উচ্চতম ন্যায়ালয়ত পুনৰ ভৰ্ৎসনাৰ সন্মুখীন হৈছে প্ৰৱৰ্তন সঞ্চালকালয়। দেশৰ মুখ্য ন্যায়াধীশে নিজেই ইডিক ধমক দি কয় যে তদন্তকাৰী সংস্থাটোৱে দেশৰ যুক্তৰাষ্ট্ৰীয় গাঁথনিৰ প্ৰতি গুৰুত্ব দিয়া নাই। মে’ মাহত তামিলনাডুৰ চৰকাৰী সংস্থা এটাৰ কেলেংকাৰীৰ সৈতে জড়িত গোচৰত উচ্চতম ন্যায়ালয়ে প্ৰৱৰ্তন সঞ্চালকালয়ক একেদৰেই ধমক দিছিল।
শেহতীয়াকৈ ৰাজ্য চৰকাৰৰ সংস্থা তামিলনাডু ৰাজ্যিক বিপণন নিগম (TASMAC)ৰ বিৰুদ্ধে প্ৰায় ১০০০ কোটি টকাৰ দুৰ্নীতিৰ অভিযোগ উত্থাপন হৈছে। ইডিৰ অভিযোগ যে সেই গোচৰত তেওঁলোকে বহু প্ৰমাণ পাইছে যিয়ে বৃহৎ দুৰ্নীতিৰ প্ৰমাণ দিয়ে। ইডিয়ে তদন্তৰ দায়িত্ব গ্ৰহণ কৰি তামিলনাডু ৰাজ্যিক বিপণন নিগমৰ কাৰ্যালয়ত অভিযান চলাইছে। আৰু সমগ্ৰ সংস্থাটোৰ বিৰুদ্ধে ইডিয়ে গোচৰ ৰুজু কৰি আছে। সেই লৈ এতিয়া ক্ষুব্ধ হৈ পৰিছে দেশৰ উচ্চতম ন্যায়ালয়।
ইডিৰ বিৰুদ্ধে তামিলনাডু ৰাজ্যিক বিপণন নিগম আৰু তামিলনাডু চৰকাৰে দাখিল কৰা গোচৰত উচ্চতম ন্যায়ালয়ে কয় যে তামিলনাডু চৰকাৰে ইতিমধ্যে নিজাববীয়াকৈ এই গোচৰৰ তদন্ত কৰি আছে। গতিকে ইডিয়ে সমগ্ৰ সংস্থাটোৰ বিৰুদ্ধে গোচৰ ৰুজু কৰি পৃথকে ইডিৰ তদন্ত কিয় কৰিছে? মুখ্য ন্যায়াধীশে সুধিলে, ‘ৰাজ্য চৰকাৰে তদন্ত কৰি আছে। নহয় জানো? সেয়া তদন্ত হয়নে নহয়? ৰাজ্যিক সংস্থাটোৰ তদন্ত কৰাৰ অধিকাৰ নাই নেকি? যুক্তৰাষ্ট্ৰীয় গাঁথনিৰ কি হ’ল?’
ইয়াৰ পূৰ্বেও মুখ্য ন্যায়াধীশ বি আৰ গাভাইৰ বিচাৰপীঠে কৈছিল, “ইডিয়ে সংবিধান আৰু যুক্তৰাষ্ট্ৰীয় গাঁথনিক সন্মান নকৰে।” দৰাচলতে ইয়াৰ পূৰ্বেও উচ্চতম ন্যায়ালয়ে ইডিৰ ক্ষমতাক লৈ উদ্বেগ প্ৰকাশ কৰিছিল। ইয়াৰ পূৰ্বে উচ্চতম ন্যায়ালয়ে কয় যে ইডিয়ে নাগৰিকৰ মৌলিক অধিকাৰৰ যত্ন ল’ব লাগে। এইবাৰ উচ্চতম ন্যায়ালয়ে পুনৰ ইডিৰ কামৰ কাৰ্যপ্ৰণালীক লৈ প্ৰশ্ন উত্থাপন কৰিছে।
