ কথা চিন্তা কৰিবলৈ আৰম্ভ কৰিছে। এই নতুন নীতিয়ে সুৰাৰ ক’লা বজাৰ বন্ধ কৰাই নহয়, চৰকাৰৰ ৰাজহ বৃদ্ধি কৰিব বুলি দাবী কৰিছে বিজেপি চৰকাৰে। অৱশ্যে এই চৰকাৰৰ পৰিকল্পনাক সমালোচনা কৰিছে বিৰোধী শিবিৰে।
উল্লেখ্য যে, পঞ্জাৱ, মহাৰাষ্ট্ৰৰ দৰে ৰাজ্যত ২৫ বছৰৰ তলৰ লোকক সুৰাৰ দোকানত প্ৰৱেশ কৰিবলৈ দিয়া নহয়। দিল্লীও এই তালিকাত আছিল। কিন্তু বিজেপি শাসিত হাৰিয়ানা আৰু উত্তৰ প্ৰদেশত বহু আগতেই ন্যূনতম বয়সৰ সীমা আছিল ২১ বছৰ। কেৱল গোৱাত এই সীমা ১৮ বছৰ।
