মহাকাশ গৱেষণাৰ ক্ষেত্ৰত আমেৰিকাৰ নাছাই নতুন মাইলৰ খুঁটিত উপনীত হৈছে। সৌৰজগতৰ বাহিৰত মুঠ ৬,০০০ গ্ৰহ আৱিষ্কাৰ কৰিছে। অবিশ্বাস্য যেন লাগিলেও মাত্ৰ তিনি বছৰৰ আগতে এই সংখ্যা আছিল ৫ হাজাৰ।
যোৱা তিনি বছৰত নাছাই যি হাৰত নতুন গ্ৰহ আৱিষ্কাৰ কৰিছে তাত সকলোৱে স্তম্ভিত হৈ পৰিছে। অৱশ্যে মহাকাশ গৱেষণাৰ বাবে নাছাৰ এই কৃতিত্ব আদৰণীয়। কাৰণ মহাকাশৰ বুকুত এনেকুৱা কোটি কোটি গ্ৰহ থাকিব পাৰে। গতিকে কাম যিমানেই দ্ৰুতগতিত আগবাঢ়িব সিমানেই ভাল বুলি গৱেষকসকলে কয়।
এই মাইলৰ খুঁটিত উপনীত হোৱাৰ পিছত নাছাই কয়, “আমি মহাকাশ অন্বেষণৰ এক নতুন অধ্যায়ত প্ৰৱেশ কৰিছো, যিখন পৃথিৱী আমাৰ কল্পনাৰ বাহিৰত। জীৱনৰ বাবে উপযুক্ত গ্ৰহ, মহাজাগতিক প্ৰতিবেশীৰ সন্ধান অব্যাহত থাকিব। মনত ৰাখিব লাগিব যে বিশ্বব্ৰহ্মাণ্ডৰ বুকুত এতিয়াও বহুতো অজ্ঞাত জগত আছে।”
১৯৯৫ চনৰ ৬ অক্টোবৰত প্ৰথমবাৰৰ বাবে সৌৰজগতৰ বাহিৰত আন এটা গ্ৰহ আৱিষ্কাৰ হয়। জ্যোতিৰ্বিজ্ঞানী মিচেল মেয়ৰ আৰু ডিডিয়েৰ কুৱেলজে ইয়াক আৱিষ্কাৰ কৰিছিল। সূৰ্য্যৰ দৰে দেখা যোৱা ৫১ পেগাছি বি বহিঃগ্ৰহটো আৱিষ্কাৰ কৰা হয়। পৃথিৱীৰ পৰা ৫০ আলোকবৰ্ষ দূৰত্বত অৱস্থিত এই বহিঃগ্ৰহটো বৃহস্পতিৰ দৰে গেছেৰে ভৰি আছে। ইয়াৰ আয়তন বৃহস্পতিতকৈ ০.৬৪ গুণ ডাঙৰ।
১৯৯২ চনত বিজ্ঞানীসকলে বহিঃগ্ৰহ বুলি ভাবি এটা পালছাৰ আৱিষ্কাৰ কৰে। পিছত গম পোৱা গ’ল যে ই এটা নিউট্ৰন তৰাক প্ৰদক্ষিণ কৰি আছে। সঠিক অৰ্থত এটা গ্ৰহ বুলিলে যি বুজোৱা হয়, সেই ক্ষেত্ৰত ৫১ পেগাচি বি হৈছে আৱিষ্কৃত প্ৰথম বহিঃগ্ৰহ।
তেতিয়াৰ পৰাই বিগত ৩০ বছৰ ধৰি সৌৰজগতৰ বাহিৰৰ গ্ৰহৰ সন্ধান চলি আছে। চলিত বৰ্ষৰ ১৭ ছেপ্টেম্বৰলৈকে ৩০ বছৰীয়া জয়ন্তীত মুঠ ৬০০০ টা বহিঃগ্ৰহ পোৱা গৈছে। অৱশ্যে এই সংখ্যাটো ৬০০০ তে শেষ নহয়। ভৱিষ্যতে আৰু অধিক নতুন বহিঃগ্ৰহ আৱিষ্কাৰ হ’ব, ঠিক যেনেকৈ ইতিমধ্যে আৱিষ্কাৰ হোৱা আৰু ৮ হাজাৰ সম্ভাৱ্য বহিঃগ্ৰহ স্বীকৃতিৰ বাবে অপেক্ষা কৰি আছে। নাছাই সকলো দিশ পৰীক্ষা কৰি এবাৰ স্বীকৃতি দিলেই সেইবোৰো এটা এটাকৈ এই তালিকাত যোগ হ’ব।
শেহতীয়াকৈ নেপচুন সদৃশ KMT-2023-BLG-1896L b নামৰ এটা গ্ৰহৰ আৱিষ্কাৰ কৰা হৈছে। ১৬.৩৫ পৃথিৱী যোগ কৰিলে ইয়াৰ আকাৰ পোৱা যাব। সৌৰজগতৰ বাহিৰৰ গ্ৰহ আৱিষ্কাৰৰ ক্ষেত্ৰত নাছাৰ টেছ আৰু কেপলাৰ স্পেচ টেলিস্কোপ বিশেষভাৱে উল্লেখযোগ্য। ২৬০০ৰো অধিক বহিঃগ্ৰহ আৱিষ্কাৰ কৰি কেপলাৰে অৱসৰ লৈছে। টেছে এতিয়ালৈকে ৬৯৩টা বহিঃগ্ৰহ আৱিষ্কাৰ কৰিছে। সৌৰজগতৰ বাহিৰৰ গ্ৰহবোৰ বসবাসৰ বাবে উপযোগী হয় নে নহয় সেইটো নিৰ্ণয় কৰিবলৈ গৱেষণা চলি আছে।
