কেন্দ্ৰীয় লোকসেৱা আয়োগৰ অসামৰিক সেৱা পৰীক্ষা-২০২২ৰ ফলাফল সন্দৰ্ভত বিভ্ৰান্তিকৰ বিজ্ঞাপন দিয়াৰ বাবে কেন্দ্ৰীয় গ্ৰাহক সুৰক্ষা প্ৰাধিকৰণে দৃষ্টি আইএএছ-ক ৫ লাখ টকাৰ জৰিমনা বিহিছে।
দৃষ্টি আইএএছে বিজ্ঞাপনত সৰ্বভাৰতীয় পৰীক্ষাত সফল হোৱা প্ৰাৰ্থীৰ নাম আৰু ফটোৰ লগতে “UPSC CSE ২০২২ ত ২১৬+ উত্তীৰ্ণ” হৈছিল বুলি দাবী কৰিছিল।
কিন্তু পৰীক্ষা কৰাৰ পাছত কেন্দ্ৰীয় গ্ৰাহক সুৰক্ষা প্ৰাধিকৰণে এই দাবী বিভ্ৰান্তিকৰ বুলি ধৰা পেলাই আৰু প্ৰাৰ্থীসকলে বাছি লোৱা পাঠ্যক্ৰমৰ প্ৰকাৰ আৰু সময়সীমাৰ সন্দৰ্ভত গুৰুত্বপূৰ্ণ তথ্য লুকুৱাই ৰাখিছে বুলি গ্ৰাহক পৰিক্ৰমা মন্ত্ৰালয়ে এক বিবৃতিযোগে জানিবলৈ দিয়ে।
তদন্তত প্ৰকাশ পাইছে যে দৃষ্টি আইএএছে দাবী কৰা ২১৬ জন প্ৰাৰ্থীৰ ভিতৰত ১৬২ জন প্ৰাৰ্থীয়ে (৭৫ শতাংশ) সৰ্বভাৰতীয় লোকসেৱা আয়োগৰ প্ৰাৰম্ভিক আৰু মূল পৰ্যায় নিজা অধ্যয়নৰ দ্বাৰা উত্তীৰ্ণ হোৱাৰ পাছত প্ৰতিষ্ঠানটোৰ বিনামূলীয়া সাক্ষাৎকাৰ গাইডেন্স প্ৰগ্ৰেম (আই জি পি)হে লৈছিল। মাত্ৰ ৫৪ গৰাকী ছাত্ৰ-ছাত্ৰীয়েহে সাক্ষাৎকাৰ আৰু অন্যান্য পাঠ্যক্ৰমত নামভৰ্তি কৰিছিল।
ইচ্ছাকৃতভাৱে গুৰুত্বপূৰ্ণ তথ্য লুকুৱাই ৰখাটোৱে পৰীক্ষাত অৱতীৰ্ণ হ’বলগীয়া পৰীক্ষাৰ্থী আৰু অভিভাৱকসকলক বিপথে পৰিচালিত কৰিছিল। এনে কাৰ্য গ্ৰাহক সুৰক্ষা আইন, ২০১৯ৰ ২(২৮) ধাৰাত বিভ্ৰান্তিকৰ বিজ্ঞাপন হিচাপে চিহ্নিত হোৱা বাবে দৃষ্টি আইএএছৰ বিৰুদ্ধে এই কঠোৰ ব্যৱস্থা লোৱা হয়।
কেন্দ্ৰীয় গ্ৰাহক সুৰক্ষা প্ৰাধিকৰণে লগতে উল্লেখ কৰে যে দৃষ্টি আইএএছৰ ওপৰত একেধৰণৰ আচৰণৰ বাবে এইটো দ্বিতীয়টো শাস্তি। ইয়াৰ পূৰ্বে ২০২৪ চনৰ ছেপ্টেম্বৰ মাহত কৰ্তৃপক্ষই দৃষ্টি আইএএছৰ বিৰুদ্ধে “ইউপিএছচি চিএছই ২০২১ত ১৫০+ নিৰ্বাচন”ৰ বিভ্ৰান্তিকৰ দাবীৰ বাবে জৰিমনা বিহিছিল।
মন্ত্ৰালয়ে কয় যে এনে বিজ্ঞাপনে সাধাৰণ ৰাইজৰ মাজত ভুৱা আশাৰ জন্ম দিয়ে। বিশেষকৈ যেতিয়া তথ্য শুদ্ধকৈ প্ৰকাশ নকৰাকৈ বৃহৎ দাবী কৰা হয় তেতিয়া গ্ৰাহকে ভুল সিদ্ধান্ত লয়।
এই পৰ্যন্ত কেন্দ্ৰীয় গ্ৰাহক সুৰক্ষা প্ৰাধিকৰণে বিভ্ৰান্তিকৰ বিজ্ঞাপন আৰু ভুল বাণিজ্যিক নীতিৰ বাবে বিভিন্ন কোচিং ইনষ্টিটিউটলৈ ৫৪খন জাননী জাৰি কৰিছে। ছাব্বিচখন কোচিং ইনষ্টিটিউটৰ ওপৰত ৯০.৬ লাখ টকাৰো অধিক জৰিমনা বিহাৰ লগতে এনে বিভ্ৰান্তিকৰ দাবী বন্ধ কৰাৰ নিৰ্দেশ দিয়া হৈছে।
