জাপানে লাভ কৰিব প্ৰথমগৰাকী মহিলা প্ৰধানমন্ত্ৰী। শ্বিগেৰু ইছিবাৰ পদত্যাগৰ পিছত ছানাই তাকাইচিয়ে নেতৃত্ব গ্ৰহণ কৰি সংখ্যালঘু চৰকাৰ গঠন কৰিছে বুলি জানইব পৰা গৈছে। ৪ অক্টোবৰত তেওঁ লিবাৰেল ডেম’ক্ৰেটিক পাৰ্টি (এলডিপি)ৰ নেতৃত্ব গ্ৰহণ কৰে। ছদিনৰ পিছত কোমেইটো পাৰ্টীয়ে মিত্ৰতা ভংগ কৰাত ৬৪ বছৰীয়া তাকাইচিয়ে সোমবাৰ সন্ধিয়া জাপান ইনোভেচন পাৰ্টী (জিআইপি)ৰ সৈতে নতুন মিত্ৰজোঁট গঠন কৰে। জাপানৰ সংসদৰ প্ৰভাৱশালী নিম্ন সদনত মুঠ ২৩১খন আসন লাভ কৰি নতুন মিত্ৰজোঁট সংখ্যাগৰিষ্ঠতাৰ পৰা দুটা ভোট কম। কিন্তু এই সংখ্যাই তাকাইচিয়ে সংসদত পৰৱৰ্তী ভোট লাভ কৰিবলৈ যথেষ্ট বুলি বিবেচিত হৈছে।
উল্লেখ্য যে জাপানৰ পুৰুষপ্ৰধান ৰাজনীতিত এই বিজয়ক কাঁচৰ চিলিং ভাঙি পেলোৱা বুলি অভিহিত কৰিছে। বিশ্ব অৰ্থনৈতিক মঞ্চৰ ২০২৫ চনৰ গ্ল’বেল জেণ্ডাৰ গেপ ৰিপ’ৰ্টত জাপান ১৪৮ দেশৰ ভিতৰত ১১৮ নম্বৰত আছিল আৰু নিম্ন সদনত মহিলা সাংসদৰ সংখ্যা মাত্ৰ ১৫% দেখিবলৈ পোৱা গৈছে। ইছিবাৰ কাৰ্যকালত মাত্ৰ দুগৰাকী মহিলা মন্ত্ৰী আছিল যদিও তাকাইচিয়ে “নৰ্ডিক” স্তৰৰ মহিলাৰ মন্ত্ৰীসভাৰ প্ৰতিশ্ৰুতি দিছে। তেওঁৰ প্ৰথম নিযুক্তিত প্ৰাক্তন মন্ত্ৰী ছাটছুকি কাটায়ামা থাকিব আৰু তেওঁ জাপানৰ প্ৰথম মহিলা বিত্তমন্ত্ৰী হ’ব। কাটায়ামা এলডিপিৰ বিত্ত আৰু বেংকিং গৱেষণা আয়োগৰ অধ্যক্ষ আৰু প্ৰাক্তন প্ৰধানমন্ত্ৰী শ্বিনজো আবেৰৰ সময়ত স্থানীয় অৰ্থনৈতিক পুনৰুজ্জীৱিতকৰণ মন্ত্ৰী আছিল।
তাকাইচিয়ে “জাপানৰ অৰ্থনীতি শক্তিশালী কৰি আগন্তুক প্ৰজন্মৰ বাবে দায়বদ্ধ দেশ গঢ়ি তুলিম” বুলি প্ৰতিশ্ৰুতি প্ৰতিশ্ৰুতি প্ৰদান কৰিছে যদিও তেওঁৰ সন্মুখত কঠিন প্ৰত্যাহ্বান আছে। জনসংখ্যা হ্ৰাস ৰোধ আৰু বিশ্বৰ চতুৰ্থ বৃহত্তম অৰ্থনীতি পুনৰুজ্জীৱিত কৰাটো মূল লক্ষ্য যদিও সংসদৰ দুয়োটা সদনত মিত্ৰজোঁট সংখ্যালঘু যাৰ ফলত আন দলৰ সমৰ্থন অপৰিহাৰ্য হ’ব।
