বিশ্বৰ আটাইতকৈ শক্তিশালী ক্ৰিকেট ব’ৰ্ড বিচিচিআইত অধিষ্ঠিত হ’ল এগৰাকী নতুন সভাপতি। পূৰ্বৰ সভাপতি ৰ’জাৰ বিন্নীৰ কাৰ্যকাল শেষ হোৱাৰ পিছৰ পৰাই নতুন সভাপতিত্বক লৈ জল্পনা কল্পনা চলি আছিল। শেহতীয়া তথ্য অনুসৰি প্ৰাক্তন ক্ৰিকেটাৰ মিথুন মানহাছ বিচিচিআইৰ নতুন সভাপতি হিচাপে নিৰ্বাচিত হৈছে। বিচিচিআইৰ শীৰ্ষ পদত আৰোহণ কৰা মানহাছ জম্মু-কাশ্মীৰৰ পৰা অহা প্ৰথমগৰাকী ব্যক্তি হিচাপে পৰিগণিত হৈছে।
উল্লেখ্য যে ৪৫ বছৰীয়া মিথুন মানহাছ ঘৰুৱা ক্ৰিকেটত এক পৰিচিত নাম। দিল্লীৰ হৈ ১৫৭ খন প্ৰথম শ্ৰেণীৰ মেচত ৯,৭১৪ ৰান সংগ্ৰহ কৰাৰ লগতে তেওঁ ১৩০ খন লিষ্ট এ আৰু ৯১ খন টি–২০ মেচ খেলিছে। আন্তঃৰাষ্ট্ৰীয় ক্ৰিকেটত প্ৰতিনিধিত্বৰ সুযোগ নাপালেও আই পি এলত দিল্লী ডেয়াৰডেভিলছ, পুনে ৱাৰিয়ৰ্ছ আৰু চেন্নাই ছুপাৰ কিংছৰ হৈ খেলিছিল। শেহতীয়াকৈ তেওঁ জম্মু-কাশ্মীৰ ক্ৰিকেট সন্থাৰ প্ৰশাসক হিচাপে কাৰ্যনিৰ্বাহ কৰিছিল আৰু দুলীপ ট্ৰফীৰ উত্তৰ মণ্ডলৰ আহ্বায়ক তথা গুজৰাট টাইটানছৰ সহায়ক কৰ্মচাৰী হিচাপেও কাৰ্যনিৰ্বাহ কৰিছিল।
বিচিচিআইৰ নিয়ম অনুসৰি ৭০ বছৰৰ ওপৰত কোনো বিষয়ববীয়া এই পদত বহিব নোৱাৰে। সেয়ে ৰ’জাৰ বিন্নীয়ে ছেপ্তেম্ব মাহত পদত্যাগ কৰিছিল। নতুন সভাপতি নিৰ্বাচনৰ দৌৰত প্ৰাক্তন ভাৰতীয় ক্ৰিকেটাৰ হৰভজন সিং আৰু ৰঘুৰাম ভট্টো আছিল।ইফালে ব’ৰ্ডৰ সচিব পদত অসমৰ দেৱজিৎ শইকীয়া পুনৰবাৰ দায়িত্বত বাহাল থাকিব। আনহাতে কৰ্ণাটকৰ ৰঘুৰাম ভট্টক কোষাধ্যক্ষ আৰু ছত্তীশগড় ক্ৰিকেট সন্থাৰ প্ৰভতেজ সিং ভাটিয়াক যুটীয়া সম্পাদক নিয়োগ কৰা হৈছে। উপ-সভাপতি পদত ৰাজীৱ শুক্লা পুনৰ দায়িত্বত বাহাল থাকিব।
