বন্ধহোৱাৰ দিশত টাটা কনছালটেন্সি চাৰ্ভিচেছ (TCS)ৰ মধ্যপ্ৰদেশৰ ভূপালস্থিত কাৰ্যালয়। সংবাদ মাধ্যমত প্ৰকাশিত খবৰ অনুসৰি, চলিত বৰ্ষৰ জুন মাহৰ পৰা এই শাখাত কাৰ্যপ্ৰণালী স্তব্ধ হৈ পৰাৰ পিছতেই কাৰ্যালয় বন্ধ কৰাৰ প্ৰস্তুতি আৰম্ভ হৈছে। ইতিমধ্যে সা-সামগ্ৰী আঁতৰোৱাৰ কামো আৰম্ভ কৰা হৈছে বুলি জানিব পৰা গৈছে।
প্ৰতিষ্ঠানটোৰ এই সিদ্ধান্তৰ ফলত প্ৰায় এক সহস্ৰাধিক কৰ্মচাৰীৰ চাকৰি বিপদত পৰিব। লগতে ৰাজ্যৰ অৰ্থনৈতিতটো প্ৰভাৱিত কৰিব বুলি বিশেষজ্ঞসকলে আশংকা প্ৰকাশ কৰিছে। উল্লেখ্য যে TCS ৰ ভূপাল শাখাই বছৰি প্ৰায় ৫০০ কোটি টকাৰ ব্যৱসায় কৰিছিল।
কৰ্মচাৰীসকলে মধ্যপ্ৰদেশৰ বিত্তমন্ত্ৰী তথা উপ-মুখ্যমন্ত্ৰী জগদীশ দেওৰাক সাক্ষাৎ কৰাৰ পিছতে এই বিষয়টো পোহৰলৈ আহে। শাখাটো বন্ধ হ’লে ভোপালৰ সামাজিক আৰু অৰ্থনৈতিক জীৱনত গভীৰ প্ৰভাৱ পৰিব বুলি আভাস দিছে কৰ্মচাৰীসকলে।
TCS ৰ ভূপাল শাখা বন্ধ কৰাৰ সঠিক কাৰণ এতিয়াও স্পষ্ট হোৱা নাই। যদিও কৰ্মচাৰীসকলক অন্য শাখালৈ স্থানান্তৰ কৰাৰ বিষয়ে পৰিকল্পনা কৰা হৈছে বুলি জানিব পৰা গৈছে।
