ভাৰতৰ মুখ্য ন্যায়াধীশ বি.আৰ. গাভাইৰ ওপৰত ৬ অক্টোবৰত হোৱা জোতা নিক্ষেপ কৰিবলৈ লোৱা ঘটানাৰ পিছত তেওঁৰ বিৰুদ্ধে সামাজিক মাধ্যমত সাম্প্ৰদায়িক পোষ্ট প্ৰদানকাৰীৰ বিৰুদ্ধে পঞ্জাৱ পুলিছে ১০০ৰো অধিক ব্যৱহাৰকাৰীৰ বিৰুদ্ধে একাধিক এফআইআৰ দাখিল কৰিছে। আম আদমি পাৰ্টিৰ নেতৃত্বাধীন পঞ্জাৱ চৰকাৰে এই পোষ্টসমূহক “জাতি আৰু সাম্প্ৰদায়িক আৱেগক শোষণ কৰি শান্তি আৰু জনশৃংখলা বিঘ্নিত কৰাৰ প্ৰত্যক্ষ প্ৰয়াস” বুলি বৰ্ণনা কৰি এনে অবৈধ কাৰ্যকলাপৰ বিৰুদ্ধে “কঠোৰ ব্যৱস্থা” গ্ৰহণৰ প্ৰতিশ্ৰুতি দিছে। অৱশ্যে গোচৰৰ সঠিক সংখ্যা প্ৰকাশ কৰা নাই চৰকাৰে।
এই এফআইআৰসমূহ অনুসূচিত জাতি আৰু অনুসূচিত জনজাতি (অত্যাচাৰ প্ৰতিৰোধ) আইনৰ ধাৰাসমূহৰ অধীনত দাখিল কৰা হৈছে বুলি সদৰী কৰিছে। লগতে ভাৰতীয় ন্যায় সংহিতাৰ বিভিন্ন ধাৰাৰ অধীনতো গোচৰ ৰুজু কৰা বুলি জানিবলৈ দিছে।
উল্লেখ্য যে ৬ অক্টোবৰত আদালতত অধিবক্তা ৰাকেশ কিশোৰে মুখ্য ন্যায়াধীশ গাভাইৰ ওপৰত জোতা দলাই “সনাতন ধৰ্মৰ অপমান হিন্দুস্তানে সহ্য নকৰে” বুলি চিৎকাৰ কৰি উঠিছিল। অনুসূচিত জাতিৰ মুখ্য ন্যায়াধীশ গাভাইয়ে অধিবক্তাগৰাকীৰ বিৰুদ্ধে অভিযোগ নিদিয়াৰ বাবে কিশোৰৰ বিৰুদ্ধে কোনো অপৰাধমূলক ব্যৱস্থা গ্ৰহণ কৰা নহয়। কিন্তু ভাৰতীয় বাৰ কাউন্সিলে তেওঁৰ আচৰণক “আদালতৰ নিয়ম আৰু মৰ্যাদাৰ বিপৰীত” বুলি উল্লেখ কৰি তৎক্ষণিকভাৱে তেওঁৰ অনুজ্ঞাপত্ৰ বাতিল কৰি অনুশাসনমূলক কাৰ্যবিধি আৰম্ভ কৰিছে।
পৰৱৰ্তী সময়ত অধইবক্তাগৰাকীয়ে এএনআইক দিয়া এক সাক্ষাৎকাৰত কয় যে মুখ্য ন্যায়াধীশ গাভাইয়ে তেওঁৰ উচ্চ সাংবিধানিক পদত “মহামহিম”ৰ মৰ্যাদা বজাই ৰাখিব লাগে। তেওঁ গাভাইৰ শেহতীয়া মন্তব্যক সমালোচনা কৰি প্ৰশ্ন কৰে যে, “আপুনি মৰিচাছলৈ গৈ কয় যে দেশ বুলডজাৰ শাসন নচলিব।” চৰকাৰী সম্পত্তিৰ বেদখলকাৰীৰ বিৰুদ্ধে যোগী জীয়ে বুলডজাৰৰ ব্যৱস্থা লোৱাটো ভুল নেকি?” উল্লেখ্য যে গাভাইয়ে এক ৰায়দানত ভাৰতৰ ন্যায় ব্যৱস্থাই “বুলডজাৰৰ শাসন” নহয়, আইনৰ শাসন অনুসৰণ কৰে বুলি স্পষ্ট ভাৱে উল্লেখ কৰিছিল। সেই সিদ্ধান্তত উচ্চতম ন্যায়ালয়ে এনে অপৰাধৰ অভিযোগত জড়িত তথা সম্পত্তি ভাঙি পেলোৱাটো অবৈধ বুলি ঘোষণা কৰিছিল আৰু অবৈধ বেদখল মুক্তকৰণৰ বাবে যথাযথ প্ৰক্ৰিয়া মানিব চলিব লাগে বুলি উল্লেখ কৰিছিল।
