আমাৰ শৰীৰৰ বহুতো গুৰুত্বপূৰ্ণ অংগ আছে। কিন্তু লিভাৰ এনেকুৱা যিটোক প্ৰায়ে আওকাণ কৰা হয়। ই শৰীৰৰ বাবে চাফাই কাৰখানাৰ দৰে কাম কৰে। ইয়াৰ প্ৰধান কাম হ’ল তেজ বিশুদ্ধ কৰা, বিষাক্ত পদাৰ্থ আঁতৰোৱা, পুষ্টিকৰ পদাৰ্থ হজম কৰাত সহায় কৰা আৰু শক্তি জমা কৰা। কিন্তু আজিৰ ব্যস্ত আৰু জাংক ফুডেৰে ভৰা জীৱনশৈলীত লিভাৰটোৱেই আটাইতকৈ বেছি ক্ষতিগ্ৰস্ত হৈছে।
২০২৩ চনৰ তথ্য অনুসৰি সমগ্ৰ বিশ্বতে প্ৰতি বছৰে প্ৰায় ২০ লাখ লোক যকৃতৰ ৰোগত আক্ৰান্ত হৈ মৃত্যুমুখত পৰে। বা প্ৰতি ২৫ জনৰ ভিতৰত ১ জনৰ মৃত্যু হয় লিভাৰ বিকলতাৰ বাবে। যুৱক-যুৱতীসকলৰ মাজত এই সংখ্যা ক্ৰমাৎ বৃদ্ধি পাইছে।
এক প্ৰতিবেদন অনুসৰি কেৱল আমেৰিকাতে প্ৰায় ৪৫ লাখ লোকৰ লিভাৰৰ ৰোগ ধৰা পৰিছে। ভাৰতত ফেটি লিভাৰ আৰু লিভাৰ চিৰ’ছিছৰ প্ৰাদুৰ্ভাৱো বৃদ্ধি পাইছে। এনে পৰিস্থিতিত এজন আমেৰিকান চিকিৎসকে লিভাৰৰ স্বাস্থ্য সন্দৰ্ভত সতৰ্কবাণী জাৰি কৰিছে। লিভাৰৰ স্বাস্থ্যৰ বাবে কি কি বস্তু পৰিহাৰ কৰিব লাগে জানো আহক, নহ’লে লিভাৰৰ ক্ষতি নিশ্চিত।
আজিকালি নন-এলকহলিক ফেটি লিভাৰ ডিজিজ (NAFLD) নামৰ এবিধ ৰোগ দ্ৰুতগতিত বিয়পি পৰিছে। এই ৰোগ মদ্যপানৰ বাবে নহয়, বৰঞ্চ খাদ্যাভ্যাস বেয়া আৰু বেয়া জীৱনশৈলীৰ বাবেহে হয়।
আমেৰিকান লিভাৰ ফাউণ্ডেচনৰ তথ্য অনুসৰি আমেৰিকাত প্ৰতি চাৰিজন লোকৰ ভিতৰত এজন লোক এই ৰোগত আক্ৰান্ত হয়। এই অৱস্থাৰ ফলত যকৃতত ক্ৰমান্বয়ে চৰ্বি জমা হয়, যাৰ ফলত ইয়াৰ কাৰ্য্যক্ষমতাত প্ৰভাৱ পৰে। সময়মতে যত্ন লোৱা নহ’লে এই ৰোগে লিভাৰৰ বিকলতা বা কৰ্কট ৰোগৰ দৰে গুৰুতৰ অৱস্থালৈ পৰিণত হ’ব পাৰে।
এতিয়ালৈকে মানুহে ভাবিছিল যে ঘিউ, মাখন বা মাংস আদিৰ দৰে গধুৰ খাদ্যই লিভাৰৰ বাবে আটাইতকৈ ক্ষতিকাৰক। কিন্তু আমেৰিকাৰ বিখ্যাত ফাংচনেল মেডিচিনৰ চিকিৎসক ডাঃ এড্ৰিয়ান শ্বনাইডাৰৰ মতামত বেলেগ। শেহতীয়াকৈ তেওঁ এটা ভিডিঅ’যোগে বুজাই দিছে যে লিভাৰৰ বাবে আটাইতকৈ বিপদজনক বস্তুটো তেল বা মাংস নহয়, বৰঞ্চ হাই ফ্ৰুক্ট’জযুক্ত কৰ্ণ চিৰাপ।
এইচ এফ চি এছ (HFCS) হৈছে এক প্ৰকাৰৰ কৃত্ৰিম চেনি যিটো সাধাৰণতে প্ৰচেছড আৰু পেকেটত ভৰোৱা খাদ্যত মিঠাৰ বাবে যোগ কৰা হয়। বিশেষকৈ ঠাণ্ডা পানীয়, এনাৰ্জি ড্ৰিংক, কুকিজ, কেক, কেণ্ডি, ব্ৰেকফাষ্টৰ চিৰিয়েল, ৰেডিমেড চচ, জুচ আৰু ফ্লেভাৰযুক্ত দৈত ইয়াক পোৱা যায়। ডাঃ শ্বানিডাৰে বুজাইছে যে এইচ এফ চি এছ গ্লুক’জতকৈ বহু বেছি দ্ৰুতগতিত লিভাৰত চৰ্বিলৈ ৰূপান্তৰিত হয়, যাৰ প্ৰত্যক্ষ প্ৰভাৱ লিভাৰত পৰে।
ফ্ৰুক্ট’জ হৈছে ফল-মূলত পোৱা প্ৰাকৃতিক চেনি যদিও কৃত্ৰিম ফ্ৰুক্ট’জ, যেনে এইচ এফ চি এছ বা পেকেট চেনিত থকা চেনিয়ে ক্ষতি কৰে। এই ধৰণৰ ফ্ৰুক্ট’জ বেছিকৈ খালে ই আন্ত্ৰিক স্বাস্থ্যৰ ক্ষতি কৰে, উপকাৰী বেক্টেৰিয়া হ্ৰাস কৰে, যকৃতত চৰ্বি জমা কৰি ৰাখে আৰু প্ৰদাহ আৰু যকৃতৰ ক্ষতি কৰে। এই কাৰণেই এইচ এফ চি এছক লিভাৰৰ বাবে আটাইতকৈ বিপজ্জনক বুলি গণ্য কৰা হয়।
ডাঃ শ্বানিডাৰে আৰু আন বহু স্বাস্থ্য বিশেষজ্ঞৰ পৰামৰ্শ অনুসৰি যদি আপুনি আপোনাৰ লিভাৰক দীৰ্ঘম্যাদীভাৱে সুস্থ কৰি ৰাখিব বিচাৰে তেন্তে আপোনাৰ কিছুমান অভ্যাস সলনি কৰাটো গুৰুত্বপূৰ্ণ। শীতল পানীয়, পেকেটত ভৰোৱা জুচ, এনাৰ্জি ড্ৰিংকছ, কেক, বিস্কুট, কেণ্ডি, প্ৰচেছড ফুড, ৰেডিমেড ড্ৰেছিং, চিলি চচ, টমেটো চচ, অত্যধিক মিঠা কৰা দৈ আৰু সোৱাদযুক্ত দৈ আদি পৰিহাৰ কৰক। সতেজ ফল-মূল খাওক, ঘৰতে বনোৱা সতেজ খাদ্য খাওক, অধিক পানী খাওক, প্ৰতিদিনে কিছু ব্যায়াম কৰক, মদ আৰু ধঁপাতৰ পৰা আঁতৰি থাকক।
