চিলিত অনুষ্ঠিত ২০ বছৰ অনুৰ্ধ বিশ্বকাপত ব্ৰাজিলে ডাঙৰ বিপৰ্যয়ৰ সন্মুখীন হ’বলগীয়া হৈছে। ৰেমন মেনেজেছৰ নেতৃত্বত ৫ বাৰৰ প্ৰাক্তন চেম্পিয়ন ব্ৰাজিলৰ ২০ বছৰ অনুৰ্ধ দলটোৱে তিনিখন মেচত দুখন পৰাজয় আৰু এখন ড্ৰ’ৰ সৈতে গ্ৰুপ পৰ্যায়ৰ পৰাই বাহিৰ হয়।
১৯৭৭ চনত ফিফা যুৱ চেম্পিয়নশ্বিপ হিচাপে আৰম্ভ হোৱা এই প্ৰতিযোগিতাত ব্ৰাজিলে ২০ সংখ্যক বাৰৰ বাবে অংশগ্ৰহণ কৰিছিল। বিগত ১৯টা সংস্কৰণত দলটোৱে পাঁচবাৰকৈ চেম্পিয়ন আৰু চাৰিবাৰ ৰানাৰ্ছ আপ খিতাপ লাভ কৰিছে।
ইয়াৰ পূৰ্বে আটাইতকৈ বেয়া ফলাফল আছিল ২০০৭ চনত, যেতিয়া দলটোৱে দ্বিতীয় ৰাউণ্ডৰ পৰাই বাহিৰ হৈছিল। এইবাৰ তাকো অতিক্ৰমি গ্ৰুপ পৰ্যায়ত চতুৰ্থ স্থানত থাকিয়েই চেলেচাও বাহিনীয়ে বিদায় ল’বলগীয়া হ’ল।
গ্ৰুপৰ প্ৰথম মেচত মেক্সিকোৰ সৈতে ২-২ গ’লত ড্ৰ’ আৰু মৰক্কোৰ হাতত ২-১ গ’লত পৰাস্ত হোৱাৰ পিছত ব্ৰাজিলৰ হাতত শনিবাৰে (৪ অক্টোবৰ) চেণ্টিয়াগোত স্পেইনৰ বিৰুদ্ধে জয়লাভ কৰাৰ বাহিৰে আন কোনো বিকল্প নাছিল। দুয়োটা দলৰ বাবে এইখন ‘ডু অৰ ডাই’ মেচ আছিল।
খেলখনৰ ৪৭ মিনিটত ইকাৰ ব্ৰাভোৰ একমাত্ৰ গ’লটোৰে স্পেইনে অগ্ৰগতি লাভ কৰে আৰু সেই গ’লটোৰে স্পেইনে জয়লাভ কৰে। কিন্তু জয়ী হ’লেও পৰৱৰ্তী ৰাউণ্ডলৈ তেওঁলোকৰ অগ্ৰগতি এতিয়াও নিশ্চিত নহয়।
২৪টা দলৰ এই প্ৰতিযোগিতাত ছয়টা গ্ৰুপৰ চেম্পিয়ন আৰু ৰানাৰ্ছ আপৰ লগতে তৃতীয় স্থানৰ চাৰিটা শ্ৰেষ্ঠ দলে পৰৱৰ্তী ৰাউণ্ডলৈ আগবাঢ়িব। বৰ্তমান স্পেইনে সেই তালিকাৰ বাবে অপেক্ষা কৰি আছে।
গ্ৰুপৰ পৰা ক্ৰমে ৬ আৰু ৫ পইণ্ট লাভ কৰি মৰক্কো আৰু মেক্সিকোৱে অন্তিম ১৬ত স্থান লাভ কৰিছে। ফলত ব্ৰাজিলৰ বাবে বিদায়ৰ ঘন্টা বাজি উঠিল।
আনহাতে, গ্ৰুপ ‘ডি’ত থকা আৰ্জেণ্টিনাৰ ২০ বছৰ অনুৰ্ধ দলটোৱে উৎকৃষ্ট ফৰ্মত আছে। কিউবাক ৩-১ আৰু অষ্ট্ৰেলিয়াক ৪-১ গ’লত পৰাস্ত কৰাৰ পাছত যোৱা নিশা ইটালীক ১-০ গ’লত পৰাস্ত কৰি গ্ৰুপৰ শীৰ্ষস্থান দখল কৰে।
