পাকিস্তানৰ আই এছ আইৰ হৈ চোৰাংচোৱাগিৰিৰ কৰাৰ অভিযোগত ৰাজস্থানৰ এজন যুৱকক গ্ৰেপ্তাৰ কৰা হৈছে। জানিব পৰা মতে, ধৃত যুৱকজনৰ নাম মাংগট সিং।
১৯২৩ চনৰ অফিচিয়েল ছিক্ৰেটছ এক্টৰ অধীনত তেওঁৰ বিৰুদ্ধে গোচৰ ৰুজু কৰা হৈছে। একাধিক চোৰাংচোৱা সংস্থাৰ দীৰ্ঘদিনীয়া চোৰাংচোৱাগিৰি আৰু তদন্তৰ অন্তত বৃহস্পতিবাৰে তেওঁক গ্ৰেপ্তাৰ কৰা হয়।
তদন্তত প্ৰকাশ পাইছে যে এগৰাকী মহিলাই ঈশা শৰ্মা নামেৰে সামাজিক মাধ্যমত ভুৱা একাউন্ট খুলি হানি ট্ৰেপিঙৰ দ্বাৰা যুৱকজনৰ পৰা তথ্য সংগ্ৰহ কৰিছিল মহিলাগৰাকীয়ে। জানিব পৰা মতে, মহিলাগৰাকীয়ে যুৱকজনক প্ৰেমৰ জালত পেলোৱাৰ লগত ধনৰ প্ৰলোভন দিছিল। তাৰপিছত ভাবুকি দি সেনা-বাহিনীৰ গোপন তথ্য সংগ্ৰহ কৰিছিল মহিলাগৰাকীয়ে।
ৰাজস্থানৰ ৰাজ্যিক চোৰাংচোৱা বিভাগৰ বিষয়াসকলে জনোৱা মতে, মাংগট সিঙে পাকিস্তানী মহিলাগৰাকী সৈতে প্ৰায় দুবছৰ ধৰি যোগাযোগত আছিল। অভিযোগ অনুসৰি তেওঁ আলৱাৰ কেণ্টনমেণ্ট আৰু ইয়াৰ স্থান সম্পৰ্কে বিভিন্ন গোপন তথ্য পাকিস্তানলৈ প্ৰেৰণ কৰিছিল।
উল্লেখ্য যে অপাৰেচন সিন্দুৰৰ অধীনত ৰাজস্থান চোৰাংচোৱা সংস্থাই ৰাজ্যখনৰ বিভিন্ন সেনা সংস্থাৰ আশে-পাশে অনুসন্ধান চলাই আছিল। এই অনুসন্ধানৰ সময়ত মাংগট সিঙৰ সন্দেহজনক গতি-বিধি লক্ষ্য কৰে চোৰাংচোৱাই।
ৰাজস্থান চোৰাংচোৱাৰ ডিআইজি ৰাজেশ মিলে কয় যে গ্ৰেপ্তাৰ হোৱাৰ পূৰ্বেও মাংগটে পাকিস্তানী চোৰাংচোৱালৈ সামৰিক তথ্য প্ৰেৰণ কৰিছিল। মাংগট সিঙে নিয়মিতভাৱে পাকিস্তানৰ দুটা নম্বৰৰ সৈতে যোগাযোগ ৰাখিছিল আৰু বিপুল পৰিমাণৰ ধন লাভ কৰিছিল। এতিয়া সেই বিত্তীয় লেনদেনৰ উৎসৰ বিষয়ে তদন্ত চলাই থকা হৈছে।
তেওঁ পাকিস্তানৰ যি দুটা মোবাইল নম্বৰৰ সৈতে যোগাযোগ ৰাখিছিল – তাৰে এটা মহিলা গৰাকীয়ে ব্যৱহাৰ কৰিছিল, আনহাতে আনটো আই এছ আইৰ মুখ্য কাৰ্যালয়ৰ বিষয়াই ব্যৱহাৰ কৰিছিল। গোপন সামৰিক তথ্যৰ বিনিময়ত নিয়মীয়াকৈ ধনৰ লেনদেনও হৈছিল।
যোৱা ১০ অক্টোবৰত আৰক্ষীয়ে মাংগটৰ মোবাইল ফোন আৰু ডিজিটেল লেনদেনৰ কাৰিকৰী বিশ্লেষণৰ অন্তত গ্ৰেপ্তাৰ কৰিছিল। জয়পুৰৰ এখন বিশেষ থানাত অফিচিয়েল ছিক্ৰেটছ এক্ট, ১৯২৩ৰ অধীনত এটা গোচৰ ৰুজু হৈছিল। বৰ্তমান ৰাজস্থান চি আই ডিৰ জিম্মাত আছে মাংগট সিং।
